Qərbi Azərbaycanlılar icmasının ikinci təşkilatı yaradıldı - QAQB faktı necə qarşıladı...

Rizvan Talıbov: “Birləşmə məsələsi çətindir, reallığa uyğun deyil”

img

“Azərbaycan Qaçqınlar Cəmiyyəti” İctimai Birliyinin ümumi yığıncağı keçirilib. Bu barədə qurumdan məlumat verilib. Məlumata əsasən, iclasın gündəliyinə “Azərbaycan Qaçqınlar Cəmiyyəti” İctimai Birliyinin “Qərbi Azərbaycan İcması” adlı qeyri-kommersiya təşkilatına çevrilməsi (yenidən təşkili), yeni qurumun Nizamnaməsinin təsdiqi, İdarə Heyətinin seçilməsi ilə bağlı məsələlər daxil edilib:

Müşahidə Şurasının və Nəzarət-Təftiş Komissiyasının üzvləri və sədrləri. Səsvermə nəticəsində “Azərbaycan Qaçqınlar Cəmiyyəti” QHT-nin adı dəyişdirilərək “Qərbi Azərbaycan İcması” adlı qeyri-kommersiya təşkilatına çevrilib.

Bildiyimiz kimi, Azərbaycan Qaçqınlar Cəmiyyətinin adı dəyişib “Qərbi Azərbaycan İcması” qoyublar. Əslində,  yaxşı məsələdir ki, təşkilatın hüquq və vəzifələri müəyyənləşib və burada Qərbi Azərbaycana qayıdış və sair məsələləri də var.

“Qərbi Azərbaycan İcması” ilə Rizvan Talıbovun rəhbərlik etdiyi Göyçə-Zəngəzur Cumhuriyyəti və QAQB arasında əməkdaşlıqlar nəzərdə tutulurmu, nə kimi əməkdaşlıq ediləcək, nə vaxtsa bu qurumların birləşmə perspektivi, ehtimalı varmı? “Qərbi Azərbaycan İcması” ilə QAQB-nin birləşməsinə ehtiyac varmı?

Məsələ ilə bağlı Göyçə-Zəngəzur Cumhuriyyəti prezidenti, QAQB sədri Rizvan Talıbovla əlaqə saxladıq.

  • “Əməkdaşlığa heç zaman etiraz etməmişəm, həmişə əməkdaşlığın tərəfdarı olmuşam”

Rizvan Talıbov “Bakı-Xəbər”ə açıqlamasında bildirdi ki, “Azərbaycan Qaçqınlar Cəmiyyəti” QHT-nin adının dəyişdirildiyindən və “Qərbi Azərbaycan İcması” adlandırılmasından xəbəri var. Rəhbərlik etdiyi qurumların müzakirələrə və əməkdaşlıqlara açıq olduğunu deyən R.Talıbov bildirdi ki, vaxtilə Ə.Ələkbərli ilə normal münasibətləri olub: “Bizim əvvəllər Əziz müəllimlə normal münasibətlərimiz olub. O indi deputatdır. Deputat olandan sonra insanlar bir az kənara çəkilirlər, əlimiz çatmır. Bəzi adamlar vəzifə alanda onların telefonlarına düşmək də çətin olur. Amma mən həmişə inteqrasiyanın, Qərbi Azərbaycan yönündə çalışan təşkilatların vahid platformada, bir yerdə mübarizə aparmalarının tərəfdarı olmuşam. Çünki siz də bilirsiz ki, Qərbi Azərbaycan problemi çox çətin və ağır problemdir. Ona görə də, bu problemi hamılıqla həll etməyə çalışmağımız daha doğru olar deyə düşünürəm. Mənim fikrim bu cürdür”.

Bu təşkilatların gələcəkdə birləşmək ehtimalının olub-olmamasına gəlincə, R.Talıbov “Birləşmə məsələsi çətindir, reallığa uyğun deyil.  Çünki hərəsində bir məqsəd, bir məram var. Amma sırf Qərbi Azərbaycan torpaqlarının azad olması, bizim yenidən o torpaqlara qayıdışımıza nail olmağımız naminə fəaliyyət göstərən, eyni zamanda, o ərazilərdə yenidən məskunlaşmağımızı həqiqətən istəyən, o yöndə çalışan təşkilatlarla bir koalisiyada birləşməyimizi mümkün hesab edirəm. Amma şəxsi maraqları üçün Qərbi Azərbaycan adından istifadə edən, məqsəd güdən, yaxud hansısa bir deputat vəsiqəsi, vəzifə əldə etmək istəyənlərlə bizim birləşməyimiz mümkün deyil. Burada iki məqsəd var - biri şəxsi maraqlardır, o biri isə milli dövlətilik marağıdır. Əgər sənin təşkilatının məqsədi milli və dövlət maraqlarına xidmət etməkdirsə, onda belələri ilə dil tapmaq asandır. Yəni həm Qərbi Azərbaycana Qayıdış Birliyi, həm də Göyçə-Zəngəzur Cumhuriyyəti olaraq bizim məqsədimiz milli  dövlət maraqlarına xidmət etməkdir. Yəni bu yolda kimlər varsa onlarla əməkdaşlıq etməyə hazırıq. Amma kimsə şəxsi maraqları üçün çalışırsa onlarla birləşməyin bir əhəmiyyəti yoxdur”- deyə bildirən R.Talıbovdan “Rizvan müəllim, əməkdaşlıq üçün siz təşəbbüs edəcəksiniz, yoxsa  “Qərbi Azərbaycan İcması”nın addımını gözləyirsiniz”- soruşduqda  müsahibimiz bunları dedi: “Əməkdaşlığa heç zaman etiraz etməmişəm, həmişə əməkdaşlığın tərəfdarı olmuşam”.

“Qərbi Azərbaycan İcması”nın rəhbəri, millət vəkili Əziz Ələkbərli ilə telefon əlaqəsi saxladıq. Ə.Ələkbərli isə bildirdi ki, çəkilişə getdiyi üçün sualımıza çəkilişdən çıxdıqdan sonra cavab verəcək.  Biz yazını çapa hazırladığımız müddətdə millət vəkili açıqlama göndərmədiyi üçün onun fikirlərini bu yazıda işıqlandıra bilmədik. Əziz müəllim nə zaman mövqeyini açıqlasa, onu da dərc edəcəyik.

İradə SARIYEVA

Peşə etikası

Son xəbərlər