Vətən müharibəsi uşaq və gənclərin inkişafına yeni tələblər açdı - dövlət siyasətində yeniliklər...

img

Azərbaycanda yüksək intellektual səviyyəyə, vətənpərvərlik hissinə, milli düşüncəyə malik gənclər mühiti formalaşıb. Ölkəmizdə gənclərin potensialının düzgün istiqamətlənməsinə yönələn tədbirlər dövlətin uzaqgörən siyasətinin göstəricisidir.

Gənclər siyasəti gənc nəslin ictimai-siyasi həyatdakı rolunun artmasına, ölkənin aparıcı qüvvəsinə çevrilməsinə, bütövlükdə, kreativ gəncliyin formalaşmasına geniş imkanlar açıb. Bu gün Azərbaycan gəncliyi ölkənin ictimai-siyasi, həmçinin sosial-iqtisadi və digər sferalarında aktiv fəaliyyət göstərir, intellektual imkanları və yaradıcılığı ilə dövlətçiliyimizin möhkəmləndirilməsi işinə öz töhfəsini verir. Bu sağlam və intellektual nəslin formalaşmasına xidmət edir. Ölkəmizdə gənc nəslin problemlərinin həlli, onların cəmiyyət həyatında layiqli iştirakının təmin olunması, milli-mənəvi dəyərlərə bağlılığının möhkəmləndirilməsi üçün dövlət səviyyəsində bütün zəruri tədbirlər həyata keçirilir.

  • “Yüksək milli ruhlu gənclərimiz Ali Baş Komandanın əmri ilə torpaqlarımızı işğaldan azad etdi”

Qürurlu haldır ki, xalqımızın qəhrəmanlıq tarixini yazanlar da gənclərdir. Gənclərin Vətən müharibəsində qələbəmizdə rolu böyük olub. Qazanılan uğurlar, bir daha onu sübut edir ki, hər bir gənc ölkə qarşısında qoyulan böyük məqsədi və məsuliyyəti dərk edir. 44 günlük Vətən müharibəsində gənclərimiz vətənpərvərlik nümayiş etdirdilər. Yüksək milli ruhlu gənclərimiz Ali Baş Komandanın əmri ilə torpaqlarımızı işğaldan azad etdi. Ona görə ki, müstəqillik dövründə vətənpərvər gənc nəsil formalaşmışdı. Vətən müharibəsi Azərbaycan gəncliyini dünyaya tanıtdı. Elə özümüz də son onilliklərdə cəmiyyətimizdə necə vətənpərvər, cəsur, qəhrəmanlıq ruhu ilə dolu, bir o qədər də savadlı, sağlam düşüncəli nəslin yetişdiyinə bir daha şahid olduq. Azərbaycanın mərd oğulları şəhidlik zirvəsinə yüksəldilər. Bu torpağın qazisi oldular. Bu gün Azərbaycan belə oğulları ilə qürürlanır, fəxr edir. Dövlət müstəqilliyimizin həyatımıza bəxş etdiyi ən böyük nailiyyətlərdən biri də onların milli ruhda tərbiyəsi, hərtərəfli inkişafı üçün yaranmış mühitdir.

  • “Müharibədə əsas yükü, əsas vəzifəni gənc nəsil yerinə yetirdi”

Prezident İlham Əliyev çıxışlarında 2001-ci ildən sonra doğulan uşaqların müharibədə çox həlledici rol oynadığını xüsusi qeyd edib. Müstəqillik dövründə yetişmiş gənclərin əsas qüvvə olduğunu ayrıca vurğulayıb: “Mən çox şadam ki, son illər ərzində Azərbaycanda vətənpərvər, güclü, milli ruhda tərbiyə almış gənc nəsil yetişib”. Cənab Prezident bildirib ki, onun Azərbaycana rəhbərliyi dövründə yetişən insanlar bu torpaqları azad etdilər. Tarixi Qələbəmizdən sonra Şuşaya ilk səfəri zamanı Azərbaycan Prezidenti İlham Əliyev gənclərimizin Vətən müharibəsindəki qəhrəmanlığını  nəzərdə tutaraq demişdir: “Bütün nəsillərdən olan vətəndaşlarımızın bu Qələbədə böyük zəhməti var, payı var. Ancaq onu da bildirməliyəm ki, əsas yükü, əsas vəzifəni gənc nəsil yerinə yetirdi. 2003-cü ildə 10 yaşı, 15 yaşı olanların bu gün 27-32 yaşı var. Onların məhz vətənpərvərlik ruhunda tərbiyə alması, düşmənə nifrət hissi bizi Qələbəyə apardı və Azərbaycan tarixi ədaləti bərpa etdi”.

Bu mənada Vətən müharibəsindən sonra uşaq və gənclərin fiziki-mənəvi inkişafı sahəsindəki dövlət siyasəti hansı keyfiyyət dəyişiklikləri müşahidə olunur?

  • “Məktəblərdə, universitetlərdə uşaq və gənclərin fiziki-mənəvi inkişafı sahəsindəki iş müvəffəqiyyətlə yerinə yetirilir”

Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı bununla bağlı bir sıra məqamlara toxundu. Onun fikrincə, bununla bağlı bir sıra işlər görülür: “Həqiqətən də torpaqların azad olunmasında qəhrəmanlığı əsasən müstəqillik dövründə yetişən gənclər göstərib. Ərazilərimiz 30 ilə yaxın işğal altında idi. Həmin müddətdə vətən həsrəti, vətənpərvərlik hissinin aşılanması həmin gəncləri torpağa bağlılığa gətirib çıxartdı. Prezident ətrafında xalq sıx birləşərək işğala son qoyuldu. Vətən müharibəsində əldə edilən qələbədən sonra gənclər arasında vətənpərlik ruhu daha da artıb. Məzmun və keyfiyyət baxımından tamamilə yeni bir nəfəs yaranıb. Məsələ ondadır ki, əvvəlki müharibədə biz məğlub olmuşduq. Torpaqlarımız işğal olunmuşdu. Bu da istər-istəməz cəmiyyətin, gənclərin ovqatına mənfi təsir edirdi. Ancaq 44 günlük müharibədə əldə etdiyimiz şanlı qələbə bütün bu steriotipləri, məğlubiyyət sindromunu ortadan qaldırdı. Vətən müharibəsinin nəticələri Azərbaycanın beynəlxalq imicini daha da gücləndirdi. Bu baxımdan məktəblərdə, universitetlərdə, digər qurumlarda uşaq və gənclərin fiziki-mənəvi inkişafı sahəsindəki iş müvəffəqiyyətlə yerinə yetirilir. Azərbaycanın müasir dövrdə əldə etdiyi qələbə dünyaya bir nümunədir. Azərbaycan xalqı 1989-cu ildə ən vətənpərvər xalq statusunu almışdı. 2020-ci ildə 44 günlük müharibədə əldə edilən qələbə ilə Azərbaycan bir daha bunu sübut etdi. Bunda da gənclərin rolu böyükdür. Hesab edirəm ki, bu yöndə görülən işlər uğurla davam edir”.

Vidadi ORDAHALLI
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.

Peşə etikası

Son xəbərlər