Rusiya sülhməramlı kontingentinin müvəqqəti yerləşdiyi Azərbaycan ərazisindəki erməni separatçıları avqustun 3-də Laçın rayonu istiqamətində yerləşən Azərbaycan Ordusunun bölmələrinin mövqelərini intensiv atəşə tutub. Erməni təxribatı nəticəsində ordumuzun əsgəri Kazımov Anar Rüstəm oğlu aldığı güllə yarasından şəhid olub.
Erməni silahlı dəstələri ilk dəfə deyil ki, bu cür təxribata əl atır. Bundan qabaq da müxtəlif vaxtlarda ordumuzun mövqeləri dəfələrlə atəşə məruz qalıb. Azərbaycan Ordusu qanunsuz erməni silahlılarının təxribatı nəticəsində əsgərimizin şəhid olmasına dərhal reaksiya verərək “Qisas” əməliyyatına başladı və qısa müddətdə rus sülhməramlılarının himayəsində terrorçuluqla məşğul olan dəstəyə ağır zərbə vurdu. Azərbaycan Ordusu bölmələrinin keçirdiyi “Qisas” cavab əməliyyatı nəticəsində Qırxqız yüksəkliyi, həmçinin Kiçik Qafqaz dağ silsiləsinin Qarabağ silsiləsi boyu Sarıbaba və bir sıra digər əhəmiyyətli hakim yüksəklikləri nəzarətimizə keçib.
Maraqlıdır, Azərbaycan cəmiyyəti avqustun 3-də keçirilən “Qisas” əməliyyatını necə qarşıladı?
Vüqar Rəhimzadə: “Ölkə əhalisi də bu məsələdə dövlətin yanındadır”
Yeni Azərbaycan Partiyası (YAP) Xətai rayon təşkilatının sədri, siyasi elmlər doktoru Vüqar Rəhimzadə “Bakı-Xəbər”ə açıqlamasında qeyd etdi ki, Azərbaycan öz ərazilərini terrorçulardan təmizləyir: “Hər bir azərbaycanlı terrorçuların ölkə ərazisindən çıxarılmasını yüksək qiymətləndirir. Antiterror əməliyyatına tək Azərbaycan xalqı deyil, beynəlxalq təşkilatlarda yüksək qiymət verməlidir. Beynəlxalq təşkilatlar bu məsələdə öz ədalətli mövqeyini nümayiş etdirməlidir”.
V.Rəhimzadənin sözlərinə görə, Azərbaycan ordusu Ali Baş Komandanın ətrafında birləşərək, xalqın dəstəyi ilə cinayətkar ünsürlər bütün ərazilərdən təmizləyəcək. Ölkə əhalisi də bu məsələdə dövlətin yanındadır.
Fəzail Ağamalı: “44 günlük Vətən müharibəsində olduğu kimi, indi də hər birimiz silahlı qüvvəllərimizlə və müzəffər Ali Baş Komandanımızla bərabər olmalıyıq”
Millət vəkili, Ana Vətən Partiyasının sədri Fəzail Agamalı qeyd etdi ki, davamlı olaraq Azərbaycan – Ermənistan sərhədində və sülhməramlıların müvəqqəti yerləşdiyi ərazimizdə separatçıların törətdiyi təxribatlar sözün həqiqi mənasında Azərbaycan Silahlı Qüvvələrinin səbr kasasını doldurmağa başladı: “Dəfələrlə ölkə prezidenti Ali Baş Komandan səviyyəsində deyildiyi kimi, bütün bu təxribatlar Azərbaycanın dəmir yumruğu ilə qarşılaşacaq, onlara güzəşt olmayacaq kimi fikirləri artıq bir daha reallığa çevrilməkdədir. Qəhrəman əsgər və zabitlərimiz, Azərbaycanın Silahlı Qüvvələrinin başladığı “Qisas” əməliyyatı sona çatdırılmalı və Azərbaycan ərazisində antiterror əməliyyatı keçirilərək ermənilərin və separatçıların silahlı dəstələri darmadağın edilməli, Rusiyanın sülməramlı qüvvələrinin müvəqqəti yerləşdiyi ərazilərimizdə də Azərbaycanın suverenliyi təmin olunmalıdır”.
Millət vəkilinin sözlərinə görə, 44 günlük Vətən müharibəsində olduğu kimi, indi də hər birimiz, bütün Azərbaycan vətəndaşları dövlətimizlə, silahlı qüvvəllərimizlə və müzəffər Ali Baş Komandanımızla bərabər olmalı, ermənilər son əsgərinə qədər darmadağın edilməli, Xankəndi, Ağdərə, Xocavənd, Xocalı və bütövlükdə bütün ərazilərimizdə Azərbaycanın suverenliyi təmin olunmalıdır.
Azər Həsrət: “Azərbaycan xalqı antiterror əməliyyatının arxasındadır, ona dəstək verir”
Siyasi şərhçi Azər Həsrət qeyd etdi ki, Azərbaycan dövləti münaqişənin mövcud olduğu bütün dövrlərdə problemlərin dinc yolla bərpa etməyə sadiq olduğunu bəyan edib. Hətta uzun illər təmkinlə dözüb ki, bir güllə belə atılmadan problem həll olunsun: “Təəssüf ki, işğalçı Ermənistan tərəfi yenə də öz ampulansındadır. Onlar daim hərbi ritorikadan çıxış edərək Azərbaycanı hədələyirlər. Qarabağda son günlər baş verən hadisələr də bu qəbildəndir. Azərbaycan bu əməliyyatı gerçəkləşdirməli idi”.
Ekspert hesab edir ki, ölkə ictimaiyyəti Qisas əməliyyatını çox yüksək səviyyədə dəstəkləyir: “Azərbaycan cəmiyyəti işğalçı Ermənistanın hərəkətlərindən bezdiyi üçün ordumuzun məlum hərəkətini müsbət qarşılayır. Azərbaycan xalqı antiterror əməliyyatının arxasındadır, ona dəstək verir. Dövlətimiz xalqa arxayın olaraq bu əməliyyatı keçirdi. Ümumiyyətlə, onu da deyim ki, Azərbaycan dövlətinin bu yöndə atacağı addımlara ictimai rəy müsbət olacaq. Antiterror əməliyyatı ermənilər arasında narazılığa səbəb olub. Onlar bu əməliyyatdan dərs çıxarmış olacaqlar”.
Günel CƏLİLOVA
