Son günlər cəbhədə vəziyyətlə bağlı sosial şəbəkələrdə həqiqətə uyğun olmayan məlumatlar yayılır. Guya şiddətli döyüşlər gedir, ciddi sayda itkilər var və s. Qeyd edək ki, son günlər bəzi sosial media istifadəçiləri tərəfindən Azərbaycan Ordusunun işgüzar nüfuzuna xələl gətirmək, vətəndaşlar arasında süni ajiotaj yaratmaq, eləcə də dövlətin müdafiə qabiliyyətinin möhkəmləndirilməsi istiqamətində görülən işlərə kölgə salmaq məqsədilə həqiqətə uyğun olmayan informasiyalar tirajlanır.
Bəzi radikal mövqedən çıxış edənlər də bununla bağlı intensiv təbliğat aparırlar, reallığı əks etdirməyən məlumatlar yayırlar. Elə bir saxta görüntü yaradırlar ki, guya vəziyyət əslində çox mürəkkəbdir, amma baş verənlər cəmiyyətdən gizlədilir. Ancaq bəlli olur ki, bunların heç biri həqiqətə uyğun deyil. Cəbhədə vəziyyət iddia edildiyi kimi kritik deyil. Hansısa müəmmalı hadisələr baş vermir.
Maraqlıdır, o zaman bu cür yalan məlumatları tirajlamağın arxasında nə dayanır? Bununla bağlı ekspertlərin yanaşması nədən ibarətdir?
“Bununla cəmiyyətdə təşviş yaratmaq istəyirlər”
Məsələyə münasibət bildirən “SƏS” Media Qrupunun rəhbəri, politoloq Bəhruz Quliyev bütün bunlara bir neçə aspektdən yanaşdı: “Sosial şəbəkələrdə yayılan məlumatlar bəzən həqiqətə uyğun olmur və ya həqiqəti tam əks etdirmir. Buna səbəb onların ciddi informasiya resursu olmamasıdır. Sosial şəbəkələrdə hərə öz eşitdiyini bir formada ictimailəşdirir. Bəzi radikal qruplar isə müxtəlif vaxtlarda bu cür dezinformasiyaları yayıb manipulyasiya edirlər. Onlar bu minvalla özlərinə siyasi xal toplamağa çalışırlar. Ancaq anlamaq istəmirlər ki, yalan məlumatların faydası olmayacaq. Radikal qruplar bu cür informasiya yaymaqla hakimiyyəti gözdən salmağa, hakimiyyətə olan etimadı azaltmağa, əhali arasında münaqişə və gərginlik yaratmağa çalışırlar. Onlar bilirlər ki, hərbi məzmunlu məlumatlar ictimayətdə həssas qarşılanır. O üzdən, bundan öz çirkin məqsədləri üçün sui-istifadə etməyə cəhd edirlər. Bəzi hallarda hərbi əhəmiyyətli yalan informasiyalar da yayılır. Nəzərə almaq lazımdır ki, Media Haqqında Qanunda da, Konstitusiyamızda da hərbi sirr olan informasiyalar yalnız müəyyən göstərişlə qurumun özü tərəfindən ilk öncə yayımlanmalıdır. Bu cür “müharibə olacaq, şiddətli döyüşlər gedir, çox sayda itkilər var” tipli informasiyalar cəmiyyətimizdə təşviş və narahatlıq yaradır. Bununla cəmiyyətdə təşviş yaratmaq istəyirlər. Belə hallara qarşı mübarizə aparılmalıdır”.
Politoloq onu da əlavə etdi ki, belə əsası olmayan məlumatların geniş yayılmasına imkan vermək olmaz.
Vidadi ORDAHALLI
