Azərbaycan dövləti fasiləsiz olaraq Birinci və İkinci Qarabağ müharibəsi əlillərinə, şəhid ailələrinə diqqət və qayğı göstərir. Bu gün Birinci Qarabağ müharibəsi əlillərinə xüsusi dövlət qayğısının göstərilməsi onu deməyə əsas verir ki, heç kəs unudulmur, yaddan çıxmır, dövlət həm Birinci, həm də İkinci Qarabağ müharibəsi əlillərinə qayğı göstərir, dəstək verir.
Bu sahədə dövlətin siyasəti fasiləsiz olaraq gedir. Amma bəzi radikal dairələr dövlətin qayğı siyasətini qaralamağa və ictimai rəyi çaşdırmağa çalışırlar. Belə yanlış rəy yaratmağa çalışırlar ki, guya Birinci Qarabağ müharibəsi əlillərinə dövlətin heç bir qayğısı yoxdur.
Dövlətin bu cür dəstək hərəkətləri, sosial müdafiə və təminat addımları, birdəfəlik yardımlar, ödəmələr radikal dairələrin əks təbliğatını zərərsizləşdirməkdə necə rol oynayır?
“Bu qəbildən olan şəxslərin dövlət qayğısı ilə mütəmadi olaraq əhatə olunması o qüvvələrə layiqli cavabdır”
“Xocalı Soyqırımını Tanıtma” ictimai birliyinin sədri Şamil Ələkbərli “Bakı-Xəbər”ə bildirdi ki, Azərbaycan dövləti, Azərbaycan Prezidenti hər zaman həm Birinci, həm də İkinci Qarabağ müharibəsi əlillərinə, veteranlara, şəhid ailələrinə böyük qayğı və diqqət göstərir. O qeyd etdi ki, dövlət heç zaman Birinci Qarabağ müharibəsi iştirakçılarını, əlillərini unutmur: “İkinci Vətən müharibəsi sübut etdi ki, xalq, dövlət, ordu, diaspor fəallarının birliyi, dövlətin vahid halda fəaliyyət göstərməsi qələbə ilə nəticələndi. 30-35 il bundan əvvəl Qarabağ hadisəsi başladı. O dövrdə erməni lobbisi çox aktiv idi və bütün dünyada öz sözünü deyə bilirdi, Azərbaycan isə haqq səsini dünyaya çatdıra bilmirdi. Xocalı soyqırımı baş verdi, Şuşa, Laçın və digər torpaqlarımız əldən getdi. O zaman vahid komandanlığın olmaması, ordunun mütəşəkkil olmaması, yeni qurulması, siyasi oyunlara getməsi başımıza o bəlaları gətirdi...Həmişə demişəm, yenə də deyirəm ki, dövlət başçısının ətrafında sıx birləşmək lazımdır. Çünki Azərbaycanı istəməyən qüvvələr, dövlətlər çoxdur. Elə bilirsiz ki, bizim 44 günlük müharibədə qazandığımız qələbəni həzm edirlər? Qələbəmizi qonşu dövlətlər bu gün də həzm etmirlər. Bu baxımdan, xaricdə və başqa yerdə əyləşib dövlətin qazilərə, müharibə əlillərinə göstərdiyi qayğıya kölgə salmağa çalışırlar. Bu yolverilməzdir. Qeyd etdiyim kimi dövlət hər cür qayğı göstərir, bunu görməmək mümkün deyil. Dövlət başçısı öz imkanları daxilində nə lazımdırsa hamısını edir və bunu görmək lazımdır. Dövlətin həyata keçirdiyi sosial təminat və qayğı siyasəti radikal qüvvələrin cəhdlərini heçə endirir. Bu qəbildən olan şəxslərin dövlət qayğısı ilə mütəmadi olaraq əhatə olunması o qüvvələrə layiqli cavabdır”. Ş.Ələkbərov qeyd etdi ki, kimin nə etməsindən, əks təbliğat aparmasından asılı olmayaraq ölkəmizdə şəhid ailələri, qazilər, müharibə əlilləri, əhalinin aztəminatlı təbəqələri Prezident İlham Əliyevin diqqətindədir. “Mən müharibə verteranıyam. Birinci Qarabağ müharibəsində könüllü iştirak etmişəm. Həmişə də dövlətin yanında olmuşam. Qazilərə, əlillərə gsötərdiyi qayğıya görə cənab Prezidentə təşəkkür edirəm”.
Müsahibimiz vurğuladı ki, bundan sonra Azərbaycan dövləti, Azərbaycan Prezidenti daha böyük uğurlara imza atacaq.
İradə SARIYEVA
