Ermənistanın iqtisadiyyat naziri Vaan Kerobyandan gözlənilməz açıqlama gəlib. O, Azərbaycanla dəmir yolu əlaqəsinin bərpasından danışaraq, dəmir yolu əlaqəsi olmadan inkişaf etmiş sənayenin mümkün olmadığını bəyan edib.
Bu barədə o, yerli telekanallardan birinə müsahibəsində bildirib. Nazir yaxın vaxtlarda Türkiyə ilə yüklərin hava yolu ilə daşınmasına başlanılacağını da deyib. Kerobyan deyib ki, Ermənistan-Türkiyə sərhədi açılsa, Ermənistan cəmi iki-üç il ərzində 30 faizlik iqtisadi artıma nail ola bilər. Onun fikrincə, bunu bir sıra beynəlxalq araşdırmalar sübut edir. Nazir vurğulayıb ki, Türkiyə vətəndaşlarının Ermənistana investisiya qoymasına heç vaxt qadağa qoyulmayıb. Ancaq eyni şeyi Ermənistan vətəndaşları haqqında demək olmaz: “Türkiyə bazarı Ermənistan vətəndaşları və biznesləri üçün bağlıdır. Sərhədlərin açılması bizə hələ də sərbəst şəkildə sərmayə qoya bilən Türkiyə vətəndaşlarından və bizneslərindən daha çox imkanlar verir”.
Dəmir yolu rabitəsi olmadan inkişaf etmiş sənayenin olması mümkün deyil, deyən nazir Azərbaycanla dəmir yolu əlaqəsinin bərpasından danışıb: “Və bu yolla Ermənistan Rusiya, İran, Mərkəzi Asiya ilə dəmir yolu əlaqəsi əldə edəcək. Ermənistan tərəfi Azərbaycanla dəmir yolu əlaqəsini bərpa etmək üçün təxminən 200 milyon dollar xərcləməlidir. Əgər Azərbaycanla azad ticarət rejimi qurularsa, bu, nəinki Ermənistanın biznesinə və vətəndaşlarına zərər verməyəcək, həm də daha böyük bazarlara çıxmağa kömək edəcək”.
Görünən odur ki, Ermənistan hakimiyyətində Azərbaycanla dəmir yolu əlaqəsinin tez bir zamanda bərpa olunmasında maraqlı olan rəsmilər var. Ümumən, bütün bu deyilənləri ekspertlər necə dəyərləndirir?
“İqtisadiyyat nazirinin son açıqlaması ondan xəbər verir ki, rəsmi İrəvan revanşist meyllərdən əl çəkib”
Məsələyə münasibət bildirən millət vəkili Vüqar Bayramovun fikrincə, Azərbaycan və Ermənistan arasında kommunikasiya əlaqələrinin bərpasından region qazanacaq: “Çünki bu, regionda dayanıqlı sülhün formalaşmasına imkan verəcək. Eyni zamanda, şərait yaradacaq ki, region ölkələri dəmir yolu xəttindən faydalana bilsinlər. Əslində Ermənistan iqtisadiyyatı üçün sözügedən kommunikasiyalar vacib əhəmiyyət kəsb edir. Çünki Ermənistan Azərbaycandan keçən dəmir yolu vasitəsilə ixrac-idxal əməliyyatları həyata keçirəcək. Bunun sayəsində Ermənistanın daşıma xərcləri əhəmiyyətli dərəcədə azalacaq. İqtisadiyyat naziri Vaan Kerobyanın son açıqlaması ondan xəbər verir ki, rəsmi İrəvan revanşist meyllərdən əl çəkib. Bu isə o deməkdir ki, qarşı tərəf daha konkret və praqmatik layihələrin reallaşmasına dəstək olmalıdır. Bu, həm də regionda sülhün formalaşması baxımından vacibdir. Bölgənin iqtisadi inkişafına xüsusi bir töhvə verəcək. Dəmir yolunun açılması sayəsində Ermənistan iqtisadiyyatın tənəzzülünü önləyə bilər. Bu, yeganə yollardan biridir. Bu isə o deməkdir ki, Ermənistan gələcəkdə öz iqtisadiyyatını qurmaq və inkişaf etdirmək istəyirsə, birmənalı şəkildə kommunikasiyaların bərpasında və o cümlədən dəmir yolunun açılmasında maraqlı olmalıdır”.
Millət vəkili hesab edir ki, Azərbaycansız Ermənistan üçün digər əlverişli alternativ mövcud deyil.
Vidadi ORDAHALLI
