İslam həmrəyliyindən dəm vuran İran Ermənistanla dini müzakirələr aparacaq. Belə ki, Ermənistanda İran və Eçmiədzin (Üç müəzzin-red) kilsəsi arasında dini mövzuda müzakirələr keçiriləcək.
Bu barədə İran mediası məlumat yayıb. İranın Ermənistandakı mədəniyyət müşaviri Seyid Hüseyn Təbatəbayi İrəvandakı Göy məscidin imam-cüməsi Fəllahzadə ilə birlikdə Eçmiədzin kilsəsinin beynəlxalq məsələlər şöbəsinin müdiri yepiskop Natan ilə görüşüb. Görüş zamanı İran İslam Respublikası və Eçmiədzin kilsəsi arasında dini danışıqların birinci mərhələsinin Ermənistanda keçirilməsi ilə bağlı razılığa gəlinib. Təbatəbayi bu barədə deyib: “Hazırkı vaxtda İran və Eçmiədzin kilsəsi arasında dini müzakirələrə başlamaq çox əhəmiyyətlidir. Bunun üçün ən yaxşı vaxt olaraq sentyabr ayı təklif edilib və çalışacağıq ki, İran nümayəndə heyəti ən yüksək səviyyədə danışıqlara qatılmaq üçün Ermənistana səfər etsin”.
İranın mədəniyyət müşaviri sonda qeyd edib ki, bu müzakirələr davamlı olacaq və danışıqların növbəti mərhələsi İranda təşkil ediləcək.
Hər zaman İslam həmrəyliyindən dəm vuran İranın Azərbaycanın müsəlman əhalisinə qarşı soyqrım törətmiş, onları 30 il öz doğma torpaqlarından didərgin salmış işğalçı Ermənistanla hansı dini məsələləri müzakirə edəcəyi və israrla bu cür dost-qardaş münasibətlər qurması sual doğurur. Ən başlıcası isə, İrəvandakı Göy məscidin İrana nə dəxli var? Çünki o, Azərbaycan türklərinin məscididir, fars məscidi deyil ki, onunla bağlı İranla hər hansı danışıqlar aparılsın. Məgər dünya ölkələrində bütün məscidlər üçün cavabdeh olan İrandır?
“İranın İrəvandakı Göy məscidlə bağlı siyasəti bizim kimliyimizə qarşı yönəlib”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, bütün bunlar İranın növbəti riyakarlığıdır: “Məsələ ondadır ki, Ermənistanla yanaşı İran da uzun illərdir Azərbaycana qarşı düşmənçilik mövqeyi sərgiləyir. Rəsmi Tehran bununla həm dini, həm də dövlətçilik baxımından riyakarlıq edir. İran Qarabağ məsələsində uzun illərdir ədalətli mövqedə durmur. İstər Birinci, istərsə də İkinci Qarabağ müharibələrində Ermənistana kömək edib. Hərbi yardımdan tutmuş bütün köməklikləri göstərib. İran hələ də indiki Azərbaycan dövlətini özünün tərkib hissəsi hesab edir. İrəvandakı Göy məscidin İrana heç bir aidiyyəti yoxdur. Məsələ ondadır ki, Göy məscid tikiləndə indiki İran ərazisinə Azərbaycan türkü nəzarət edirdi. Dini baxımdan İran yenə riyakarlıq edir. Ona görə ki, ermənilərin bizim müqəddəs yerlərimizə münasibəti bəllidir. Ermənistan Azərbaycan ərazilərini işğal altında saxladığı dönəmlərdə 67 məsciddən 65-ni dağıdıb. Məsciddə donuz bağlayıb. Bunun necə böyük təhqiramiz hərəkət olduğunu izah etməyə ehtiyac yoxdu. Yaxşı olardı ki, İran buna etiraz edəydi. Ancaq İran bunu görməzdən gəlib. Ona görə də din məsələsində İran səmimi deyil. Dindən fars şovinizmi üçün sui-istifadə, bir vasitə kimi istifadə edir. İran dini qorusaydı Ermənistana qarşı ciddi etiraz edərdi. Ermənistan son vaxtlar mövqelərini möhkəmləndirmək istəyir və buna sahiblik edən də İrandır. İranın İrəvandakı Göy məscidlə bağlı siyasəti bizim kimliyimizə qarşı yönəlib. İran bununla bizim kimliyimizi silmək istəyir. Göstərmək istəyir ki, guya Göy məscid İranın olub. Ancaq orada ömür boyu Azərbaycan türkləri yaşayıb. Bunun İrana heç bir dəxli yoxdur. Bununla İran həm də Ermənistanda gündəmə nəyisə gətirmək istəyir. Çünki Ermənistan gündəmi boşdur”.
Bir sözlə, partiya sədri hesab edir ki, bütün bunlardan Azərbaycan ciddi nəticə çıxarmalıdır.
Vidadi ORDAHALLI
