Son vaxtlar bəzi Rusiya media orqanlarında Azərbaycanla bağlı həqiqətə uyğun olmayan məlumatlar yayılır. O cümlədən, Ukrayna müharibəsi ilə bağlı uydurma xarakterli versiyalar ortaya atılır. Azərbaycan Ukrayna tərəfdən müharibəyə cəlb olunur.
Qeyd edilir ki, guya formal olaraq neytral statusda olan Azərbaycan CIHAZ Sənaye Birliyi vasitəsilə Ukraynanı aviabombalarla təmin edib: “Bu şirkətə faktiki olaraq Azərbaycan Müdafiə Sənayesi Nazirliyi nəzarət edir. O, Ukrayna dövlət şirkəti “Ukrspetsexport” üçün aviabombalar göndərib. Aprel ayı ərzində Polşa vasitəsilə Ukraynaya sursat çatdırılıb. Çatdırılma Ukraynanın "Meridian" aviaşirkəti tərəfindən daha sonra Ukraynaya köçürmək üçün Polşanın məşhur Rzeşov hava limanına aparılıb. Jurnalistlərin araşdırması göstərdi ki, çatdırılma çoxmərhələli və gizli olub. Əvvəlcə bombalar Sudana çatdırıldı, oradan Ukrayna təyyarəsi onları Rzeşova daşıdı, sonra silahlar Nezalejnaya çatdırıldı. Təkcə aprel ayında səkkiz belə uçuş həyata keçirilib”.
İddia edilir ki, guya sözügedən aviabombalar Su-25 hücum təyyarələrinin istifadəsi üçün uyğunlaşdırılıb, Bayraktar TB2 PUA-larında da istifadə oluna bilər: “Beləliklə, Bakı (və müəyyən qədər Ankara) Ukrayna münaqişəsində iştirak edən tərəflərə rəsmi neytrallıq nümayiş etdirmələrinə baxmayaraq, ukraynalı nasistlərin yüksək dəqiqlikli bombalarla təmin edilməsində birbaşa iştirak edirdi. Eyni zamanda, Kiyev rejimi Azərbaycandan başqa dəstək də alır - yanacaq-sürtkü materiallarının tədarükündən tutmuş muzdluların daşınmasına qədər”.
Görünən odur ki, rus mediası Azərbaycanı Rusiya-Ukrayna müharibəsinə cəlb etməyə çalışır. Bununla bağlı təsəvvürə gəlməyən versiyalar ortaya atılır.
“Bu kimi dezinformasiyaların yayılmasında onların xüsusi rolu var”
Məsələyə münasibət bildirən media eksperti Yadigar Məmmədli hesab edir ki, müəyyən media resursları Rusiya-Azərbaycan münasibətlərini pozmaqdan ötrü məqsədyönlü şəkildə belə informasiyaları yayır: “Məsələ ondadır ki, son illər Azərbaycanla Rusiya arasında münasibətlər müxtəlif sferalarda inkişaf edir. Ölkələr arasında ticarət əlaqələri genişlənir, müxtəlif sahələrdə birgə əməkdaşlıq var. Bu ilin fevralında iki ölkə arasında müttəfiqlik haqqında bəyannamə imzalanıb. Ancaq Rusiyada Azərbaycana qarşı olan dairələrə məxsus media resursları tərəflər arasında münasiibətləri gərginləşdirmək üçün müxtəlif uydurma xarakterli yazılar dərc edirlər. Bir ara əsas diqqət ona yönəldilirdi ki, guya Azərbaycanda ABŞ-a məxsus biolaboratoriyalar fəaliyyət göstərir. İndi də Azərbaycanı Ukrayna tərəfdən müharibəyə sürükləmək istəyirlər. Guya Azərbaycan Ukraynanı aviabombalarla təmin edir. Bu mümkün olan iş deyil. Əvvəla, Azərbaycan Ukrayna ilə quru sərhədinə malik deyil. Digər tərəfdən, Azərbaycan balaca ölkədir. Hansısa üçüncü ölkə vasitəsilə belə bir iş görülsə, bunu gizlətmək mümkün olmayacaq. Rusiyanın kosmik imkanları asanlıqla bu yöndə hava daşımalarını izləmək imkanına malikdir. Ən nəhayət, Azərbaycan heç vaxt buna getməz. Ona görə ki, bu, Rusiya tərəfindən sərt qarşılanacaq və bu da iki ölkə münasibətlərinin kəskinləşməsinə yol açacaq. Biz nəzərə almalıyıq ki, Rusiyanın media resurslarında çoxsaylı erməni mənşəli şəxslər var. Bu kimi dezinformasiyaların yayılmasında onların xüsusi rolu var. Azərbaycan birmənalı olaraq Ukraynanın ərazi bütövlüyünü dəstəkləyir”.
Media ekspertinin fikrincə, ancaq bu o demək deyil ki, Azərbaycan Ukraynaya hərbi yardım edir.
Vidadi ORDAHALLI
