“Ermənistanın mədən tullantılarını Araz çayına axıtması nəticəsində yaratdığı çirklənməyə nəzarət etmək üçün əsaslı tədbirlər görəcəyini gözləyirik”. “Report”un məlumatına görə, bunu İranın Şərqi Azərbaycan əyalətinin valisi Abidin Xürrəm Ermənistanın Tehrandakı səfiri Arsen Avakyanla Təbrizdə keçirdiyi görüşdə deyib.
Səfir Arsen Avakyan Şərqi Azərbaycan valisi Abidin Xürrəmi və yerli iş adamlarını Ermənistanın Qərbi Zəngəzur vilayətinə dəvət etməklə yanaşı, ticarət və iqtisadi əlaqələri gücləndirməyə çağırıb.
Səfir iddia edərək bildirib ki, Araz çayı İran və Ermənistan üçün xüsusi əhəmiyyət daşıyır: “Ekoloji problemləri aradan qaldırmaq, lazımı tədbirlər görmək üçün Ermənistandakı mədənlərdən biri bağlanıb”. O, İranın ölkəsi ilə qonşu əyalətlərinin Ermənistan üçün xüsusi əhəmiyyət daşıdığını vurğulayaraq, Təbrizdə İrəvanın konsulluğunun açılmasına şərait yaradılmasını istəyib.
Məlumdur ki, Ermənistanın Qərbi Zəngəzurda mis-molibden zavodu var. Bu sənaye müəssisəsi istehsal tullantılarını 30 ildən çoxdur Araza axıdır. Azərbaycan, Türkiyə, İran, habelə beynəlxalq ekoloqlar Ermənistanın çayı çirkləndirməsinə onillərdir etiraz etsə də, indiyədək rəsmi İrəvan bu etirazlara məhəl qoymur, Araz çayını çirkləndirməyə davam edir.
Əvvəllər Azərbaycan və Türkiyə Ermənistanın Araz çayını zəhərlədiyi barədə narahatlığını bildirsə də, bu ölkəni prosesi dayandırmağa çağırsa da, rəsmi İrəvan buna səssiz qalırdı. Artıq İran tərəfi də Ermənistanın Araz çayını çirkəndirdiyini təsdiqləyir və bundan narahat olduğunu bəyan edir. Bildirilir ki, Ermənistanın mədən tullantıları bütün bölgə üçün təhlükəlidir və Ermənistan bu terroru dayandırmalıdır.
“Ermənistanın mədən tullantılarını Araz çayına axıtması səbəbindən ciddi ekoloji böhran yaranıb”
Müasir İnkişaf Birliyinin sədri, siyasi şərhçi Mübariz Göyüşlü bizimlə söhbətində bildirdi ki, bu çox aktual məsələdir və bölgə dövlətləri birləşib Ermənistanı dayandırmalıdır, əks halda bu ölkə öz cinayətlərini davam etdirəcək: “Hesab edirəm ki, Ermənistanın Araz çayını çirkləndirməsi ilə bağlı məsələdə İran tərəfin də hərəkətə keçməsi müsbətdir. Yəni Azərbaycan dəfələrlə Ermənistanın Araz çayını çirkləndirməsini bu ölkənin özünün, beynəlxalq qurumların, xarici ölkə rəhbərlərinin diqqətinə çatdırıb, həyəcan təbili çalıb. Bu gün də daim bu məsələni gündəmdə saxlayır. Amma təəssüf ki, nə Ermənistan bu məsələlərə əhəmiyyət verir, nə də dünyanın aidiyyəti nüfuzlu beynəlxalq təşkilatları, dövlətləri Ermənistanın bu davranışına reaksiya verib onu dayandırırlar. Fikrimcə, İranın Ermənistana bu iradı, etirazı bu terrorun qarşısının alınmasına bir təkan ola bilər. İran bölgənin güclü dövlətlərindən biridir və Ermənistan üzərində çox ciddi təsiri var. Ona görə də, Ermənistanın bu məsəyə tam diqqətsiz qalacağına inanmıram. Araz çayı məsələsi Azərbaycan üçün önəmli olduğu qədər İran üçün də önəmlidir, önəmli də olmalıdır. Ermənistanın mədən tullantılarını Araz çayına axıtması səbəbindən ciddi ekoloji böhran yaranıb. Arazın suyundan hansısa formada istifadənin təhlükəsi artır. Ermənistanın bu terrorundan yalnız Azərbaycan əziyyət çəkmir, İrana da bu təsirsiz ötüşmür. Fikrimcə, gələcək prespektivdə Azərbaycanla İran Ermənistanın Araz çayında törətdiyi ekoloji terrora qarşı səylərini birləşdirməliditr. Çünki bu Ermənista birgə təzyiq imkanlarını artırır”.
M.Göyüşlü hesab edir ki, yalnız Araz çayı ilə bağlı məsələdə deyil, digər ekoloji təhlükə yaradan hallarda da İran və Azərbaycan birgə mübarizə aparmalıdır. M.Göyüşlünün sözlərinə görə, Ermənistanın törətdiyi ekoloji su terrorundan İran özü də əziyyət çəkməmiş deyil. Ermənistanın Metsamor AES-i bütün region üçün təhlükəlidir, bu səbəbdən də Azərbaycan, İran, Türkiyə və Gürcüstan birləşib AES-in fəaliyyətini dayandırması üçün Ermənistanın qarşısına tələb qoya, birgə dünyaya çağırış edə bilərlər. M.Göyüşlü hesab edir ki, Ermənistanla mübarizədə nə lazımdırsa edilməlidir: “Bu ölkəyə qarşı birgə mübarizə aparılmalıdır. Ermənsitanın Araz çayında törətdiyi terror aktına dünya biganə qalmamalıdır”.
İradə SARIYEVA
