Azərbaycanın işğaldan azad etdiyi rayonlarda həyat canlanır və insan sevincinə qanad verən hadisələr baş verir. Azad edilmiş ərazilərimizdə tədbirlər, yığıncaqlar, festivallar keçirilməsi ənənələrinin artıq əsası qoyulub. Azərbaycanın Mədəniyyət Paytaxtı Şuşada keçirilən elmi-kütləvi, mədəniyyət, elm, təhsil tədbirləri, festivalları dediklərimizə əyani misaldır.
Şuşa düşmən işğalından azad edildikdən sonra bu tarixi şəhərimiz, mədəniyyət beşiyimiz yenidən Azərbaycan mədəniyyətinin, elminin təbliğ edilidiyi bir məkana çevirildi... Bu şəhərimiz dünyanın diqqətində olan tarixi, mədəni, elmi, strateji bir mərkəzdir ki, burada keçirilən hər bir yığıncaq, tədbir, festival, poeziya günləri dünyaya bir mesajdır. Şuşa azad edildikdən indiyə qədər burda keçirilən müxtəlif tədbirlər çərçivəsində dünyanın çox yerindən ədəbiyyat, mədəniyyət, incəsənət, musiqi, elm xadimləri, siyasətçilər, ictimai xadimlər, xarici təşkilat rəhbərləri bu füsunkar şəhərimizə qonaq gəlib.
Azad ərazilərimizdə bayram tədbirləri...
Prezident İlham Əliyev Şuşa şəhərini Azərbaycan mədəniyyətinin paytaxtı elan edərək “Şuşa şəhəri buna layiqdir. Hesab edirəm ki, nəinki Azərbaycanın, bölgənin mədəni paytaxtı sayıla bilər. Şuşanın mədəni həyatı zəngin olmalıdır” bəyanatını verib. Bununla yanaşı, dövlət başçısı vaxtilə Vaqif Poeziya Günlərinin ənənəvi olaraq keçirildiyini vurğulayaraq diqqətə çatdırırdı və Şuşada Vaqif Poeziya Günlərinin, “Xarıbülbül” festivalının bərpa olunmalı olduğunu deyirdi. Prezident İlham Əliyev bildirirdi ki, Şuşanın Azərbaycan tarixində xüsusi yeri var və Şuşanın bərpası, dirçəlməsi hamımızın işidir: “Əlbəttə ki, bütün işlər planlı şəkildə aparılmalıdır, Şuşanın tarixi siması saxlanılmalıdır, Şuşaya yad olan hər hansı bir tikiliyə yol vermək olmaz”. Dövlət başçısı vurğulayırdı ki, mütəxəssislər, memarlar, tarixçilər, şuşalılar özləri deyəcəklər ki, bu şəhəri necə görmək istəyirlər, çünki bu, onların şəhəridir. Şuşanın əsl tarixi simasının və qədim mədəni abidələrinin bərpası Azərbaycan memarlıq üslubunu əks etdirməli, çox zəngin mədəni həyat olmalı və Şuşada yaşayacaq soydaşlarımız da, bütün işlər görüləndən sonra oraya qayıtmalıdırlar. Prezident İlham Əliyevin söylədiyi bu fikirlər qısa müddət keçmədən reallığa çevirildi və Şuşanın tarixi simasının qaytarılması istiqamətində işlərə başlanıldı, burada “Xarıbülbül” Beynəlxalq Folklor Festivalı da, “Vaqif Poeziya Günləri” də, Dünya Azərbaycanlılarının V Qurultayı da, daha neçə-neçə beynəlxalq səviyyəli tədbirlər keçirildi. Dünyanın bilim adamları, tarixçiləri, siyasətçiləri, sayılıb seçilən şəxsləri bir daha əmin oldular ki, Şuşa Azərbaycan şəhəridir və burada hər şey Azərbaycandır.
Xarıbülbül Qarabağın azadlıq rəmzinə çevrildi...
Məlum olduğu kimi, 2021-ci il mayın 12-13-də hər bir azərbaycanlı üçün müqəddəs məkanda, Azərbaycanın mədəniyyət paytaxtı Şuşada, bənzərsiz və füsunkar Cıdır düzündə 29 ildən sonra yenidən “Xarıbülbül” musiqi festivalı keçirildi. Vətən uğrunda canlarından keçmiş qəhrəman şəhidlərin əziz xatirəsinə həsr edilmiş möhtəşəm “Xarıbülbül” musiqi festivalı düşmənə, bu müqəddəs şəhərə yad olan ünsürlərə həm də tutarlı cavab oldu. Nəticədə, Şuşa şəhəri Azərbaycanın mədəniyyət paytaxtı, Xarıbülbül Qarabağın azadlıq rəmzinə çevrildi. Maraqlıdır ki, Şuşa azad ediləndən bəri “Xarıbülbül” festivalı da, “Vaqif Poeziya Günləri” də artıq ikinci dəfə keçirilib. Demək biz hər il ənənəvi olaraq azad edilmiş ərazilərimizdə belə möhtəşəm tədbirlərin şahidi olacağıq.
Vaqif Poeziya günləri...
2021-ci ilin yayında 39 illik tarixi olan Vaqif Poeziya Günləri 29 ildən sonra yenidən qeyd edilməklə sağlam bir ənənənin bərpa edildiyini ortaya qoydu. Bu ilin iyul ayının 14-də növbəti dəfə Vaqif Poeziya günləri keçiridi. Heydər Əliyev Fondu, Mədəniyyət Nazirliyi və Azərbaycan Yazıçılar Birliyinin (AYB) təşkilatçılığı ilə Azərbaycanın mədəniyyət paytaxtı Şuşada keçirilən Vaqif Poeziya Günləri olduqca maraqlı keçib. Şuşa işğaldan azad edildikdən sonra artıq ikinci dəfə təşkil edilən tədbir sözün həqiqi mənasında bir ədəbiyyat, şeir bayramı oldu. Mədəniyyət və incəsənət xadimlərinin, Azərbaycan Yazıçılar Birliyinin üzvlərinin, gənc yazıçılar, şairlər və qazilərin iştirak etdikləri Poeziya Günləri çərçivəsində “Qarabağ” mehmanxanasının qarşısında kitab sərgisi təşkil edildi və sözün həqiqi mənasında Şuşada həm də kitab bayramı təntənəsi yaşandı.
Məlumat üçün bildirək ki, ümummilli lideri Heydər Əliyevin iştirakı ilə 1982-ci il yanvarın 14-də Şuşada Molla Pənah Vaqifin məqbərəsinin və Poeziya Evinin təntənəli açılışı olub. Məhz bu səfər çərçivəsində ümummilli lider Heydər Əliyev Vaqif Poeziya Günlərinin keçirilməsi ilə bağlı göstəriş verilib. Müasir Azərbaycan ədəbiyyatı tarixində öz bənzərsizliyi ilə seçilən Vaqif Poeziya Günləri həmin tarixdən etibarən 1991-ci ilədək hər il şairin vətəni Qazaxdan başlayıb, Şuşanın əsrarəngiz Cıdır düzündə yekunlaşardı. Bu gün də artıq o ənənə bərpa edilib. Heç şübhəsiz ki, bu ənənələrin bərpası ölkə başçısı İlham Əliyevin və birinci xanım Mehtiban Əliyevanın təşəbbüsü, qayğısı ilə həyata keçirilib.
Mütəxəssislər bildirir ki, torpaqlarımız Ermənistanın işğalından azad olunduqdan sonra Azərbaycanın mədəni inkişafında yeni dövr başlayıb. Qeyd edilir ki, xalqımıza məxsus tarixi abidələrin bərpası, ənənəvi tədbirlərin yenidən və daha möhtəşəm qeyd olunması qayıdışımızın təntənəsidir. Zaman keçdikcə biz bu təntənənim daha yaxından şahidi olacağıq. Ümimiyyətlə, torpaqlarımız azad edildikdən sonra mədəniyyətimizin təbliğində yeni səhifə açılıb. Son illər həm azad edilən ərazilərdə, həm də başqa regionlarımızda ədəbi, mədəni, tarixi-etnoqrafik tədbirlər, festivallar keçirilir. Sonuncu festival elat-yaqlaq ənənəsini, elat-tərəkəmə həyatını, bizim etnoqrafik dünyamızı, həyatımızı əks etdirən II Yaylaq Festivalı oldu ki, buradan da xeyli zəngin təəssüratlarımız var. Bu festivalın da keçirilməsinin ən əhəmiyyətli tərəflərindən biri bizim yaylaq mədəniyyətimizə əl uzadan ermənilərə əsaslı bir cavab verməkdir. Azərbaycan dövləti, xalqı hər zaman öz mədəniyyətinə, mənəvi dəyərlərinə sahib çıxmağı bacarır və bu da bizi daha güclü və əzəmətli edir.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
