Son vaxtlar mətbuatda payızda ölkədə referendum keçiriləcəyi barədə müxtəlif iddialara rast gəlmək mümkündür. Hətta referendumun gündəliyi barədə də fikirlər səsləndirilir və bildirilir ki, guya referendum ölkə Konstitusiyasına bir sıra dəyişiliklər etmək məqsədilə keçirilir. Bu dəyişiliklər içərisində yeni parlament seçkiləri və seçki qaydalarında dəyişikliklər, proporsional seçki sisteminin tətbiqi və parlamentin say tərkibinin artırılacağı da bildirilir.
Ölkənin belə bir addım atmasına hazırda zəruri ehtiyac varmı?
Qabil Hüseynli: “Sadəcə, bu addımların atılması üçün münasib vaxt deyil”
Politoloq Qabil Hüseynli “Bakı-Xəbər”ə açıqlamasında bildirdi ki, zaman etibarı ilə belə bir addımın atılmasına lüzum görmür: “Ermənistanla sülh müqaviləsi hələ imzalanmayıb. Sərhədlərin delimitasiyası və demarkasiyası həllini tapmayıb. Ermənistanla kommunikasiyaların açılması məsələsi donmuş vəziyyətdə qalır. Xüsusilə də qarşıda məcburi köçkünlərin geri qaytarılması prosesi gözlənilir. Yanvardan ilk belə dəstələr öz yurdlarına qaytarılmağa başlayacaq. Bütün bunlar əlavə məsrəf tələb edir. Referendum və təkrar seçkilər çox böyük pul tələb edir. Mən demirəm ki, bu məsələləri ümumiyyətlə gündəlikdən çıxarmaq lazımdır. Sadəcə, bu addımların atılması üçün münasib vaxt deyil. Avropa İttifaqı ilə Azərbaycan arasında ikitərəfli müqavilənin imzalanmasına dair intensiv danışıqlar gedir və bu işin uğurlu sonuclanacağı ehtimalı çox yüksəkdir.
Azərbaycan diqtə edən tərəf olsa da, bölgədə hələ tam sabitliyə nail olunmayıb, Ermənistanda müxtəlif dövlətlərin və bəzi siyasi dairələrin qızışdırıcı fəaliyyətləri davam edir. Real görünməyən, həm də vaxtı çatmamış məsələlər ətrafında ehtirasların qızışdırılmasına heç bir ehtiyac yoxdur”.
Vüqar Bayramov: “Referendum keçiriləcəyi, eləcə də Milli Məclisin təkrarən buraxılacağı barədə məlumatlar əsassızdır və heç bir ciddi arqumentə əsaslanmır"
Millət vəkili Vüqar Bayramov da hesab edir ki, yayılan xəbərlərdə bu mövqeni gücləndirən və ya isbat edən arqumentlər göstərilmir:
"Halbuki, biz son illər struktur islahatlarının genişlənməsini müşahidə edirik. Qeyri-neft sektorunun inkişafı ilə bağlı keçirilən tədbirlərin önündə strukturun daha da təkmilləşdirilməsi durur. Azərbaycan Milli Məclisinin VI çağırışı, eyni zamanda, məclisin idarəedilməsində dəyişikliklər və parlament stukturunun yeniləşməsi ilə yadda qaldı. Aydındır ki, referendum keçiriləcəyi, eləcə də Milli Məclisin təkrarən buraxılacağı barədə əsassız məlumatların yayılması müəyyən radikal siyasi qüvvələrin maraqlarına xidmət edir. Son beynəlxalq hesabatlar da göstərir ki, Azərbaycanda dövlət idarəetməsində çeviklik artıb və fərqli dövlət qurumları bir-birinin fəaliyyətini tamamlayır, idarəetmədə səmərəlliyin daha da yüksəlməsi müşahidə olunur”.
V.Bayramovun sözlərinə görə, parlamentin uzunmüddətli fəaliyyəti göstərir ki, Milli Məclisin mövcud say tərkibi və stukturu səmərəli idarəetmə üçün məqbuldur:
“Digər tərəfdən, xüsusən son çağırışdan sonra Milli Məclisdə islahatların genişlənməsi müşahidə olunur. Statistika göstərir ki, qanunvericilik təşəbbüslərində, qanun layihələrinin müzakirəsində intensivlik daha da artıb və deputat fəallığının yüksəlməsi qeydə alınıb. Biz mütəmadi olaraq öz dairəmizdə vətəndaşlarla görüşüb, onları qayğılandıran məsələləri mərkəzi idarəetmə orqanlarına təqdim edirik, mətbuatda gündəmə gətiririk. Vətən müharibəsi və pandemiya dövründə millət vəkili kimi fəallığı artırmağa çalışmağımız da məhz Milli Məclis qarşısında müəyyənləşdirilən yeni hədəflərin nəticəsidir. Bu baxımdan, konstitusiyaya dəyişiklik edilməsi üçün referendum keçiriləcəyi, eləcə də Milli Məclisin təkrarən buraxılacağı barədə məlumatlar əsassızdır və heç bir ciddi arqumentə əsaslanmır".
Məhəmmədəli QƏRİBLİ
