Xaçmaz rayonunda yerləşən “Starıy dvor” restoranında deputat Eldəniz Səlimovun polisi döyməsi iddiası ilə əlaqədar cinayət işi başlanıb. Bu barədə Baş Prokurorluğun mətbuat xidmətindən məlumat verilib.
Məlumatda bildirilir ki, deputatın iyulun 29-da gecə saat 01.00 radələrində restoranda xidməti vəzifəsini icra edən polis əməkdaşına zor tətbiq etməsi barədə Daxili İşlər Nazirliyindən Baş Prokurorluğa material daxil olub. Həmin material araşdırılıb və Cinayət Məcəlləsinin 309.2-ci (vəzifə səlahiyyətlərini aşma) maddəsi ilə cinayət işi başlanıb: “İstintaqın aparılması Baş Prokurorluğun İstintaq İdarəsinə tapşırılıb. Hazırda iş üzrə intensiv istintaq hərəkətləri aparılır. İstintaqın gedişatı barədə ictimaiyyətə əlavə məlumat veriləcək”.
Daxili İşlər Nazirliyi deputatın vurduğu iddia olunan polis əməkdaşının kimliyini də açıqlayıb. Nazirliyin mətbuat xidmətindən bildirilib ki, deputat E.Səlimov Xaçmaz Rayon Qeydiyyat və Şəxsiyyət Vəsiqəsi Şöbəsinin əməkdaşı Zaur Mirzəyevə xəsarət yetirib.
Nazirlik bildirir ki, hadisə zamanı deputat sərxoş vəziyyətdə olub. O, karantin rejimi qaydalarını da pozub. Məlumatda o da qeyd olunur ki, hadisənin baş verdiyi restoran E.Səlimovun qohumuna məxsusdur: “Gecə saat 12-dən sonra polis əməkdaşları karantin rejimi qaydalarına uyğun olaraq obyektin bağlanmasını tələb ediblər. Eldəniz Səlimov buna etiraz edərək münaqişə yaradıb”.
45 yaşlı E.Səlimov 2010-cu ildən Milli Məclisin deputatıdır. O, hazırda 55 saylı Xaçmaz şəhər seçki dairəsindən Yeni Azərbaycan Partiyasının deputatı kimi parlamentdə təmsil olunur. E.Səlimovun adı bundan əvvəl də Xaçmazda ağacların kəsilməsi ilə bağlı qalmaqalda hallanmışdı. Prokurorluqda cinayət işi qaldırılması hələ ki deputatın cinayət məsuliyyətinə cəlb olunması demək deyil. Çünki onun toxunulmazlıq statusu var. Bəs bu məsələ qanunvericiliklə necə tənzimlənə bilər?
Məsələ ilə bağlı açıqlama verən Milli Məclisin İntizam Komissiyasının sədri Eldar İbrahimov bildirib ki, bunun onlara aidiyyəti yoxdur: “Mənim hadisədən xəbərim yoxdur. Bu barədə İntizam Komissiyasına məlumat daxil olmayıb. İntizam Komissiyası parlamentdaxilidir. Hansısa deputat harada kiminlə savaşır, barışır, güləşir onun öz işidir. Mənim xəbərim yoxdur. Axı bu məsələnin İntizam Komissiyasına aidiyyəti yoxdur. Məsələ bizə gələrsə, araşdırıb fikrimizi deyərik. Vəssalam”.
Maraqlı olan başqa bir detal isə işdə Xaçmazın sabiq icra başçısı Şəmsəddin Xanbabayevin Mənsur adlı sürücüsünün adının hallanması və bu hadisəyə görə həbs edilməsidir. Bildirilir ki, baş verən insidentə görə iki nəfər saxlanılıb. Saxlanılan digər şəxs isə Xaçmazda “Zapçast Ənvər” kimi tanınan iş adamıdır.
Şəmsəddin Xanbabayev mediaya açıqlamasında sürücüsünün hadisə vaxtı deputatla birlikdə həmin restoranda olduğunu təsdiqləyib: “Deputatın maşını olmayıb, mənim maşınımda gedib. Amma bu maşın xidməti avtomobil deyil. Şəxsi maşındır. Amma sürücümün hadisədə iştirak edib-etmədiyini bilmirəm. O restoran da burada, yaxınlıqdadır. İcra başçısı olanda samovar tikmişəm ha, bax onun yanında. Bəli, olub orada hadisə. Amma sürücünü tapa bilmirəm ki, həqiqəti öyrənib sizə deyim”.
Ş.Xanbabayev sürücüsünün də deputatla birlikdə polisi vurduğu haqda iddialara inanmadığını deyir: “O, 30 ildir mənim yanımda işləyir. İnandırıram sizi ki, elə adam deyil. İndi saxlayıblarsa, yəqin araşdırıb həqiqəti üzə çıxararlar. Amma yenə də deyirəm ki, o, davakar adam deyil. Sadəcə deputat restorana mənim maşınımda gedib”.
Eldəniz Səlimovun məsələsilə bağlı parlamentin növbədənkənar iclasının çağırılacağı bildirilir. Onunla bağlı məsələ İntizam Komissiyasında müzakirə oluna bilərmi və sonrakı hüquqi prosedurlar hansı ardıcıllıqla aparılacaq?
Azərbaycan Vəkillər Kollegiyasının üzvü, hüquqşünas Mehman Muradlı “Bakı-Xəbər”ə açıqlamasında bildirdi ki, “Milli Məclis deputatının statusu haqqında” Qanunun 12-ci maddəsinə əsasən, deputatın toxunulmazlıq hüququ var: “Həmin maddədə deyilir ki, Azərbaycan Konstitusiyasının 90-cı maddəsinə görə, deputatın şəxsiyyəti toxunulmazdır. Sözügedən maddəyə əsasən, deputatın toxunulmazlığı onun evinin, mənzilinin, əşyalarının, şəxsi və xidməti nəqliyyat vasitələrinin, istifadə etdiyi rabitə vasitələrinin, ona məxsus sənədlərin, yazışmaların toxunulmazlığını da əhatə edir. Bildirilir ki, deputatın toxunulmazlığına Azərbaycan Konstitusiyasının 90-cı maddələrində nəzərdə tutulmuş hallarda və Milli Məclisin Daxili Nizamnaməsində müəyyən edilmiş qaydada xitam verilir”.
Bəs Azərbaycan Konstitusiyasının 90-cı maddəsi bu barədə nə deyir?
Vəkilin sözlərinə görə, Konstitusiyanın həmin maddəsinin I hissəsində bildirilir ki, səlahiyyət müddəti ərzində Milli Məclisin deputatının şəxsiyyəti toxunulmazdır: “Milli Məclisin deputatı səlahiyyət müddəti ərzində cinayət başında yaxalanma hallarından başqa, cinayət məsuliyyətinə cəlb edilə bilməz, tutula bilməz, onun barəsində məhkəmə qaydasında inzibati tənbeh tədbirləri tətbiq edilə bilməz, axtarışa məruz qala bilməz, şəxsi müayinə edilə bilməz. 90-cı maddənin II hissəsinə əsasən, deputatın toxunulmazlığına aşağıdakı halda xitam verilə bilər. Milli Məclisin deputatı cinayət başında yaxalanarsa, tutula bilər. Belə olduqda Milli Məclisin deputatını tutan orqan bu barədə dərhal Azərbaycan Respublikasının Baş prokuroruna xəbər verməlidir. Millət vəkilinin toxunulmazlığına yalnız Azərbaycan Respublikası Baş prokurorunun təqdimatına əsasən Milli Məclisin qərarı ilə xitam verilə bilər”.
Milli Məclis deputatın toxunulmazlığına necə xitam verə bilər?
Mehman Muradlının sözlərinə görə, Milli Məclisin Daxili Nizamnaməsinin 22-ci maddəsi deputatın toxunulmazlığına xitam verilməsi qaydasını müəyyənləşdirir: “Konstitusiyanın 90-cı maddəsinin II hissəsinə görə, Milli Məclisin deputatının toxunulmazlığına yalnız Azərbaycan Respublikası Baş prokurorunun təqdimatına əsasən Milli Məclisin qərarı ilə xitam verilə bilər. Bu barədə təqdimata Milli Məclis onun daxil olduğu vaxtdan 7 gün müddətində baxır. Milli Məclisin sədri, bir qayda olaraq, deputat haqqında təqdimatı əvvəlcə parlamentin İntizam Komissiyasına göndərir və komissiyada bu məsələyə baxılır. Komissiya təqdimata dair rəy qəbul edir. Rəydə deputat toxunulmazlığına xitam verilib-verilməməsi barədə İntizam komissiyasının qənaəti söylənilir”.
Hüquqşünas qeyd edir ki, nizamnamənin müvafiq maddəsinə əsasən, Milli Məclis bu barədə məsələlərə, bir qayda olaraq, deputat toxunulmazlığına xitam verilməsi barədə təqdimat olan deputatın iştirakı ilə baxır: “Bu məsələ Milli Məclisin iclasında müzakirə edilərkən deputatın ittiham edildiyi cinayətdə təqsirli olub-olmaması məsələsi müzakirə edilə bilməz. İclasda iştirak edən deputatlar yalnız deputat toxunulmazlığına xitam verilməsi barədə Azərbaycan Respublikası Baş prokurorunun təqdimatında kifayət qədər əsasların olub-olmamasını aydınlaşdıra bilərlər və bu məqsədlə Azərbaycan Respublikasının Baş prokuroruna suallar verə bilər, deputat toxunulmazlığına xitam verilməsinin lehinə və ya əleyhinə çıxış edə bilərlər. Milli Məclis tələb olunan səs çoxluğu ilə deputat toxunulmazlığına xitam verə bilər”.
Hüquqşünasın rəyindən belə məlum olur ki, Eldəniz Səlimovun hətta parlamentdən kənarda törətdiyi cinayət əməlinə belə İntizam Komissiyasında baxılıb rəy verilməlidir. Çünki bu, qanunvericiliyin tələbidir.
Məhəmmədəli QƏRİBLİ
