Ermənistanda İslam dinini qəbul edən ermənilərin sayının kütləviləşdiyi bildirilir. Bu barədə “Milli.az” “Sputnik Armeniya”ya istinadən məlumat verib.
“Sputnik Armeniya”da erməni köşə yazarı Artem Erkanyan İslamı qəbul edən ermənilərin sayının kəskin şəkildə artması probleminə toxunub. "Sputnik Armeniya"da dərc olunan məqaləsində yazır ki, İslamı qəbul edən ermənilər artıq buna təzyiq deyil, könüllü şəkildə müraciət etməyə başlayıblar. Erməni yazar soydaşlarını bu addımı atmağa sövq edən amillər və bunun milli təhlükəsizlik nöqteyi-nəzərdən nə qədər təhlükəli olmasını araşdırmağa çalışıb. Erməni mediasında dərc olunan məlumatlarda vurğulanır ki, son aylar Ermənistan vətəndaşlarının İslamı qəbul etmə halları artıb. Söhbət etnik, əvvəl xristianlığı qəbul edən, yaxud ateist dünyagörüşə malik ermənilərdən gedir. Yazar həftənin əvvəlində rastlaşdığı belə faktlardan birini açıqlayıb.
Sosial və çap mediasında bu günlərdə dərc olunan materiallarda bildirilir ki, müfti Salah Hacı Meciyevin xeyir-duası ilə Çeçenistan paytaxtında İrəvan sakini Robert Davtyanın İslamı qəbul etməsi ilə bağlı mərasim keçirilib. “Onun məhz bu məqsədlə Qroznıya gəldiyi bildirilir. Mərasimi Çeçenistan müsəlmanları dini idarəsinin rəis müavini Arbi Xabziyev keçirib. Erməniyə Adam adı verərək, ona müfti adından hədiyyələr təqdim edib. "İslam nyuz" nəşrinin yazdığına görə, bu mərasimə qədər məsciddə başqa bir Ermənistan vətəndaşı, 24 yaşlı Norayr Babadcanyanın İslamı qəbul etmə mərasimi keçirilib. "Arqumentı i faktı" da ilin əvvəlində İrəvandan Qroznıya gələn etnik erməninin İslamı qəbul etməsi barədə yazmışdı. Bundan əvvəl müftinin köməkçisi Musa Albiyev Aştarak şəhərindən gələn 27 yaşlı Anuşavan Harutyunyanın istəyi ilə onu müsəlman edib. Adı dəyişən erməni Məhəmməd Harutyunyan olub. Ondan əvvəl də internetdə iki çeçenlə İslamı qəbul edən və Qroznıda məskunlaşan Artur adlı erməni arasındakı qarşıdurmanı əks etdirən bir video yayılmışdı. Erməni yazar "bir sözlə, Çeçenistanda ermənilərin İslamı qəbul etməsi halları təcrid olunmaqdan uzaqdır. Ermənistan vətəndaşları xüsusi olaraq hər şeyin lazımi prosedurlardan keçmək üçün düzəldildiyi Qroznıya gəlirlər. Bütün bunlar da erməni dini rəhbərliyinin icazəsi olmadan baş verməsi mümkün deyil. Çeçenistanın mənəvi liderləri tərəfindən "erməni reneqant"lığının təşviq edilməsi həyəcan doğurmaya bilməz. Bunu səmimi bir jest adlandırmaq olmaz. Bu faktların ictimaiyyətə açıqlanması və təkrarlanması daha təəccüblüdür. Axı mövzu düzgün təhlil edilmədən mətbuatda işıqlandırılması üçün çox həssasdır” - deyə qeyd edilib…
Müəllif sonda yazır ki, "Alif TV” şəbəkə kanalında Həştərxanda İslamı qəbul edən və "Nur-İslam" adını almış keçmiş nüfuzlu kriminal avtoritet Vaçaqan Qabrielyan haqqında bir film çəkilib. “Görəsən, Robert Davtyan, Norayr Babacanyan, Anushavan Harutyunyan, Yegişe Karapetyan, Arman Jancuquzyan, Vaçagan Qabrielyan kimi insanları İslama cəlb edən nədir? Bu sual yalnız psixoloqlara və sosioloqlara deyil, inanıram ki, Apostol Kilsəsinin iyerarxlarına da yönəldilməlidir. Həqiqətən, bu şəxslərə məmləkətlərində erməni kilsələri, keşişləri, arximandritlər və yepiskoplar xidmət göstərirlər. Niyə mənəvi qida axtaran bəzi ermənilər əcdadlarının inancından daha çox yad təlimləri üstün tuturlar?"
Ermənilər hara, İslam dini hara? Ermənilərin İslam dininə meyl etməsi barədə məlumatlarin yayılması nəyə xidmət edə bilər, burada məqsəd nədir?
Məlumata görə, ermənilərin könüllü olaraq İslama meyl etməsində çeçen muftisinin, çeçen dindarların rolu var.
“Çünki təkcə Ermənistanda deyil, bir sıra MDB ölkələrində yaşayan ermənilər də…”
AVCİYA-nın vitse-prezidenti, professor, siyasi icmalçı Məhərrəm Zülfüqarlı “Bakı-Xəbər”ə bildirdi ki, son zamanlar ermənilərin İslam dinini qəbul etməsi ilə bağlı məlumatların yayılmasının şahidi oluruq, bu, diqqəti cəlb edir: “Bunun bir neçə səbəbi ola bilər. Birincisi, biz məsələyə tarixi nöqteyi-nəzərdən yanaşsaq, ümumiyyətlə, Vətəni olmayan ermənilər dünyanın müxtəlif ölkələrinə yayıldığı kimi, getdikləri ölkənin əhalisinə qaynayıb-qarışmaq prosesini keçir, həmin əhalinin dini görüşlərini, adət-ənənələrini, hətta adlarını belə götürüblər. Yəni bu proses əvvəllər də olub. Bundan başqa, bilirsiniz ki, Türkiyədə Həşimilər adlı kiçik etnik qrup var, Qara dəniz sahillərində yaşayırlar. Həşimiləri də ermənilər İslamı qəbul etmiş erməni əhalisi kimi qəbul edirlər, müsəlman ermənilər olaraq qəbul olunurlar.
Son dövrlər Ermənistanda ermənilərin İslamı kütləvi qəbul etməsi təəccüblü görsənmir. Çünki təkcə Ermənistanda deyil, bir sıra MDB ölkələrində yaşayan ermənilər də İslamı qəbul etməyə maraq göstərirlər və bu proses güclənir. Məsələn, Rusiyanın cənub əyalətlərində qeydiyyata düşən bəzi ermənilər artıq İslam dinini qəbul etmiş şəxslər kimi düşürlər, sonra Fransada bir qrup müsəlman erməninin olduğu göstərilir. Bu bizim xeyrimizədir, yoxsa zərərimizə? Biz bu barədə fikirləşməliyik. Çünki erməni xislətindən, erməni təxribatından çox zaman əziyyət çəkmişik, bu gün də çəkirik. Məsələyə müsbət tərəfdən yanaşsaq, indiki Ermənistan əhalisinin İslamı qəbul etməsi müsbət haldır. Ən azı Türkiyəyə və Azərbaycana qarşı Qriqoryan kilsəsi və erməni şovinistləri tərəfindən əhalidə yaradılan nifrət hissi yumşalmağa doğru gedər, bölgədə sülhün yaranmasına xidmət edə bilər. İndi Ermənistanda İslamın yayılmasında uzun müddətdir tənqid etdiyimiz İran-Ermənistan əlaqələri də rol oynayır. Çünki İrandan Ermənistana gedib yaşayan İran vətəndaşları orada erməni qadınları ilə evlənirlər, bu da həmin qadınların öz ərlərinin dinini qəbul etməsinə gətirib çıxarır. Necə ki, Azərbaycanda bu proses Sovet dövründə olmuşdu, indi də bizdə qarışıq ailələr var. Həmin ailələrdə yaşayan erməni qadınların xristianlıqdan daha çox İslama meyl etməsi özünü göstərir. Yəni bu amil mühüm rol oynayır”.
M.Zülfüqarlının sözlərinə görə, digər amil 44 günlük müharibədə Azərbaycanın möhtəşəm qələbəsidir ki, bizim qələbəmiz, gücümüz erməni xalqını oyadıb. M.Zülfüqarlının dediyinə görə, uzun illər erməni Qriqoryan kilsəsi və radikal siyasətçilər erməni xalqını müharibəyə vadar etməklə onu bezdirib, ermənilər revanşistlərdən və kilsədən qaçmaq, xilas olmaq üçün bu yolu tuturlar. “Erməni əhalisi buna görə bu yolu tutmağa başlayıb. Bu məsələdə Quranın erməni dilinə tərcümə edilərək nəşrə hazırlanması, çap edilməsi də mühüm rol oynayır. Yəni insanlar müəyyən müddətdə oxuduqlarına daha çox inanırlar, nəinki kiminsə danışdığı əfsanələrə. Bunlar da İslam dininin müqəddəs kitabını öz dillərində oxuduqca, buradakı dəyərləri gördükcə, İslama meylləri artır və görürlər ki, İslam heç də bunlara təqdim edildiyi kimi düşmənçilik yayan, insanlarda nifrət formalaşdıran din deyil, əksinə, barış, insanları sülh şəraitində yaşamağa dəvət edən dindir. İndi bu prosesləri biz izləməliyik. Çünki İslamı qəbul edən ermənilər bizim adları da qəbul ediblər. Bu olmasın ki, sabah bu adla Türkiyədə, Azərbaycanda mövqelər tutsunlar və dövlətçiliyimizi içəridən dağıtsınlar. Bu onların İslam dinini qəbul etməsinin mənfi cəhətləridir. Bunlar təxribat edə bilərlər. Bunun acı təcrübəsini Gürcüstanın timsalında görürük. Bu gün Gürcüstan hakimiyyətində, dövlət qulluğunda kifayət qədər gürcü soyadı daşıyan erməni var ki, sənəddə gürcü yazılsalar da, erməni olduqlarını unutmurlar, lazım gələndə Gürcüstanın dövlət təhlükəsizliyi üçün böyük problemlər yaradırlar. Bu baxımdan, bizim təhlükəsizlik xidməti əməkdaşları bu işi diqqətlə izləməlidirlər ki, gələcəkdə bu cür təxribatçı hərəkətlərə yol verilməsin. Məsələn, biz çox zaman deyirik ki, Ermənistan monoetnik dövlətdir, burada yalnız bir millət yaşayır. Amma Ermənistanda İslamın yayılması ona gətirib çıxara bilər ki, erməni hakimiyyəti İslamı qəbul etmiş erməniləri müsəlman, hətta azərbaycanlı kimi də beynəlxalq təşkilatlara təqdim edə bilər. Bu məsələdə də biz ehtiyatlı olmalıyıq. Yəni, hər halda, bu gəlişi, görünüşü xoş olan məsələdir ki, ermənilər İslamı qəbul edirlər. Amma bunun arxasında nə gizləndiyini, gələcəkdə hansı fəsadlar verəcəyini biz dəqiq təhlil etməliyik və hər cür təxribata da hazır olmalıyıq. Amma, bütün hallarda, ermənilər arasında İslamı qəbul edənlərin çoxalması regionda sülhün bərqərar olmasına müsbət təsir edə bilər. Bu fikir əsas götürülməlidir və təqdir olunmalıdır” - deyə M.Zülfüqarlı qeyd etdi.
İradə SARIYEVA
