ABŞ-ın ATƏT-in Minsk Qrupu çərçivəsində danışıqların bərpasına dair cəhdləri səngimək bilmir. İndi də səəfirlər səviyyəsində bu yöndə çağırışlar səslənir.
ABŞ-ın Ermənistandakı səfirliyinin yaydığı bəyanatda mina xəritələri müqabilində diversantların qaytarılması alqışlanıb. Bununla bağlı bəyanatda qeyd edilib ki, bu, tərəflər arasında münasibətlərin normallaşmasına müsbət təsir edəcək. Bununla yanaşı, səfirlik danışıqların MQ çəçivəsində bərpası ilə bağlı xüsusi çağırış edib: “Biz əməkdaşlığı və bölgədəki həll olunmamış məsələlərin həllini təşviq etməyə hazırıq. Ermənistanı və Azərbaycanı ATƏT-in Minsk Qrupunun həmsədrliyi çərçivəsində münaqişənin hərtərəfli və sabit şəkildə siyasi həlli üçün mənalı danışıqları bərpa etməyə çağırırıq”.
Maraqlıdır ki, bənzər məzmunlu çağırış ABŞ-ın Azərbaycandakı səfirliyinin də yaydığı açıqlamada yer alıb: “Birləşmiş Ştatlar bütün tutulanların geri qaytarılması və münaqişə bölgələrinin minalardan effektiv təmizlənməsi üçün lazım olan bütün məlumatların mübadiləsi çağırışlarını davam etdirir. Bölgədəki əməkdaşlığı və həll edilməmiş məsələlərin həllini dəstəkləməyə hazırıq. Biz, həmçinin, Ermənistanı və Azərbaycanı ATƏT-in Minsk Qrupu həmsədrlərinin himayəsi altında danışıqlara qayıtmağa və münaqişənin hərtərəfli və davamlı siyasi həlli üçün danışıqlar aparmağa çağırırıq”.
Maraqlıdır, ABŞ Minsk Qrupu çərçivəsində danışıqların keçirilməsi məsələsini niyə zaman-zaman gündəmdə saxlamağa çalışır?
“Vaşinqton prosesə töhfə vermək istəyirsə, o zaman bir sıra məsələlərlə bağlı Ermənistana təzyiq etsin”
Məsələyə münasibət bildirən sabiq diplomat, politoloq Fikrət Sadıqovun sözlərinə görə, Birləşmiş Ştatlar MQ vasitəsilə regionda vəziyyəti öz nəzarəti altında saxlamaq istəyir: “Ona görə davamlı olaraq bu məsələni gündəmdə saxlamaq istəyir. Baxmayaraq ki, Azərbaycan özü öz torpaqlarını azad edərək, ərazi bütövlüyünü bərpa edib. Ancaq məsələ ondadır ki, Vaşinqton 10 noyabrdan sonra yaranan yeni vəziyyətlə əlaqədar Qarabağ danışıqlarından kənarda qalmaq istəmir. Məlum olduğu kimi, Rusiya və Türkiyənin regionda rolu artıb. O da var ki, praktiki olaraq Rusiyanın vasitəçiliyinin müəyyən nəticələri var. Ancaq Minsk Qrupu 30 ilə yaxın vasitəçilik etdi, amma heç bir nəticə əldə olunmadı. MQ-nin vasitəçiliyi özünü doğrultmadı. Belə olan halda, MQ-nin yenidən vasitəçilik etməsinə nə ehtiyac var? Prinsipcə, biz MQ-nin fəaliyyətinə etiraz etmirik, amma bu, humanitar xarakterli məsələlərlə bağlı ola bilər. Bununla belə, ATƏT-in Minsk Qrupu öz sözünü demək istəyirsə, o zaman real vəziyyəti təhlil etsin və Azərbaycanın bir sıra addımlarını, faktiki olaraq, dəstəkləsin. Çünki biz alicənablıq nümayiş etdiririk, əlimizi Ermənistana uzadırıq. Təklif edirik ki, sülh sazişi imzalansın, Zəngəzur dəhlizi işə düşsün. Çağırış edirik ki, 10 noyabr razılaşmasından irəli gələn məsələlərin həlli sürətlənsin. Bunun üçün mütləq deyil ki, MQ çərçivəsində danışıqlar keçirilsin. Vaşinqton prosesə töhfə vermək istəyirsə, o zaman bir sıra məsələlərlə bağlı Ermənistana təzyiq etsin. Digər minalanmış rayonların xəritələrinin verilməsini təşkil etsin. ABŞ istəsə, postmünaqişə dövründə daha çox fayda verə bilər. Tərəflər arasında yekun sülh sazişinin imzalanmasına ehtiyac var”.
Politoloq onu da qeyd etdi ki, ABŞ bu və digər məsələlərdə səylərini artıra bilər.
Vidadi ORDAHALLI
