Ermənistanda son vəziyyətin təhlili bu ölkədə Nikol Paşinyan iqtidarının indi güc strukturlarında özünə dayaq formalaşdırmağa daha çox diqqət etdiyini göstərir. “Past” nəşri yazır ki, Paşinyan bu məsələdə olduqca həssasdır.
Qəzet qeyd edir ki, Nikol Paşinyanın vəzifədə olmasının üç ili ərzində Ermənistan Milli Təhlükəsizlik Xidmətinin 5 direktoru dəyişdirilib. O da vurğulanır ki, növbədənkənar seçkilərdən sonra Ermənistan MTX direktorunun yenidən dəyişib-dəyişməyəcəyi məsələsi ətrafında müzakirələr aktivləşib: “Məlumata görə, Paşinyan Ermənistan MTX direktoru Armen Abazyanın işindən razıdır. Xüsusən də parlament seçkiləri zamanı o, MTX tərəfindən görülən işlərdən çox məmnun qalıb. Bu səbəbdən də Armen Abazyana general-mayor rütbəsi verdirib. Bu halı nəzərə alaraq, sistemdə əmindirlər ki, Armen Abazyan Ermənistan MTX direktoru vəzifəsində vəzifə tutmağa davam edəcək”. Xatırladaq ki, bu günlərdə prezident Armen Sarkisyan imzaladığı müvafiq sərəncamla Armen Abazyana general-mayor rütbəsi verib. Ermənistan prezidentinin sərəncamı ilə Ermənistanın polis rəisi Vahe Qazaryana da polis general-mayoru rütbəsi verilib. Onların təqdimatı isə Nikol Paşinyan tərəfindən irəli sürülüb. Hesab edilir ki, bunlar Paşinyanın güc strukturları daxilində özünə dayaq yaratmaq niyyətinin təzahürüdür. Lakin baş verənlər erməni cəmiyyətində ciddi tənqidlə qarşılanır. Sosial şəbəkələrdə bunlara ciddi etiraz edilir. Məsələn, erməni fəal Sevak Xaçatryan yazır: “Biabırçı məğlubiyyət, kapitulyasiya, minlərlə qurban, bugünə qədər tapılan meyit hissələri, yaralılar… Və bütün bunlarla birlikdə bir vaqon təp-təzə, “yağın içində” generallar. Bu qədər faciəvi olmasaydı, hər şey gülməli olardı”. Digər erməni fəal Derenik Malxasyan isə qeyd edir: “Sənin üçün yas tuturam, erməni dünyası. Faciə odur ki, 8 ay əvvəl biabırçı şəkildə kapitulyasiya edilmiş hakimiyyət indi general rütbələri paylayır və hələ bir bu general rütbələrini götürən də var. Səmimi desəm, onu-bunu general rütbələri və ya yüksək dövlət mükafatları ilə “zənginləşdirməyi” böyük hadisə hesab etmirəm”. Erməni hərbi ekspert Tiqran Abrahamyan da eyni mövqedən çıxış edir: “Mövcud ağır reallıqlar şəraitində bu, nə əsas müzakirə fürsəti, nə də şəxsən gözlənilməz hadisədir. Rütbələr, mükafatlar çoxdan dəyərdən düşüb, bunlar isə buklet altında paylayırlar”. Digər erməni siyasi ekspert Vahan Babayan da məsələyə tənqidi mövqedən yanaşanlar sırasındadır: “Kapitulyasiya edilmiş ölkədə general rütbəsi vermək əxlaqsızlıqdır. Qarabağ yoxdursa, ölkə kapitulyasiya edilibsə, azərbaycanlılar sənin ərazinə daxil olubsa və heç bir general səsini çıxarmırsa, siz ölkəni məğlubiyyətə gətirmisinizsə, söylənilməz sayda qurbanlar, yaralılar vermisinizsə və nəticədə biabırçı kapitulyasiya olubsa, hansı general rütbəsindən söhbət gedir, nə general? Bu məğlub olmuş vəziyyətdə siz hər hansı bir əsgərə kiçik yefreytor rütbəsi vermək hüququna belə sahib deyilsiniz”.
Erməni mediası yazır ki, bu şəraitdə Paşinyan özünə təhlükə hesab etdiyi generalları da uzaqlaşdırır. Ermənistan ordusunun generalı Qriqori Xaçaturovun ordudan qovulması da bunun təsdiqidir. Belə ki, Müdafiə Nazirliyi Xaçaturovla müqaviləni uzatmayıb və erməni general ordudan tərxis olunub. Qeyd edək ki, Xaçaturov Ermənistan ordusunun Azərbaycanın Qazax-Tovuz bölgəsilə həmsərhəd ərazilərə cavabdeh olan 3-cü ordu korpusuna rəhbərlik edib. O, 2020-ci ilin iyul ayında Tovuz rayonu istiqamətində xain hücum əməliyyatına da komandanlıq edib. Xaçaturov bundan əvvəl bildirib ki, Paşinyan istefa verməlidir: “Üç il ərzində Nikol Paşinyanın təşəbbüsü ilə Baş Qərargah rəisi vəzifəsinə 4 yüksək vəzifəli hərbçi təyin olunub. Bu, Paşinyanın məsuliyyətsizliyi və qeyri-adekvatlığını göstərir. Paşinyanın vəzifədə olduğu hər gün, hər saat Ermənistanın təhlükəsizliyi dağılır, vətənimizin gələcəyi şübhə altına düşür”. Seçkilər zamanı Xaçaturov sabiq prezident Robert Köçəryana dəstək verib. Bunu da Paşinyan ona bağışlamayıb. “Joxovurd” nəşri isə yazır ki, Ermənistan ordusu səriştəli hərbçisini itirib: “Şəxsən Xaçaturov yaxınındakı insanlara deyib ki, nə yaş, nə də başqa problemi var və xidməti davam etdirməyə hazırdır, qalanı isə onun yox, Ermənistan Müdafiə Nazirliyinin qərar verəcəyi bir şeydir, daha doğrusu, Ermənistan Baş Qərargah rəisi Artak Davtyan qərar qəbul etməlidir. O da qərar qəbul edərək Xaçaturovu qovdu”. “168.am” nəşri yazıb ki, Paşinyan hakimiyyəti Xaçaturova əvəzedici tapıb. Belə ki, 3-cü ordu korpusunun komandiri vəzifəsində onu Cermuk hərbi hissəsinin komandiri, polkovnik Qeqam Martirosyan əvəz edəcək. Martirosyan müharibə günlərində Kəlbəcərdə olub, hərbi hissəyə rəhbərlik edib, daha sonra 1-ci dərəcəli “döyüş xaçı” ordeni ilə təltif olunub. Erməni ekspert Senor Hasratyan isə bildirir ki, Xaçaturovla müqaviləni uzatmamaq Ermənistan səlahiyyətliləri tərəfindən aparılan məntiqsiz siyasətin davamıdır: “Bu səlahiyyətlilərin addımları uzun müddətdir orduya mənfi təsir edir və bu addım da bunun davamıdır”. Onun sözlərinə görə, bu, savadsızlığın nəticəsidir: “Ordunun dağıdılması Qarabağın, Sünikin, Tavuşun qoparılmasına səbəb olur”.
Nahid SALAYEV
