Azərbaycan Respublikasının Ermənistan ilə dövlət sərhədində düşmən tərəfinin təxribatları davam edir. Bu barədə Dövlət Sərhəd Xidmətinin Mətbuat Mərkəzindən məlumat verilib.
Bildirilib ki, 2 fevral tarixində saat 05:00 radələrində Ermənistan Silahlı Qüvvələrinin Qazax rayonunun işğal altında olan Aşağı Əskipara kəndi ərazisindəki bölmələri tərəfindən həmin istiqamətdə dövlət sərhədinin müdafiə və mühafizəsini həyata keçirən Dövlət Sərhəd Xidmətinin sərhəd-döyüş məntəqəsinə doğru pulemyot silahdan 20 dəfə atəş açılmaqla atəşkəs rejimi pozulub. Ermənilər belə təxribatları törətməklə hansı məqsədləri güdür? Çox maraqlıdır, bölgədə sülh üçün qarant ölkə olan Rusiya niyə bu məsələyə reaksiya vermir? Daha maraqlısı odur ki, bəzi dairələr atəşkəsin pozulması ilə bağlı məsələdə Türkiyəni də məsul tutmağa çalışır. Ancaq məlumdur ki, Türkiyənin bölgədə sülhməramlı qüvvələri yoxdur, belə kontingent yalnız Rusiyaya məxsusdur.
Politoloq Qabil Hüseynli “Bakı-Xəbər”ə açıqlamasında bildirdi ki, bu məsələ ilə Türkiyənin ümumiyyətlə əlaqəsi yoxdur: “Çünki Türkiyə regionda yalnız atəşkəsə nəzarət mexanizimini həyata keçirir və bu məqsədlə Birgə Monitorinq Qrupu da yaradılıb. Rusiya isə sülhməramlı missiyaya malikdir. Bu, eyni zamanda, Rusiyanın üzərinə ciddi məsuliyyət də qoymuş olur. Baş verən insident Rusiya sülhməramlılarının cavabdeh olduğu əraziyə təsadüf etmir. Hesab edirəm ki, belə addımların atılması Paşinyanın istəyinə uyğun deyil. Belə addımlarla Paşinyanın apardığı prosesə təhdid yaratmaq, əsl sabotaj etməyi hədəfləyirlər. Bunu da edən “Qarabağ klanı”nın orduda olan qalıqlarıdır. Çünki Ermənistan hakimiyyəti hazırda əldə olunan razılaşmaya uyğun hərəkət etməkdə maraqlıdır ki, kommunikasiyalar bərpa edilsin. Bunun da nəticəsində ölkəni səfalətdən çıxarmağı düşünürlər. Sarkisyan-Köçəryan tandeminin tərəfdarları bunu törədir ki, KTMT-ni prosesə cəlb edə bilsinlər. Paşinyana qarşı olan addımlardı. Ermənistan daxilindəki siyasi qüvvələr arasında mübarizə özünü hərbi sahədə də göstərməyə başlayıb. Belə təxribatlar mütəmadi olarsa, Azərbaycan cavab verməyə məcburdu. Qeyd edim ki, son insident Azərbaycanın Ermənistan tərəfindən işğal edilən kəndlərindən olub. Həmin kəndlərin Azərbaycana təhvil verilməsi də razılaşdırılıb. Hətta Paşinyanın özünün də buna razı olduğu bildirilir. Təxribatın bir məqsədi də həmin planı pozmaqdır. Məhz deyilən istiqamətdə təxribatlar davam edərsə, Azərbaycan öz ordusunun gücü ilə işğal altında saxlanılan kəndləri azad etməli olacaq. Yaxşı olar ki, ermənilər bir daha təxribata əl atmasınlar”.
Politoloqun sözlərinə görə, Ermənistan bizimlə hərbi təxribat dilində danışmağın nə ilə nəticələndiyini görüb: “Buna görə də, ağıllı davranış göstərməyə məcburdurlar”.
Məhəmmədəli QƏRİBLİ
