Neofaşizmin, separatizmin və njdeizmin hökm sürdüyü və dövlət siyasətinə çevrildiyi Ermənistanda əhali zorən bu təhlükəli və zərərli ideologiyaların təsiri altındadır. Aydın məsələdir ki, bu mənfur siyasət bu ölkənin həm keçmiş, həm də hazırkı siyasi rəhbərliyi tərəfindən həyata keçirilir, təbliğ edilir. Əslində, bu, bütün dünya üçün təhlükəlidir.
Məlum olduğu kimi, Azərbayan Prezidenti İlham Əliyev dəfələrlə öz çıxış və müsahibələrində Ermənistanı bürüyən və erməni xalqını caynağına alan bu təhlükəli ideologiyaların, erməni vəhşiliyinin, faşizminin bütün dünya üçün təhlükəli olduğunu qeyd edib.
“Erməni xalqı vaxt keçəcək, bizə minnətdar olacaq ki, biz onları bu bəladan xilas etmək istədik”. Bunu Prezident İlham Əliyev Azərbaycan Televiziyasına müsahibəsində deyib.
Dövlət başçısı bildirib: “Hesab edirəm ki, müasir dünya ikinci belə vəhşilik görməmişdir. Əliyalın insanları yandırıblar, öldürüblər, uşaqları yandırıblar. Bütün binaları, məscidlərimizi dağıdıblar. Erməni faşizmi ən qəddar, ən təhlükəli, ən mənfur, ən çirkin ideologiyadır və biz bu ideologiyanı məhv etdik. Hesab edirəm ki, illər keçdikcə bizim bu tarixi xidmətlər daha da dolğun şəkildə dərk ediləcək dünya tərəfindən. O cümlədən, erməni xalqı vaxt keçəcək, bizə minnətdar olacaq ki, biz onları bu bəladan xilas etmək istədik. Ümid edirəm ki, onlar xilas olunacaqlar. Əks təqdirdə, Ermənistan dövlətinin dövlət kimi gələcəyi çox böyük şübhə altında olacaq”.
“Erməni xalqı bu münaqişənin girovuna çevrilmişdi, amma...”
“Novoye vremya” qəzetin baş redaktoru, siyasi icmalçı Şakir Ağayev “Bakı-Xəbər”ə şərhində bildirdi ki, Prezident İlham Əliyev həqiqəti qeyd edib və bu, ölkə başçısının uzaqgörən siyasətinin nəticəsidir. “28-30 ildən sonra torpaqlarımız işğaldan azad edilib və cənab Prezident işğaldan azad edilən rayonlarımıza səfərlər edib, bu ərazilərimizdəki vəziyyəti öz gözləri ilə görüb və bu dəhşətli mənzərəni qeyd edib. Son 30 il göstərdi ki, Ermənistan bizim işğalda saxladığı ərazilərimizi, kəndlərimizi, şəhərlərimizi hansı şəkildə dağıdıb, necə vəhşiliklər edib, hətta işğal dövründə ermənilərin məskunlaşdırıldığı Xankəndi, Əsgəran, Şuşa şəhərində də heç bir inkişaf prosesi getməyib, bu şəhərlər keçən əsrin 70-80-ci illərində qalıb. Ermənistanın özündə də vəziyyət bu cürdür. Azərbaycanla müqayisədə Ermənistanda heç bir tikinti-quruculuq işləri getməyib, əhalinin sosial rifahı üçün heç bir iş görülməyib. Erməni xalqı 30 ildir ki, neofaşizmin, xunta rejiminin əsarəti altında “can verir”. Bundan başqa, cənab Prezident birinci “erməni xalqı vaxt keçəcək, bizə minnətdar olacaq ki, biz onları bu bəladan xilas etmək istədik” fikrini ona görə qeyd edib ki, Qarabağda yaşayan erməniləri Azərbaycan qanunları çərçivəsində bizim vətəndaşlarımız kimi hansı yaşayış səviyyəsi gözlədiyini, onların qalıb yaşadıqları Azərbaycan şəhərlərinin necə inkişaf etməsinin şahidi olacaqlar. Bizim ərazilərdə yaşayan ermənilərin vəziyyəti ilə bağlı məsələdır. Əgər ermənilər Azərbaycan qanunlarına tabe olub, bizim vətəndaşlarımız olaraq Azərbaycan ərazisində azərbaycanlılarla birgə dinc şəraitdə yaşayacaqlarsa, onların vəziyyəti tamamilə müsbət istiqamətdə dəyişəcək, sosial-iqtisadi və digər vəziyyətləri yüksək olacaq. İkincisi, hətta vaxt gələcək, 44 günlük müharibənin nəticəsinə görə Ermənistan əhalisi özü Azərbaycana minnətdar olacaq. Bilirsiniz, Ermənistanda hakimiyyətə gələn istənilən adam Qarabağ problemini bəhanə edib, ölkə üçün heç bir iş görmürdü, bir az dara düşən kimi Qarabağ kartından istifadə edirdilər. Bunun nəticəsində də bu ölkənin sosial-iqtisadi durumu çox ağır vəziyyətə düşdü və iqtisadi, sosial, demoqrafik, siyasi böhran yarandı. Bu gün də o böhran hələ də davam edir. Azərbaycan 44 günlük müharibədə qazandığı möhtəşəm qələbə ilə Qarabağ problemini, münaqişəsini həll etdi və bununla da Ermənistan əhalisinin canını hökumətin “Qarabağ münaqişəsi” bəhanəsindən qurtardı. Erməni xalqı bu münaqişənin girovuna çevrilmişdi, amma Azərbaycan dövləti onları bu girovluqdan xilas etdi. Artıq erməni xalqı bilir ki, Qarabağ münaqişəsi yoxdur və Paşinyan hökumətinin heç bir bəhanəsi qalmayıb”.
Ş.Ağayevin sözlərinə görə, istər Azərbaycan Prezidenti, Rusiya Prezidenti və Ermənistanın baş naziri tərəfindən 10 noyabr 2020-ci ildə imzalanan üçtərəfli bəyanat, istərsə də 2021-ci ilin 11 yanvar tarixində Moskvada imzalanan üçtərəfli bəyanatın şərtləri, bəndləri həyata keçirilir. “Bilirsiniz ki, proses artıq başlayıb. Yaradılan müvafiq komissiyanın alt komitələri təşkil edilməlidir, fevralın 5-də isə Moskvada ilk iclas olmalıdır. Bəyanatdan irəli gələn məsələlər reallaşandan, kommunikasiya, yollar, ticari və sair əlaqələr genişləndikdən, bu xətlər açıldıqdan və Ermənistan bu iqtisadi layihələrdə yer alandan sonra bu ölkənin əhalisinin inkişafı göz qabağında olacaq. Ermənistan əhalisinin sosial-iqtisadi durumu yaxşılaşacaq. Təbii ki, cənab Prezident bunu yaxşı bilir və ona görə irəli gedərək dedi ki, vaxt keçəcək, erməni xalqı bizə minnətdar olacaq. Bu baxımdan deyilmiş sözlərdir. Şübhə etmirəm ki, ermənilər onların beyninə zorla yeridilən düşmənçilik, nifrət, faşizm ideologiyasının buxovlarından xilas olandan sonra onlar bütün müsbət tərəfləri öz gözləri ilə görüb o həyatı yaşayacaqlar” - deyə Ş.Ağayev qeyd etdi.
İradə SARIYEVA
