Ermənistanın sabiq prezidenti Robert Köçəryan yenidən gündəmdədir. İkinci prezident baş nazir Nikol Paşinyan və onun “Mənim addımım” bloku, hələ elan olunmamış növbədənkənar seçkilərə hazırlaşdıqları bir dönəmdə onlara meydan oxuyan qüvvə kimi ortaya çıxıb.
Ölkənin düşdüyü biabırçı durumun əsas günahkarları sırasında olan bu şəxs bəyan edib ki, növbədənkənar parlament seçkilərində iştirak etmək niyyətindədir. Əgər hər şey plan üzrə keçərsə, seçki məntəqələrində mübarizə de-fakto onunla baş nazirin komandası arasında gedəcək. Lakin məsələ ondadır ki, nə Köçəryan, nə də onun varisi olmuş Serj Sarkisyanın əhali arasında nüfuzu yoxdur. Təsadüfi deyil ki, Paşinyanın istefası tələbi ilə keçirilən aksiyalarda bir dəfə də olsun əvvəlki hakimiyyətə dəstək şüarları səslənməyib. Paşinyanla yanaşı, əvvəlki rəhbərlərin də ünvanlarına sərt ittihamlara isə mediada mütəmadi rast gəlmək mümkündür.
Bu arada Rusiyanın “Kommersant” nəşri yazır ki, Ermənistanda növədənkənar parlament seçkiləri keçirilsə belə, Köçəryanın qalib gəlmək şansı yoxdur. Nikolla Köçəryanın qarşıdurması ölkəni daha böyük, indikindən də güclü parçalanmaya gətirib çıxaracaq: “Resurslar, xüsusən də insan resursları kifayət etmir. Başda Köçəryan olmaqla “köhnə elita”nın antireytinqi yüksək olaraq qalır. Köçəryan “gələcəyin Ermənistanını” “köhnə elita” ilə quracağını vəd edir. Ancaq bu elitaya rəğbət çox aşağıdır. Qarabağda məğlubiyyət belə, onlara kömək etməyib. Üstəlik, Köçəryan köhnə elita deyəndə Ermənistan Respublikaçılar Partiyasını nəzərdə tutur. Partiya isə bundan əvvəl bəyan edib ki, növbədənkənar seçkilərin keçirilməsi barədə müzakirələrdə iştirak etmək istəmir. Bu da onu deməyə əsas verir ki, partiya, ümumiyyətlə, seçkilərdə iştirak etməkdən imtina edir”.
Maraqlıdır, bəs ekspertlər bütün bunları necə dəyərləndirirlər?
“Heç bir proqramı olmayan, yalnız revanşist siyasətə üstünlük verən müxalifətin qalib gəlməsi mümkün görünmür”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Görünən odur ki, Ermənistanda siyasi vəziyyət böhranlı olaraq qalır. Nikol Paşinyana qalib gələ bilməyən müxalifət hətta seçkilərdən də qorxur. Çünki heç bir proqramı olmayan, yalnız revanşist siyasətə üstünlük verən müxalifətin Paşinyana qalib gəlməsi mümkün görünmür. Eks-prezident Robert Köçəryanın seçkilərə qatılması Rusiyanın planıdır. Hesab edirlər ki, bununla nəyisə dəyişmək olar. Ermənistan vətəndaşları Köçəryanın yenidən hakimiyyətə gəlməsinə yaşıl işıq yandırmayacaqlar. Mart qırğınlarının əsas səbəbkarı məhz Köçəryandır və öz xalqına qarşı qan töküb. Serj Sarkisyanın partiyası olan Respublikaçılar Partiyası seçkilərə ona görə qatılmır ki, qalib gəlmək şanslarının olmamasını bilirlər. Hətta Qarabağ müharibəsində acı məğlubiyyət Köçəryanın Paşinyan üzərində siyasi nüfuzunu artırmağa şərait yaratmadı. Hesab edirəm ki, Köçəryanın parlament seçkilərində qalib gəlməsi mümkün deyil. Ümumiyyətlə, Ermənistanda növbəti dəfə Paşinyanın hakimiyyətdə qalmaq şansı var. Ermənistan əhalisi yaxşı bilir ki, Köçəryanın hakimiyyətə gəlməsi ölkə üçün müsbət perspektiv vəd etmir. Bu səbəbdən “Qarabağ klanı”na stavka etmirlər”.
Politoloq onu da qeyd etdi ki, hansısa fors-major vəziyyətdə Köçəryan yenidən prezident olsa belə, yenə də Qarabağda nəyisə öz xeyrinə dəyişə bilməyəcək.
Vidadi ORDAHALLI
