ATƏT Minsk Qrupu həmsədrlərinin Qarabağa səfəri planlaşdırılır. Bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı deyib. O bildirib ki, səfərin tarixi hələlik bəlli deyil: "Hazırda səfərin detalları bütün tərəflərlə razılaşdırılır".
Maraqlıdır, həmsədrlərin regiona səfərinə hazırda ehtiyac varmı və bu daha çox kimə lazımdır?
Politoloq Rəşad Bayramov “Bakı-Xəbər”ə açıqlamasında bildirdi ki, otuz ilə yaxın davam edən Dağlıq Qarabağ münqaişəsinin sülh yolu ilə həll olunmasında ATƏT-in Minsk Qrupunun fəaliyyəti səmərəsiz oldu: “Bu illər ərzində adıçəkilən qurum işğalçı ölkəyə “dur” demədi. Əvəzində müzəffər Azərbaycan ordusu əks-əməliyyatlara başlayıb, ərazi bütövlüyümüzü və beynəlxalq hüququ bərpa etdi. Bununla da Azərbaycan tərəfi haqlı olaraq Minsk Qrupuna ehtiyacın qalmadığını bəyan etdi. Məğlubiyyətə uğrayan separatçı ölkə isə bu təşkilatın fəaliyyətini yenidən gündəmə gətirir. Təəssüf ki, son zamanlar ATƏT Dağlıq Qarabağın status məsələsini yersiz şəkildə qabardır. Bu da mümkün olmayan bir məsələdir. Demək olar ki, statusla bağlı məsələnin gündəmə gətirilməsində ATƏT Minsk Qrupu ilə Ermənistanın mövqeyi tam üst-üstə düşür. Bizə isə Minsk Qrupu gələcək sülhə töhfə verəcək fəaliyyət ortaya qoyarsa lazım ola bilər. Minsk Qrupu həmsədrlərindən Türkiyənin münaqişədəki rolu ilə də bağlı tənqidlər eşidirik. Bu məsələ gündəmdən çıxmalıdır. “Qarabağa status verilsin”, “Azərbaycana filan məsələyə görə sanksiya tətbiq edin” kimi fikirləri biz eşitmək istəmirik. Bu məsələ ilə bağlı konkret fikrimizi bəyan etmişik. Ermənistan düşünür ki, Amerikanın yeni hökuməti və Fransa onların yanında olacaq, yazılan şərtlərin Ermənistanın lehinə tətbiq edilməsinə nail olacaqlar. İstənilən halda Azərbaycan öz mövqeyini bildirməlidir. Minsk Qrupu meydançaya geri dönərsə, konkret iş üzərində çalışmalıdır. Minsk Qrupunun gələcəkdə müxtəlif layihələr vasitəsilə sülh quruculuğuna töhfə verə biləcəyininin mümkünlüyünü bəyan etməlidir”.
Politoloqun sözlərinə görə, hazırkı məqamda həmsədrlərin regiona səfəri Ermənistana çox lazımdır: “Ancaq həmsədrlər də bilməlidir ki, köhnə tələblər və iş metodu ilə işləməyin zamanı deyil. Fəaliyyətlərində real situasiyaya uyğun dönüş etməsələr, onların fəaliyyətinə önəm verən olmayacaq”.
Məhəmmədəli QƏRİBLİ
