Məlum olduğu kimi, İran xarici işlər naziri Cavad Zərif ermənistanlı həmkarı Ara Ayvazyanla görüşüb. Görüşdə bir sıra məsələlər müzakirə edilib.
Görüş zamanı Ayvazyan Cavad Zərifin Azərbaycan Prezidentini və xalqını Qarabağın işğaldan azad olunması ilə bağlı təbrik etməsindın narazılığını üstüörtülü formada bildirib: “Qarabağdakı son müharibənin nəticələri regionda sülh üçün əsas ola bilməz. Regionda təhlükəsizliyi və stabilliyi yalnız qalib, ya məğlubun olmadığı sülh təmin edə bilər”.
Buna cavab olaraq, Zərif erməni diplomata ölkələrin ərazi bütövlüyü prinsipi barədə danışıb: “İran bütün ölkələrin ərazi bütövlüyünə böyük önəm verir”.
Bundan başqa, Zərif Paşinyanla görüşdə də ərazi bütövlüyü məsələsini qabartdı: “Rəsmi Tehran Qarabağ məsələsində beynəlxalq hüquq, milli azlıqların haqlarının gözlənilməsi və ərazi bütövlüyünün qorunmasının tərəfdarıdır”.
Məlumat üçün qeyd edək ki, İrəvandan əvvəl Bakıda səfərdə olan Cavad Zərif İlham Əliyevlə görüşü zamanı Qarabağın işğaldan azad olunması münasibətilə Prezidenti və xalqı təbrik edib: “Sizi və Azərbaycan xalqını ərazilərinizi azad etməyiniz münasibətilə təbrik etmək istərdim. Ölkəniz və region baxımından bu qələbə Sizin rəhbərliyiniz və Azərbaycan xalqının mətanəti sayəsində mümkün olmuşdur. Ümid edirik ki, bu, region dövlətləri arasında dinc və normal münasibətlərin başlanğıcı olacaq”.
Ancaq Ayvazyanın məlum “pretenziyasına” Zərif daha da sərt diplomatik cavab verə bilərdi. Orta mövqe tutmaqdansa, ən azından, mövcud həqiqəti daha sərt ifadə etmək olardı. Çünki beynəlxalq hüquq ortadadır. Beynəlxalq hüquq da Azərbaycanın ərazi bütövlüyünü dəstəkləyir. Digər tərəfdən, hansı milli azlıqların hüquqlarından söhbət gedə bilər ki, Qarabağda etnik ermənilərin sayı heç 70 min nəfər deyil.
O baxımdan bütün bunları ekspertlər necə dəyərləndirirlər?
“Bir ovuc erməninin hansı xüsusi haqlarından söhbət gedə bilər?”
Sözügedən məsələ ilə bağlı fikirlərini “Bakı-Xəbər”lə bölüşən “İki Sahil” qəzetinin baş redaktoru Vüqar Rəhimzadənin fikrincə, Cavad Zərif ərazi bütövlüyü məsələsində daha konkret və tutarlı mövqe sərgiləyə bilərdi: “O zaman Ermənistan öz yerini bilərdi. Təəssüflər olsun ki, Ayvazyanın məlum avantürist açıqlamasına münasibət elə də sərt olmadı. Görünür, Zərif İranın Ermənistanla olan münasibətlərini nəzərə alaraq bunu etmək istəməyib. Hansı ki, beynəlxalq hüquq normalarına əsasən, Ayvazyanı yerində oturtmaq olardı. Bir şeyi də qeyd edim ki, Ayvazyan diplomat təsiri bağışlamır. O daha çox təlxəyə bənzəyir. Baxmayaraq ki, xarici işlər naziri vəzifəsi çox böyük statusdur. Etnik mənsubiyyətindən asılı omayaraq, Azərbaycanda yaşayan, bu ölkənin qanunlarını qəbul edənlər ölkənin vətəndaşıdır. Azərbaycanda bununla bağlı heç bir problem yoxdur. Problemi yaradan ermənilərdir. Belə olan halda, bir ovuc erməninin hansı xüsusi haqlarından söhbət gedə bilər? Üstəlik, qəribə görünən odur ki, bu məsələni çoxmillətli ölkənin rəsmisi xüsusi vurğulayır. O baxımdan hesab edirəm ki, qonşu dövlətlər bu məsələdə son dərəcə diqqətli olmalıdırlar. Erməni separatizminə münasibətdə daha sərt mövqe sərgiləməlidirlər”.
V.Rəhimzadə hesab edir ki, yalnız o halda erməni rəsmiləri öz yerini biləcəklər.
Vidadi ORDAHALLI
