Beynəlxalq Münasibətlərin Təhlili Mərkəzi və Türkiyənin Siyasət, İqtisadiyyat və Toplum Araşdırmaları Vəqfinin (SETA) birgə təşkilatçılığı ilə keçirilən “Azərbaycan-Türkiyə münasibətlərinin gələcək 10 ili” adlı vebinarda Prezidentin köməkçisi, Azərbaycan Respublikası Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib ki, hərbi-texniki sahədə əməkdaşlığımızın bilavasitə uğurlarını biz Zəfər savaşında gördük.
Prezidentin köməkçisi bildirib ki, diaspor, elm və digər sahələrdə də əməkdaşlığımızı inkişaf etdirməliyik, bunun üçün zəmin də var: “Qarşıdan gələn dövrlərdə və proseslərdə əlaqələri daha da inkişaf etdirməliyik. Bu əməkdaşlıq regional sülh və təhlükəsizliyi gücləndirir. Bu əməkdaşlıq heç kimə qarşı deyil. Bizim üçtərəfli formada apardığımız əməkdaşlığımız göstərir ki, bu əməkdaşlıqdan hər kəs qazana bilər: Azərbaycan-Türkiyə-Gürcüstan, Azərbaycan-Türkiyə- İran, Azərbaycan-Türkiyə-Pakistan. Deməli, Ermənistan da Azərbaycan və Türkiyə əməkdaşlığından faydalana bilər”.
Təbiidir ki, Hikmət Hacıyevin bu mövqeyini eyni zamanda ölkə başçısının münasibəti kimi dəyərləndirmək olar. Ermənistan, deyildiyi kimi işğalçı siyasətindən əl çəkərsə, Azərbaycan-Türkiyə əməkdaşlığından hansı faydaları götürə bilər?
Politoloq Tofiq Abbasov “Bakı-Xəbər”ə açıqlamasında bildirdi ki, Ermənistanın qazana biləcəyi faydanın konturları açıq-aydın görünməkdədir: “Həmin ölkə müstəqilliyini elan edəndən sonra, 30 ilə yaxındır ki, dərhal təcavüzə əl atdılar. Bunun da nəticəsində Azərbaycan və Türkiyə onlarla olan sərhədlərini bağladı. Bu addımlar təcavüzkar siyasətə verilən ən layiqli cavab idi. Onların nəzərinə çatdırıldı ki, normal qonşuluq münasibəti istəyirlərsə, gərək təcavüzkar siyasətdən əl çəksinlər. Mifik qələbə onların başına bəla gətirdi. Bunun nəticələri indiki anda daha aydın hiss edilir. Onsuz da Azərbaycan və Türkiyə özlərinin dünyaya qovuşmaq üçün kommunikasiya imkanlarını Ermənistan olmadan da digər ölkələrlə əməkdaşlıq formatında inkişaf etdirirlər. Ermənistanın qapalı olması region üçün əyləc rolunu oynamaqla yanaşı, həm də onun özünə böyük ziyan vurur. İstənilən ölkənin qonşuları ilə normal münasibəti olmalıdır. Belə olarsa, onlar Türkiyə-Azərbaycan münasibətlərindən də bəhrələnə bilərlər. Biz görürük ki, Ermənistanın yalnız Gürcüstan və İranla qurduğu münasibətlər onun ehtiyacını tam ödəyə bilmir. Çünki Gürcüstanın özünün Rusiya ilə sərhədində problemlər mövcuddur. İran da beynəlxalq sanksiyalar altındadır. Belə ölkələr vasitəsilə Ermənistan beynəlxalq arenaya çıxmaqda çətinlik çəkir. Ermənistanın Türkiyə və Azərbaycanla münasibətləri normallaşarsa, rahat nəfəs ala bilər. Çünki bununla həmin ölkə Şərq-Qərb, Cənub-Şimal istiqamətindəki tranzit xətlərinə qoşula bilir. Biz anlayırıq ki, inteqrasiya siyasəti yaxın ölkələrlə başlayırsa, sonra da özünün davamını uzaq coğrafiyalarda göstərə bilir. Ermənistanın dalan vəziyyətində olması özünün problemidir”.
Politoloqun sözlərinə görə, yanvarın 11-də baş tutan Moskva görüşündə də bütün kommunikasiyaların tam açılması ilə bağlı razılıq əldə edildi: “Bu, bütün ölkələr kimi, Ermənistana da qazanc vəd edir. Ermənistanın ən böyük ehtiyacı antiböhran proqramınadır ki, onu da belə şəraitdə həyata keçirə bilmir. İşğal siyasətindən əl çəksələr, sərhədlərin açılması mümkün olar və bundan ölkə olaraq böyük mənfəət götürə bilərlər”.
Məhəmmədli QƏRİBLİ
