Prezident Polad Bülbüloğluna çox yaxşı ideya verdi, o isə hələ reaksiya verməyib...

Aydın Xan Əbilov: “Polad Bülbüloğlu ölkə başçısının bu çağırışına dərhal reaksiya verməli idi”

img

Ermənilərin növbəti vandallığı, növbəti düşmənçiliyi. Görün, dahi Bülbülün büstünü, evini nə günə qoyublar. Cavabını artıqlaması ilə alıblar. Biz onların cavabını döyüş meydanında verdik, bütün şəhidlərimizin qisasını aldıq, onların qanları yerdə qalmadı. Xocalı soyqırımını, mədəni soyqırımı törədən mənfur düşmən döyüş meydanında məğlub oldu, məhv oldu. Əminəm ki, Polad gəlib atasının evini bərpa edəcəkdir”. Bunu Prezident İlham Əliyev Azərbaycanın işğaldan azad edilən mədəniyyət paytaxtı Şuşa şəhərində olarkən ermənilər tərəfindən dağıdılmış Bülbülün ev muzeyinə də baş çəkərkən deyib.

Prezident Polad Bülbüloğlunun gəlib öz atasının evini təmir edəcəyini dedi. Prezident tamamilə doğru dedi və P.Bülbüloğlu bu məsələyə reaksiya verməli və öz atasının evinin təmirini həyata keçirməlidir. Lakin hələ P.Bülbüloğlu məsələyə hər hansı bir reaksiya verməyib.

  • ...Şuşanın sənət nişanələrindən biri olan Bülbülün evinin, ev muzeyinin bərpa edilməsi məsələsində passivlik göstərir”

Vətəndaş Cəmiyyəti Alyansının rəhbəri, Yeni Yazarlar və Sənətçilər İctimai Birliyinin sədri, analitik-ekspert, yazıçı-kulturoloq Aydın Xan Əbilov “Bakı-Xəbər”ə bildirdi ki, ölkə başçısının Qarabağla, Şuşa ilə, bütövlükdə, ölkəmizlə əlaqədar bütün çıxışlarında bir ideoloji xətt görürük, bu da azərbaycançılığın, Azərbaycan mədəniyyətinin və qlobal dünyada Azərbaycanın haqq işinin, ədalətli mövqeyinin dünyaya, başqa xalqlara, dövlətlərə tanıdılması, çatdırılması məsələsidir. “Təəssüflər olsun ki, bizim sıravi vətəndaşlardan, ictimai xadimlərdən, dövlət məmurlarından tutmuş, yaradıcı şəxslərə qədər böyük əksəriyyət bu xətti, bu mesajların mənasını vaxtında tuta və ona adekvat cavab verə bilmirlər. Cənab Prezidentin çağırışlarına, mesajlarına anındaca cavab verən çox az adam var. Dəfələrlə sizinlə “Bakı-Xəbər”dəki müsahibələrimizdə bildirmişik ki, Prezidentin hər bir çıxışı, hər bir çağırışı cəmiyyət, dövlət qurumlarında çalışan insanlar, məmurlar üçün, bir növ, təlimatdır, yol xəritəsidir, bunu anındaca dərk edib yerinə yetirmək lazımdır. Əgər söhbət P.Bülbüloğlunun atasından, Azərbaycanın ifaçılıq tarixində özünəməxsus böyük izi olan Bülbülün evindən, onun ev muzeyindən gedirsə, P.Bülbüloğlu ölkə başçısının bu çağırışına dərhal reaksiya verməli idi. Şuşada Bülbüllə yanaşı, bir sıra görkəmli şəxsiyyətlərimizin evləri var. Böyük Azərbaycan şairi, dövlət xadimi Molla PənahVaqifin məqbərəsi də var ki, o da düşmən tərəfindən dağıdılıb. Bu gün Vaqifin bir qohumu, yaxını yoxdur ki, gedib onun məqbərəsini təmir etsin, bərpa edib yenidən xalqımıza qaytarsın. Bu məqbərəni dövlət bərpa edəcək. Ölkə başçısı İlham Əliyevin və ölkəmizin Birinci vitse-prezidenti Mehriban Əliyevanın səyləri və qayğısı nəticəsində   dövlət Mədəniyyət Nazirliyinin xətti ilə bu məqbərəni yüksək səviyyədə bərpa edəcək. Amma illərdir dövlətin ad-san verdiyi, şöhrətləndirdiyi, konsertlərini təşkil etdiyi, müxtəlif medallarla, fəxri adlarla təltif etdiyi, Prezident təqaüdünə layiq gördüyü, dövlətin pulu ilə varlanmış şəxslər var ki, onlar Qarabağda - Şuşada, Ağdamda, Füzulidə öz atalarının-babalarının, yaxınlarının evlərini, ev muzeylərini, məqbərələrini bərpa etməyə təşəbbüs göstərsinlər. Onsuz da dövlət bu işləri görəcək, böyük şəxsiyyətlərimizin ev muzeylərini, evlərini, məqbərələrini bərpa edəcək, amma o ailələrin övladları, ailə üzvləri də təşəbbüskar olmalıdırlar. Bu adamlar heç olmasa öz ata-baba evlərini bərpa etsinlər. Onlar yenə də cənab Prezidentin buna sərəncam verməsini gözləyirlər? Dövlət dəstək üçün müəyyən məbləğdə vəsait ayırmalıdır, amma, bütövlükdə, Azərbaycanın mədəniyyət, musiqi, muğam tarixində rol oynamış böyük şəxsiyyətlərimizin evlərinin, ev muzeylərinin, məzarlarının bərpası üçün xüsusi fondlar olmalıdır, həmin şəxslərin hazırda imkanlı olan ailə üzvləri ortaya çıxmalı və  cənab Prezidentin ideoloji xəttini davam etdirərək Qarabağın dirçəlişində iştirak etməlidirlər. Bilirsiniz ki, P.Bülbüloğlunun həm özü, həm atası incəsənət tariximizdə qalan şəxsiyyətlərdir. Səfir kimi P.Bülbüloğlunun fövqəladə, yaxşı mənada yaddaqalan bir fəaliyyətini görmürük, heç olmasa hörmətli Polad müəllim Azərbaycanın, Qarabağın, Şuşanın övladı olduğunu, atasının da Şuşadan olduğunu unutmasın, bunu öz əməli ilə sübut etsin. Necə olur ki, Polad müəllim ana xəttilə Gürcüstandan gələn sənət adamlarına ölkəmizdə gen-bol yer ayıra, onlara sponsorluq edə, pul ayıra bilirdi, indi də bilir. Ad çəkmək istəmirəm. Amma P.Bülbüloğlu öz ata tərəfdən ona çörək vermiş vətənin, Qarabağın, Şuşanın sənət nişanələrindən biri olan Bülbülün evinin, ev muzeyinin bərpa edilməsi məsələsində passivlik göstərir. Biz əlbəttə ki, bunu qınayırıq, belə olmaz”.

A.X.Əbilovun sözlərinə görə, ölkə başçısı ardıcıl olaraq Qarabağın dirçəldilməsi, müharibənin uğurlu nəticələri, qələbəmizlə, müzəffər ordumuzla, şəhidlərimizlə bağlı müxtəlif sənədlər imzalayır, layihələrə imza atır, fərmanlar var, maddi və mənəvi dəstək göstərir, amma P.Bülbüloğlu kimi məmurlar özlərini sanki bundan xəbərsiz kimi aparırlar. “Təəssüf ki, bu qədər böyük işlərə P.Bülbüloğlu kimi məmurlar, kifayət qədər tanınan, dünya çapına çıxarılan, vaxtilə Azərbaycan dövlətinin pulu ilə varlanmış, tanınmış insanlar isə əllərini əllərinin üstünı qoyub heç bir iş görmək istəmirlər. Əlbəttə ki, cəmiyyət buna yaxşı baxmaz. Fikir verin, bir çox şəhid ailəsi və qazimiz var, onlar artıq dilə gəlirlər ki, biz Vətənə canımızı verdik, varlı insanlar da Qarabağın bərpa, dirçəliş prosesində ölkə başçısının yanında olsunlar. Bu baxımdan da bu, çox aktual məsələdir. Yalnız P.Bülbüloğlu deyil, Qarabağdan olan digər tanınmış şəxsiyyətlərin də maddi baxımdan imkanlı ailə üzvləri, övladları cənab Prezidentin P.Bülbüloğluna xitabən obrazlı ifadə ilə bildirdiyi, bütövlükdə isə cəmiyyətə təkan verən bu çağırışından örnək götürüb Qarabağın dirçəlmə prosesinə töhfələr verməli və Şuşada, eləcə də digər şəhərlərimizdəki tarixi evlərin, ev muzeylərinin bərpasında yaxından iştirak etməlidirlər. Bu mütləqdir. Bu insanlar Qarabağın iqtisadiyyatının, turizmin, mədəniyyətinin inkişafına, abidələrin bərpasına öz töhfələrini verməlidirlər” - deyə A.X.Əbilov qeyd etdi.

Ekspertin fikirlərindən belə qənaətə gəldik ki, Qarabağın tanınmış ailələrinin imkanlı övladları, nəvə-nəticələri Qarabağın dirçəldilməsi prosesində yaxından iştirak etməyə təşəbbüs göstərməli, ata-babalarının evlərinin, ev muzeylərinin, abidələrinin bərpasında əllərindən gələni əsirgəməməlidirlər.  

İradə SARIYEVA

Son xəbərlər