Ordumuzun 44 günlük müharibədə qələbəsinə yaraşan daha bir beynəlxalq rəy - dünyanın 64-cü ordusu...

Rasim İsgəndərov: “Azərbaycan Ordusu öz imkanlarını, döyüş qabiliyyətini zəfərlə sübut etdi”

img

Azərbaycan dünyanın 138 ölkəsi arasında hərbi gücünə görə 64-cü yeri tutub. Bu barədə “Global Firepower” təşkilatının 2021-ci il üzrə hesabatında bildirilib. Reytinqə əsasən, Azərbaycan Ordusu qüdrətinə görə Cənubi Qafqazda birinci yerdə qərarlaşıb. Qonşu Gürcüstan siyahıda 92, Ermənistan isə 100-cü yerdədir.

Hesabatda qeyd olunub ki, Azərbaycanda 3,7 milyondan çox hərbi xidmətə yararlı insan var. Silahlı Qüvvələrdə 425 min hərbi qulluqçu var ki, onların da 125 mini aktiv xidmətdədir.

Məlumat üçün bildirək ki, Azərbaycan Ordusunun arsenalında 145 təyyarə və helikopter, 1 052 tank, 1 450 zirehli maşın, 242 özüyeriyən atrilleriya, 307 ədəd yedəkli artilleriya və 245 reaktiv qurğu, dəniz donanmasında isə 31 gəmi var. Araşdırmada qeyd olunur ki, müharibənin aparılması üçün əsas komponent yanacağın olmasıdır. Azərbaycan gün ərzində 800 min barrel neft hasil edir, 180 min barrel nefti isə istehlak edir. Ölkənin təsdiqlənmiş neft ehtiyatlarının həcminin isə 7 milyard barrel olduğu qeyd edilib.

Məlumat üçün onu da vurğulayaq ki, 2020-ci ilin reytinqində də Azərbaycan 64-cü mövqedə olub.

  • “Ordumuz bu gün ən müasir texnika və silahlarla təmin olunub, ölkəmizin hərbi sənaye kompleksi inkişaf edir”

Azərbaycanın hərbi gücü barədə danışan hərbi ekspert Rasim İsgəndərov qeyd etdi ki, Azərbaycanın dövlət müstəqilliyinin bərpası, qısa vaxtda möhtəşəm iqtisadi yüksəliş yolu keçərək müasir və qüdrətli məmləkətə çevrilməsi tariximizin əbədiyyətə qovuşan səhifələrini təşkil edir. Bu tarix xalqımızın rəşadətinin, dövlətimizin qüdrətinin təzahürüdür. Bu tarix 2020-ci ilin Vətən müharibəsində müşahidə etdiyimiz qəhrəmanlığın və şanlı zəfərin istinad nöqtəsi, ilham mənbəyidir: “Prezident, Ali Baş Komandan İlham Əliyevin rəhbərliyilə ordumuz 44 gün davam edən müharibə gedişində möhtəşəm qələbələr qazanaraq, dünya hərb tarixinə yeni şanlı səhifələr yazdı. Silahlı Qüvvələrimiz döyüş meydanında Ermənistanın "güclü, məğlubedilməz” ordu mifini darmadağın etdi. Bu müharibədə Azərbaycan Ordusu qarşısında duruş gətirə bilməyəcəyini, iflasa məhkum olduğunu anlayan düşmən məğlubiyyətini etiraf etmək məcburiyyətində qaldı”.

Həmsöhbətimizin sözlərinə görə, ordumuz bu gün ən müasir texnika və silahlarla təmin olunub, ölkəmizin hərbi sənaye kompleksi inkişaf edir. Bunlarla yanaşı, kadr potensialının inkişafı, orduda peşəkarlığın daimi olaraq yüksəldilməsi Silahlı Qüvvələrimizin gücünü artıran çox əhəmiyyətli amildir. Bir sözlə, Azərbaycan Ordusunun hərbi-texniki təchizat səviyyəsi müasir tələblərə və NATO standartlarına uyğundur, kadr-mütəxəssis ehtiyatı isə öz vəzifələrini layiqincə yerinə yetirən peşəkarlardan ibarətdir

Ekspert onu da vurğuladı ki, 10 dekabr 2020-ci il Azərbaycanın ilk Zəfər paradını qeyd etdiyi şanlı gün kimi tarixə yazıldı. Qələbə paradı  şəhidlərimizin, itkin düşən hərbi qulluqçularımızın, yüzlərlə qazimizin, Ermənistanın faşizm siyasətinin qurbanlarının qisasının alındığının sübutu kimi əbədi olaraq yaddaşlara həkk olundu.

R.İsgəndərov xüsusi olaraq vurğuladı ki, 44 günlük müharibənin ilk günlərindən etibarən Azərbaycan Ordusu düşmənə ağır zərbələr endirdi: “Düşmənin çox sayda texnikasını, artilleriya sistemini, ilk olaraq hava hücumundan müdafiə sistemini məhv etdi. Məlumdur ki, döyüş əməliyyatları zamanı düşməndən çoxlu sayda qənimətlər götürülüb - tanklar, piyadaların döyüş maşınları, eləcə də döyüş meydanında düşmənin yüzlərlə canlı qüvvəsi məhv edildi.  

Danılmaz faktdır ki, Azərbaycan Ordusu müharibəni yeni texnoloji yanaşmalar əsasında apardı. Ordumuz Ali Baş Komandanın da qeyd etdiyi kimi, “maksimum nəticə, minimum itki” prinsipinə əsaslandı. Bu da onu göstərir ki, ordumuz 15 il müddətində öz hərbi büdcəsini yüksələn xətt üzrə artırıb və Azərbaycan uzun illər müasir tipli silahların alınması, pilotsuz uçuş sistemlərinin əldə edilməsinə diqqət yetirib. Bu kimi addımlar bu gün öz bəhrəsini verir və sözdə deyil, artıq əməldə Azərbaycan Ordusu öz imkanlarını, döyüş qabiliyyətini zəfərlə sübut etdi”.

Günel CƏLİLOVA

Son xəbərlər