Vaqif Abışov: “Buçek kimi cılız, xırda-xuruş, erməni lobbisinin, erməni terror təşkilatlarının əlində oyuncaq olan, onların sifarişini yerinə yetirib muzdlu kitabça yazan...”
Azərbaycan dövlətinin 44 günlük mübaribədə qazandığı zəfərə qara yaxmağa cəhd göstərən xarici qüvvələr, dövlətlər var.
Azərbaycanın qələbəsi dostlarımızı sevindirsə də, qürurlandırsa da, anti-Azərbaycan qüvvələrinin yuxusunu ərşə çəkib, xaricdəki erməni lobbisi quyruğu yanmış siçan kimi özünü ora-bura vurur ki, görsün, Azərbaycana qarşı hansı yolla qarayaxma, şər-böhtan kampaniyasını həyata keçirə bilər. Şər-böhtan, qarayaxma işində “mahir” olan ermənilərin belə məsələlərdə “dadına” təbii ki, muzdlu “yazar”lar çatır. Muzdlu “yazar”ların şər yazılarını isə erməni mediası gecə-gündüz tirajlamaqdan, beynəlxalq aləmə yalan məlumatlar ötürməkdən yorulmur. Faşist ideologiyasına, separatizmə xidmət edən ermənilərdən bundan artığını gözləmək sadəlövhlük olardı.
Erməni mətbuatında Azərbaycana qarşı yeni bir şər, qarayaxma kampaniyasına başlanıb. Düşmən bu dəfə hansısa bir qondarma polşalı yazarın Azərbaycanın haqq işinə kölgə salan, yalan, saxtakarlıq üzərində qurulan kitabçasından bəhs edib. Erməni mediası yazır ki, Tomaş Leç Buçek adlı polşalı “publisist” 44 günlük müharibədən sonra guya “Azərbaycanın hərbi cinayətlərinə dair” bir kitabça hazırlayıb. Buçek öz sosial şəbəkə hesabında yazıb ki, o, Qarabağ ermənilərinə qarşı Azərbaycanın “hərbi cinayətləri” barədə kitab hazırlayıb və guya “Rüfət” adlı bir azərbaycanlı ona 50 min dollar müqabilində bu kitabın çapından imtina təklifi edib.
Ekspertlər qeyd edirlər ki, Buçek hərbi cinayətlərdən yazmaqda elə maraqlıdırsa, onun üçün real ölkə Ermənistandır və o, Ermənistanın son 30 ildə Azərbaycana qarşı törətdiyi gerçək hərbi cinayətlərdən istədiyi qədər material əldə edib yaza bilər. 44 günlük Vətən müharibəsi dövründə də Ermənistanın Azərbaycanın dinc sakinlərinə, sivil insanlarına qarşı törətdiyi insanlıq əleyhinə hərbi cinayətlər bütün dünyaya məlumdur və həmin faktlardan Buçek istifadə etməklə kitablar yaza bilər. Ekspetlərin sözlərinə görə, Azərbaycan nəinki II Qarabağ müharibəsində, ümumiyyətlə, heç bir vaxt hərbi cinayət törətməyib ki, hansısa bir qondarma profil adı altında Buçekə pul təklif edə. “Rüfət”in də azərbaycanlı adı ilə yazan bir erməni olduğunu deyən ekspetlərin dediyinə görə, burada məqsəd Azərbaycanı ləkələməkdir, amma düşmən nə qədər çalışsa da, bizim qələbəmizə kölgə sala bilməz, Azərbaycanı hansısa qondarma hərbi cinayətlərdə ittiham edə bilməz. Düşmənin bunun üçün əlində heç bir əsası olmadığını deyən ekspertlər vurğulayırlar ki, sözügedən kitabça Polşadakı erməni lobbisinin sifarişi ilə muzdlu “yazar” tərəfindən yazılıb, onlar Ermənistanın törətdiyi hərbi cinayətləri Azərbaycanın ayağına yazmağa cəhd edir, bununla da bizə qarşı saxta, əsassız ittihamlar irəli sürmək istəyirlər.
- “Birmənalı olaraq “Rüfət” ermənilərin yaratdığı saxta, qondarma profillərdən biridir”
Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun aparıcı elmi işçisi, elmlər doktoru Vaqif Abışov “Bakı-Xəbər”ə bildirdi ki, sözügedən kitabda yer alan məlumatlar da, müəllifin iddia etdiyi digər məsələlər də, Rüfət imzası da tamimilə saxta və əsassızdır. Anti-Azərbaycan mövqeyində yazılan bu kitabdakı məlumatların tamamilə saxta, əsassız olduğunu deyən V.Abışovun sözlərinə görə, o xaricdəki erməni lobbisinin sifarişi ilə yazılıb. “Azərbaycanın 44 günlük müharibədə qazandığı möhtəşəm zəfər, düşmənin terrorçu silahlı birləşmələrini torpaqlarımızdan qovub çıxarması, Ermənistanı kapitulyasiyaya məcbur etməsi, əlbəttə ki, bir çox xarici qüvvənin yuxusuna haram qatıb. Heç şübhəsiz ki, erməni lobbisi və ermənipərəst qüvvələr Azərbaycanın qələbəsindən ciddi ruhi-mənəvi, psixoloji böhran keçirir, onlar özlərini elə itiriblər ki, nə edəcəklərini bilmirlər. Bilirsiniz ki, həm 44 günlük müharibə dövründə, həm ondan əvvəl, həm də müharibədən sonra Azərbaycanı istəməyən qüvvələr ölkəmiz haqqında şər-böhtan dolu yazılar, kitablar yazdırıb çap edirlər, bununla da guya öz aləmlərində Azərbaycanı şantaj etmək istəyirlər. Xaricdəki anti-Azərbaycan qüvvələri, müxtəlif dövlətlər, o cümlədən də erməni lobbisi Azərbaycanın erməni işğalçılarına qarşı apardığı mübarizəni, torpaqlarımızı işğaldan azad etməsini, haqqı-ədaləti bərpa etməsini həzm edə bilmir və Ermənistanın cinayətkar əməllərini ört-basdır etmək üçün Azərbaycana qarşı şər-böhtan, qarayaxma kampaniyası aparırlar, həqiqətdən uzaq, saxtakarlıqdan yoğrulan bu cür üzdəniraq kitabçanın yazılmasını maliyyələşdirirlər, sonra da onun ətrafında erməni mətbuatının vasitəsilə çirkin kampaniya aparırlar. Pul verib sifarişlə bu üzdəniraq kitabçanı yazdıran erməni lobbisi Azərbaycanı qaralamağa cəhd etməklə, əslində, Ermənistanın Azərbaycana qarşı törətdiyi insanlıq əleyhinə hərbi cinayətlərini, Ermənistanın indiki və keçmiş cani, faşist hərbi-siyasi rəhbərlərinin terrorçuluq siyasətini gizlətmək istəyir. Bizim əlimizdə kifayət qədər fakt, sənəd, video və fotogörüntü var, onlar sübut edir ki, Ermənistan torpaqlarımızı işğalda saxladığı dövrdə hansı cinayətlər törədib, azad edilmiş torpaqlarımızda bir dənə də olsun salamat abidə, yaşayış evi, bina və sair qalmayıb. Bunları görməməyin özü böyük cinayətdir. Bu baxımdan, sözügedən üzdəniraq kitabçada bəhs olunanlar bizə qarşı həyata keçirilən qarayaxma kampaniyasının tərkib hissəsidir”.
Bu gün erməni lobbisinin Fransanın, Rusiyanın və digər ölkələrin mediasının bəzi üzdəniraq təmsilçilərini pulla ələ aldığını, onlara Azərbaycanı, ölkə başçımızı qaralamaq üçün sifarişlər verdiyini deyən V.Abışov hesab edir ki, polşalı üzdəniraq “publisist”in yazdığı kitabça da deyilənlərin əyani sübutudur: “Göründüyü kimi, bu saxta məlumatlar əsasında yazılan kitabçanın müəllifi polşalıdır. Nə üçün bu adam həqiqəti görüb, onu qiymətləndirmək istəmir? Bunun səbəbi aydındır. Buçek bu kitabçanı özbaşına yazmayıb, bunu erməni lobbisi maliyyələşdirib və ona saxta məlumatlar, həqiqətə uyğun olmayan informasiyalar əsasında kitab yazmağı sifariş edib. Bu adam normal yazar deyil, əgər o, normal, obyektiv yazar olsaydı, faktları qoyub, şərin-böhtanın arxasınca getməzdi və yalandan iddia etməzdi ki, “Azərbaycan bu kitabı çap etməməyim üçün mənə pul təklif edir”. Bu iddia tamamilə yanlışdır, həqiqəti əks etdirmir, Azərbaycan nə üçün belə cəfəngiyyat üçün kiməsə pul təklif etməlidir. Bu iddia tamamilə ağ yalandır. İndiyə qədər müxtəlif xarici qüvvələrin, erməni lobbisinin maliyyəsi və sifarişi ilə xaricdə Azərbaycan əleyhinə saysız məqalə, kitab nəşr olunub və bu nəşrlər vasitəsilə ölkəmizi qaralamağa cəhdlər edilib. Bu üzdəniraq kitabça da onlardan biridir. Azərbaycan nə üçün ona pul təklif etməli idi ki? Bu qətiyyən doğru deyil. Buçekin özünün milli mənşəyi şübhəlidir, onun polyak adı və soyadı daşıyan bir erməni olması da şübhə doğurmur. Belə baxanda Polşanın, polyakların Azərbaycana münasibəti müsbətdir. Hesab edirəm ki, ya bu saxtakar Buçekin əsli-kökü ermənidir, ya da o, erməni lobbisi tərəfindən satın alınan və Azərbaycan əleyhinə sifarişlər yerinə yetirən bir üzdəniraqdır. Onun Rüfət kimi təqdim etdiyi sosial şəbəkə istifadəçisinin də real şəxs olduğu şübhəlidir. Mən həmin məqalə ilə tanış olanda gördüm ki, Rüfət adı ilə verilən “cümlə”nin də yarısı qaralanıb. Bu da, açıq-aşkar, onun saxta bir profil olduğunu göstərir. Biz sosial şəbəkələrdə ermənilər tərəfindən yaradılan kifayət qədər saxta profilə rast gəlirik. Birmənalı olaraq, Rüfət ermənilərin yaratdığı saxta, qondarma profillərdən biridir, onlar saxta ad altında öz çirkin məqsədlərini həyata keçirmək istəyirlər. Bu, şübhəsiz, belədir. Burada real azərbaycanlıdan söhbət getmir”.
Ermənistanın hərbi-siyasi rəhbərlərinin cinayətkar əməllərinin bütün dünyaya məlum olduğunu deyən ekspert hesab edir ki, onların Gəncədə, Tərtərdə, Bərdədə, Beyləqanda, Ağdamda dinc əhaliyə qarşı törətdikləri faşizm cinayətlərinin beynəlxalq ictimaiyyətə tanıdılması istiqamətində işlərimizi sürətləndirməliyik.
V.Abışovun sözlərinə görə, Azərbaycan dövləti müharibə zamanı bir nəfər də olsun sivil erməninin burnunu qanatmayıb, əksinə, onların müharibə zonasını tərk etmələri üçün humanitar dəhliz yaradıb, dinc ermənilərə hər cür yardım göstərib, onları müalicə, yemək-içmək, geyimlə təmin edərək Ermənistana qaytarıb, Ermənistan isə bunun müqabilində azərbaycanlı əsirlərə qarşı amansız davranıb, hərbçilərimizin başına min cür oyun gətirib, hərbi qulluqçumuzun nəşinə od vuraraq yandırıb, onu da videoya çəkərək müxtəlif internet resurslarına yerləşdirib. Ermənistanın müharibə dövründə hərbi cinayətlərinin sayının bitib-tükənməz olduğunu deyən V.Abışovun sözlərinə görə, xarici müəlliflər bütün bunlar barədə kitablar yazmalı, Ermənistanın hərbi cinayətlərini ifşa etməlidirlər. Müsahibimiz onu da qeyd etdi ki, Azərbaycan dövlətinin Ermənistanın keçmiş və indiki hərbi-siyasi rəhbərliyinin, eləcə də ayrı-ayrı şəxslərin Azərbaycanın sivil vətəndaşlarına qarşı və sair törətdikləri cinayətlərə beynəlxalq hüquq müstəvisində qiymət verilməsi üçün başlatdığı işlər Ermənistanı və xaricdəki erməni lobbisini ciddi şəkildə əndişələndirir, bu səbəbdən də onlar belə üzdəniraq iddialarla dolu kitab yazdırıblar. “Real faktlar göz qabağındadır. Hərbi cinayətləri törədən Ermənistandır. Bunu dünya görməlidir. Məlum olduğu kimi, dəfələrlə cənab Prezident beynəlxalq təşkilatlara müraciət edərək onları ölkəmizə dəvət edib ki, onlar gəlib ermənilərin törətdikləri bütün hərbi cinayətləri gözləri ilə görsünlər, bunları qeydə alıb obyektiv bir hesabat hazırlasınlar. Bilirsiniz ki, cənab Prezident həm görüşlərində, həm çıxışlarında, həm də xarici KİV-ə müsahibələrində beynəlxalq təşkilatları azad olunmuş ərazilərimizə çağırıb. Ermənistan bizim ərazilərimizdə insanlığa yad, vandalizm cinayətləri törədib, hərbi əsirlərimizə necə işgəncələr veriblər. Bütün bunlar faktdır, ermənilər özləri də bunu etiraf edirlər. Siz Xocalı faciəsini yada salın. Bütün dünya Ermənistanın Xocalıda azərbaycanlılara qarşı hərbi cinayət törətdiyini, soyqırım aktı həyata keçirdiyini yaxşı bilir, bir sıra dövlətlərin parlamentləri Xocalı soyqırımını tanıyıb. Biz Ermənistanın törətdiyi hərbi cinayətlərə dair kifayət qədər nümunə gətirə bilərik. Bunun sayı tükənməzdir. Bu qədər fakt dünyaya məlum olduğu halda, bir nəfər polşalı üzdəniraqın götürüb erməni uydurmaları, saxtakarlığı əsasında belə bir kitabça yazması gülüncdür. Bu kitabça ilə ermənilər Azərbaycanın möhtəşəm zəfərinə kölgə sala bilməz, bu absurddur. Amma biz də buna qarşı etiraz səsimizi qaldırmalı, öz haqlı mübarizəmizi davam etdirməli, təbliğatımızı gücləndirməliyik. Buçek kimi cılız, xırda-xuruş, erməni lobbisinin, erməni terror təşkilatlarının əlində oyuncaq olan, onların sifarişini yerinə yetirib muzdlu kitabça yazan və ölkəmizə qarşı əsassız ittiham irəli sürən adamlar Azərbaycanın haqq işinə kölgə sala bilməz. Təəssüflər olsun ki, Polşada da ermənilərin puluna aldanıb Azərbaycana qarşı qara yaxmaq istəyənlər var. Azərbaycan dövləti ATƏT, BMT, Avropa İttifaqı, UNESCO, ISESCO və sair beynəlxalq təşkilatların tribunalarından Ermənistanın Azərbaycana, Azərbaycan vətəndaşlarına qarşı törətdiyi hərbi cinayətləri, insanlıq, bəşəriyyət əleyhinə terror aktlarını beynəlxalq ictimaiyyətə çatdırıb və çatdırmaqda da davam edir, Ermənistanın bu terrorçu, faşist hərəkətlərinə qiymət verilməsini tələb edir. Azərbaycan istəyinə nail olacaq və dünya ictimaiyyəti Ermənistanın hərbi-cinayətkar bir ölkə olduğunu nəhayət ki, qəbul edəcək, bu ölkənin indiki və keçmiş cani hərbi-siyasi rəhbərliyinin beynəlxalq məhkəmələr tərəfindən cəzalandırılması baş verəcək. Bu mütləq baş verəcək”.
İradə SARIYEVA
