Türk Şurası Azərbaycana ən həssas beynəlxalq təşkilat kimi... Prezidentin doğru mülahizəsi...
“Türk Şurası müharibə dövründə bizi hamıdan çox dəstəkləyən təşkilatdır”. Bu fikri Prezident İlham Əliyev Türkdilli Dövlətlərin Əməkdaşlıq Şurasının baş katibi Bağdad Amreyevi videoformatda qəbul edərkən deyib. Həmçinin, ölkə başçımız ona, eyni zamanda da TÜRKSOY-un rəhbərinə Azərbaycanı dəstəklədiklərinə görə təşəkkürünü bildirib.
Dövlətimizin başçısı Türk Şurasının baş katibinin müharibə dövründə və müharibədən sonrakı bəyanatlarını xatırladaraq deyib: “Müharibənin lap əvvəlində siz Azərbaycanı dəstəkləyən, ölkəmizin ərazi bütövlüyünü və suverenliyini, onun sərhədlərinin toxunulmazlığını dəstəkləyən bəyanat vermisiniz. Həmçinin, bəyan etmisiniz ki, münaqişə Azərbaycanın ərazi bütövlüyü çərçivəsində nizamlanmalıdır. Bu, müharibənin, praktiki olaraq, ikinci günü idi. Oktyabrın 20-də siz Gəncə şəhərinin ballistik raketlərlə bombalanmasını pisləyən bəyanatla çıxış etdiniz, Azərbaycan xalqına başsağlığı verdiniz. Daha sonra, oktyabrın sonunda siz münaqişənin BMT Təhlükəsizlik Şurasının qətnamələri çərçivəsində nizamlanmasının zəruri olması barədə bəyanatla çıxış etdiniz, Ermənistan tərəfindən Cenevrə konvensiyalarının pozulması barədə danışdınız. Siz mənə noyabrın əvvəlində məktubla müraciət etdiniz, ayın 2-də isə sizinlə Bakıda görüşdük və siz Azərbaycanı dəstəklədiyinizi bir daha bildirdiniz. 44 gün ərzində dörd dəfə Türk Şurasının baş katibi adından rəsmi bəyanat verildi”.
Prezident qeyd edib ki, biz bunu, həmçinin, hazırda sizin Azərbaycanda olmağınızı, işğaldan azad edilmiş ərazilərə səfər etməyinizi, eşitdiklərinizi və yəqin ki, qismən televizorda gördüklərinizi öz gözlərinizlə görməyinizi çox yüksək qiymətləndiririk. “Buna görə də sizə bütün Azərbaycan xalqı adından təşəkkürümü bildirmək istərdim. Türk Şurası müharibə dövründə bizi hamıdan çox dəstəkləyən təşkilatdır. Biz başqa təşkilatlara – İslam Əməkdaşlıq Təşkilatına da, Qoşulmama Hərəkatına da təşəkkür edirik. Bu müddətdə bizi dəstəkləyən ölkələrə təşəkkür edirik”, - deyə dövlətimizin başçısı bildirib.
- “...gələcəkdə bu qurumun mövqeyinin daha da güclənməsinə gətirib çıxaracaq”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli baki-xeber.com-a bildirdi ki, Azərbaycan Prezidenti İlham Əliyevin Türkdilli Dövlətlərin Əməkdaşlıq Şurasının baş katibi Bağdad Amreyevi qəbul edərkən Türk Şurasının dəstəyini, əməyini vurğulaması çox diqqətçəkən məsələdir və müsbət haldır: “Prezident İlham Əliyev Türk Şurasının xüsusilə də 44 günlük Vətən müharibəsi dövründə Azərbaycana verdiyi birmənalı dəstəyi yüksək qiymətləndirdi. Doğrudan da biz gördük ki, müharibənin ilk günlərindən Türk Şurası Azərbaycanın haqlı mövqeyinin yanında olduğunu bəyan edib. Bu anlamda sonrakı vaxtlarda da Türk Şurası öz dəstəyini ifadə edib, dəstək bəyanatları verib. Ölkə başçısının da qeyd etdiyi kimi, Şura 4 dəfə Azərbaycana dəstək bəyanatı verib. Prezident İlham Əliyev Türk Şurasının 44 günlük Vətən müharibəsində Azərbaycanla bağlı fəaliyyətinə, birmənalı olaraq, müsbət qiymət verdi.
Bilirsiniz ki, sonradan onların rəhbərliyi Azərbaycana gəldi və onlar prosesləri öz gözləri ilə görüb incələyiblər, bəyanatlarında da Azərbaycanın haqlı mövqeyini, ədalətli mübarizəsini əks etdirərək yayıblar. Bütün bunlar təqdirəlayiqdir. Biz görürdük ki, mövcud olan təşkilatlar arasında Qoşulmama Hərəkatı, İslam Əməkdaşlıq Təşkilatı və sair qurumlar Azərbaycana dəstək verdilər, amma şübhəsiz ki, onların arasında Azərbaycana ən yüksək dəstəyi Türk Şurası ifadə etdi. Müharibə dövründə biz Türkiyədən bütün lazımi dəstəyi aldıq, amma Orta Asiyadakı türk dövlətlərinin bir qədər çəkingən mövqeyi bizdə tez-tez narahatlıq doğurdu. Bununla belə, Türk Şurasına daxil olan Qazaxıstanın, Qırğızıstanın, o cümlədən də bu quruma daxil olmağa hazır olan Özbəkistanın Azərbaycanı dəstəkləməsi özünü daha çox Türk Şurasının timsalında ifadə etdi. Demək istədiyimiz odur ki, Türk Şurasının Azərbaycana böyük dəstək verməsi, əslində, Orta Asiyadakı türk dövlətlərinin də Azərbaycanın yanında olduğunu ifadə etdi. Hər halda, mən belə düşünürəm. Bütövlükdə, artıq orada müşahidəçi qismində olan Macarıstan da, Türkmənistan da, bu əməkdaşlığa can atan digər dövlətlər də bu anlamda Azərbaycanın haqlı mübarizəsinin yanında olduqlarını ifadə etmiş oldular. Bu baxımdan, biz Türk Şurasını daha da irəliyə aparmağa və onun beynəlxalq nüfuzunu daha da artırmağa çalışmalıyıq, buna nail olmalıyıq. Bu işdə Azərbaycan və Türkiyə daha fəal olmalıdırlar ki, Orta Asiyadakı, Avropadakı türk dövlətlərinin, yarımmüstəqil türkdilli respublikaların Türk Şurasının ətrafında tam olaraq birləşməsinə nail olunsun. Onların hamısını Türk Şurası ətrafında cəmləmək, birləşdirmək lazımdır”.
F.Ələkbərlinin sözlərinə görə, bütün hallarda, Türk Şurasının öz mövqeyini bildirməsi və Azərbaycanın yanında yer alması gələcəkdə onun perspektivinin daha da genişlənəcəyini deməyə əsas verir. “Türk Şurasının Azərbaycanın ədalətli mübarizəsinə böyük dəstək verməsi, ölkəmizin yanında olması gələcəkdə bu qurumun mövqeyinin daha da güclənməsinə gətirib çıxaracaq” - deyə bildirən F. Ələkbərli hesab edir ki, bütün bu prosesə isə Azərbaycanın və Türkiyənin öndərlik etməsi bütün Türk dünyasının Türk Şurasına inamının artmasına və onun ətrafında sıx birləşməsinə böyük perspektiv açır.
İradə SARIYEVA
