Məhərrəm Zülfüqarlı: “2022-ci il Şuşanın həyatında çox mühüm bir il olacaq və Şuşa Türk dünyasının mədəni paytaxtı olaraq dünyada böyük şöhrət qazanacaq”
“Ölkələrimiz arasında ilkin danışıqlar bizim ölkələrimizin və xalqlarımızın Azərbaycana kömək etmək əzminin çox möhkəm olmasını göstərdi. Biz hər il Türk dünyasının mədəni paytaxtını elan edirik. 2022-ci ildə Şuşanın belə paytaxt elan olunmasını və mədəni xarakterli çoxlu tədbirlər keçirilməsini təklif edirik”.
Bunu Türkdilli Dövlətlərin Əməkdaşlıq Şurasının baş katibi Bağdad Amreyev Prezident İlham Əliyevin videoformatda qəbulunda olarkən deyib.
Baş katib bildirib ki, bu tədbirlər Şuşanın bütün Türk və İslam dünyası üçün böyük mədəni əhəmiyyətini vurğulayar. “Biz bu məsələni xarici işlər naziri cənab Bayramovla da müzakirə etdik. Siz icazə versəniz, biz bu işə başlayarıq, 2022-ci ildə Şuşada 20-yə yaxın mədəni tədbir keçirərik. Əminik ki, o vaxta qədər Şuşa bərpa olunacaq, öz əvvəlki simasını alacaq. Biz həmişə Sizin yanınızda olmuşuq və həmişə Sizin yanınızda olacağıq” - deyə baş katib qeyd edib.
- “...gələcəkdə dünyanın mədəniyyət paytaxtlarından birinə çevriləcək”
AVCİYA-nın vitse-prezidenti, tanınmış siyasi icmalçı, professor Məhərrəm Zülfüqarlı bizimlə söhbətində bildirdi ki, Prezident İlham Əliyev tərəfindən Şuşa Azərbaycan mədəniyyətinin paytaxtı elan edildikdən sonra ölkə başçısının bu qərarına ISESCO, Türkdilli Dövlətlərin Əməkdaşlıq Şurası kimi təşkilatlar beynəlxalq dəstək verdilər. “Şuşa yalnız Azərbaycanın deyil, bütün Türk və İslam dünyasının tarixini, mədəniyyətini özündə birləşdirən əhəmiyyətli bir şəhərdir. Prezidentin Şuşanı Azərbaycanın mədəniyyət paytaxtı elan etməsi və Şuşanın bütün Qafqazın mədəniyyət paytaxtı funksiyasını yerinə yetirdiyini bildirməsi Şuşa şəhərinin mədəni, siyasi, tarixi, strateji əhəmiyyətini bir daha ortaya qoymuş oldu. ISESCO-nun və Türkdilli Dövlətlərin Əməkdaşlıq Şurasının Şuşa ilə bağlı irəli sürdükləri təşəbbüslər çox mühüm addımlardır və gələcəkdə böyük səmərə verəcək. Türkdilli Dövlətlərin Əməkdaşlıq Şurasının, ISESCO, İslam Konfransı Təşkilatı, İslam Əməkdaşlıq Təşkilatı və digər bu kimi qurumlar hər zaman Qarabağ probleminin həllində Azərbaycana dəstək olublar və ölkəmizin ədalətli mövqeyini dəstəkləyiblər. Bu gün də o dəstəyi davam etdirirlər, bu mənəvi dəstəkdir. Bu dəstək mütləq vacibdir. Çünki bu qələbəni Azərbaycanın müzəffər ordusu şəhid verə-verə, qəhrəmanlıq göstərə-göstərə əldə edib. Amma bu qələbəni möhkəmləndirmək, inkişaf etdirmək üçün beynəlxalq təşkilatların, ayrı-ayrı dövlətlərin buna dəstəyi lazımdır. Bu dəstəyin də biz günü-gündən artdığını görürük. Əlbəttə, bu, Azərbaycan Prezidentinin apardığı siyasətin nəticəsidir, həmin ölkələrlə, təşkilatlarla uzun illər həyata keçirilən diplomatik əlaqələrin nəticəsidir ki, biz bunu görürük. Ölkə başçısının dediyi kimi, Şuşa tam olaraq bərpa ediləcək, yenidən qurulacaq. İnanıram ki, Şuşa yalnız Azərbaycanın, Türk dünyasının mədəniyyət paytaxtları, İslam dünyasının paytaxtı statusu ilə məhdudlaşmayacaq, gələcəkdə dünyanın mədəniyyət paytaxtlarından birinə çevriləcək. Artıq bunun üçün zəmin formalaşmaqdadır. Çünki Şuşa Azərbaycanın incisidir, musiqisinin, mədəniyyətinin beşiyidir və biz bundan sonra bütün dünyaya Şuşadan baxmalıyıq. Şuşanın timsalında Azərbaycan mədəniyyətini təbliğ etməliyik. Hesab edirəm ki, 2022-ci il Şuşanın həyatında çox mühüm bir il olacaq və Şuşa Türk dünyasının mədəni paytaxtı olaraq dünyada böyük şöhrət qazanacaq”.
M.Zülfüqarlı hesab edir ki, Şuşa Türk dünyasının mədəni paytaxtı statusu daşıyandan sonra burada daha çox tədbir keçiriləcək, bütün Türk dünyasının diqqəti bir daha Şuşaya yönələcək. Azərbaycana ən çox dəstək verən ölkənin qardaş Türkiyə olduğunu qeyd edən professor M.Zülfüqarlı hesab edir ki, Türkiyə ilə yanaşı, bütün türkdilli ölkələr və İslam dünyası da ölkəmizin yanındadır. Bundan başqa, bizə strateji mütəffiq olan qeyri-türk və qeyri-islam dövlətlərinin də olduğunu deyən M.Zülfüqarlı hesab edir ki, biz bu imkanlardan istifadə edərək azad olunmuş ərazilərimizdə Azərbaycan dövlətçiliyini möhkəmləndirməliyik və bunların da önündə Şuşa durur. “Şuşaya yolun çəkilməsi, burada digər bütün işlərin görülməsi çox mühümdür. Şuşaya yol çəkilir. Bilirsiniz ki, yol mədəniyyətdir. Elan edildiyinə görə, Füzuli-Şuşa yolu sentyabr ayında istifadəyə veriləcək. Bu yol istifadəyə verildikdən sonra Şuşa sürətlə inkişaf edəcək və biz də bir azərbaycanlı kimi Şuşanın Azərbaycanın, Türk dünyasının, İslam aləminin mədəniyyət mərkəzi kimi öz funksiyasını yerinə yetirdiyini görüb qürur hissi keçirəcəyik ” - deyə M.Zülfüqarlı qeyd etdi.
İradə SARIYEVA
