Erməniləri Qarabağa zorla qaytarmaq planları iflasda - bir hissəsi Qərbə, bir hissəsi yenidən İrəvana qaçır…

Ramil Hüseynov: “Ötən müddət ərzində Ermənistan Qarabağı iqtisadi baxımdan dirçəldə bilmədi”

img

Erməni mediası yazır ki, Ermənistan müxtəlif vasitələrlə Qarabağdan gələn ermənilərin geri qayıtması üçün çalışsa da, onlar bunda maraqlı deyillər. Müxtəlif vasitələrlə geri qayıtmaqdan yayınırlar.

Sözügedən məsələ ilə bağlı Hetq.am saytı yazır ki, müharibə dövründə onminlərlə insan Qarabağdan Ermənistana gəlib: “Rəsmilər onları məcburi köçkün hesab etsələr də, onlara dəstək olmaq üçün heç bir tədbir görmürlər. Hökumətin dəstəyi yalnız adambaşına 137 dollar məbləğində birdəfəlik yardımın ayrılmasından ibarət olub. Əksinə, hökumət sakinlərin Ermənistandan Qarabağa qayıtmasına maraq göstərir. Məğlubiyyətdən sonra ağır iqtisadi böhran yaşayan ölkə milli valyutanın kursunu saxlamaq, koronavirusun iqtisadiyyata vurduğu sarsıdıcı zərbənin nəticələrini aradan qaldırmaq və s. ehtiyac duyur. Bu şəraitdə minlərlə insanı İrəvan və digər şəhərlərdə yerləşdirmək, onların məşğulluğunu təmin etmək və s. qayğılar yerinə, həmin ermənilərin qısa zamanda Qarabağa göndərilməsində maraqlıdır. Amma özü üçün Qarabağda perspektiv görməyən, korrupsiya, özbaşnalıq, işsizlik, təhlükəsizlik və qeyri-müəyyənlikdən əziyyət çəkən sakinlər bütün səylərə baxmayaraq, Qarabağa qayıtmaqda maraqlı deyillər. Əksinə, onlar qanuni və qanunsuz yollarla Ermənistanda qalmağa, bir hissəsi isə “qaçqın” statusu ilə Qərb ölkələrində sığınacaq almağa çalışırlar. Qarabağa gedənlərin bir qismi geri dönüb. Paşinyan hökumətinin səylərinə baxmayaraq,15 mindən çox erməninin Fransa, ABŞ, Almaniya, İtaliya və s. ölkələrin səfirliklərinə sığınacaq üçün müraciət etdiyi barədə xəbərlər yayılır. Xüsusən Fransa prezidenti Emmanuel Makronun göstərişi ilə ölkənin İrəvandakı səfirliyi Qarabağ ermənilərinin qaçqın statusu ilə Fransada sığınacaq almasına şərait yaradıb. Nəticədə Qarabağa qayıtmaq bir yana, Ermənistanda yaşamaq istəməyən Qarabağ ermənilərinin sayı kəskin artıb”.

Göründüyü kimi, ermənilər Qarabağa qayıtmaq istəmirlər. Baxmayaraq ki, Ermənistan buna çox çalışır.

“Bütün bunları görən ermənilər Qarabağa qayıtmağa həvəsli deyillər”

Sözügedən məsələ ilə bağlı fikirlərini baki-xeber.com-la bölüşən siyasi ekspert Ramil Hüseynovun sözlərinə görə, bütün bunlar real vəziyyətin acınacaqlı olmasından xəbər verir: “Əvvəla Ermənistan hakimiyyəti və Rusiya Dağlıq Qarabağı tərk edən ermənilərin geri dönməsinə çox çalışır. Rusiyanın belə fəallıq göstərməsinin səbəbi Kremlin regionla bağlı maraqları ilə bağlıdır. Çünki ermənilər geri qayıtmasa, o zaman Qarabağda rus sülhməramlılarının varlığına ehtiyac qalmayacaq. O üzdən, Rusiya, demək olar, hər gün filan sayda erməninin geri qayıtması barədə məlumat yayır. Ancaq bütün bunlara baxmayaraq, ermənilərin heç də hamısı geri qayıtmaqda maraqlı deyil. Yəni məsələlərə realist yanaşırlar. Reallıq ondan ibarətdir ki, ordumuz 44 gün ərzində Ermənistanın 30 illik gözləntilərini məhv etdi. Ermənilər gözləmirdilər ki, Azərbaycan Ordusu bu dərəcədə irəliləyib Şuşa şəhərini, Xocavəndin böyük hissəsini azad edəcək. Ancaq bütün bunlar baş verdi və ermənilərin imkanları əhəmiyyətli dərəcədə daraldı. Rusiya olmasaydı, olan-qalan əraziləri də itirəcəkdilər. Eyni zamanda, ötən müddət ərzində Ermənistan Qarabağı iqtisadi baxımdan dirçəldə bilmədi. Əksinə, bir sıra yaşayış məntəqələrini xaraba qoydular. Bütün bunları görən ermənilər Qarabağa qayıtmağa həvəsli olacaqlarmı? Əlbəttə ki, yox. Üstəlik, Ermənistanın özündə də iqtisadi vəziyyət acınacaqlıdır”.

Ekspert hesab edir ki, pandemiya ilə bağlı məhdudiyyətlər yumşalan kimi, ermənilər xarici ölkələrə üz tutacaqlar.

Vidadi ORDAHALLI

Son xəbərlər