Rusiyanın xarici işlər naziri Sergey Lavrov 2020-ci ilin yekunları ilə bağlı keçirdiyi mətbuat konfransında jurnalistin “Azərbaycan tərəfi Ermənistan rəsmilərinin Dağlıq Qarabağa səfər etməsinə etiraz edir.
Ermənistan rəsmilərinin Dağlıq Qarabağa səfəri zamanı niyə Azərbaycan tərəfindən icazə alınmır və Rusiya sülhməramlıları bu məsələni necə nizamlayacaq” sualına cavabında deyib: “Bütün razılaşmalarda, hər şeydən öncə 10 noyabr Bəyanatında Rusiya sülhməramlılarının nəzarətində olan Laçın dəhlizi ilə Ermənistanla Dağlıq Qarabağ arasındakı əlaqənin təmin olunacağı əksini tapıb”.
S.Lavrov bildirib ki, Dağlıq Qarabağla Ermənistan arasında əlaqəni heç kim heç vaxt inkar etməyib: “Məhz buna görə Laçın dəhlizi konsepsiya kimi heç kim tərəfindən inkar edilməyib. Ona görə də bu, azərbaycanlı qonşularımız da daxil olmaqla, bütün tərəflərin razılığının predmetidir. 10 noyabr Bəyanatında Laçın dəhlizinə paralel olaraq yeni dəhlizin, eyni zamanda Azərbaycanın qərb rayonları ilə Naxçıvan arasında dəhlizin yaradılması əksini tapıb. Ermənistan rəsmiləri Dağlıq Qarabağdakı humanitar fəaliyyətə cəlb olunub. Ona görə də bu əlaqələrə mane olmaq üçün bir səbəb görmürəm”.
Lavrov bununla demək istəyir ki, Ermənistanın da Dağlıq Qarabağla əlaqəsi olmalıdır və bu yanaşma 10 noyabr Bəyanatına uyğundur. Yəni Lavrov demək istədi ki, Ermənistan rəsmilərinin Dağlıq Qarabağa səfərlərində anormal heç nə yoxdur. Lavrovun sözlərindən belə çıxır ki, guya buna Azərbaycan tərəfi də etiraz etmir. Halbuki, Azərbaycan Prezidenti İlham Əliyev yanvarın 6-da verdiyi açıqlamada Ermənistanın xarici işlər nazirinin Azərbaycan torpaqlarına qanunsuz gəldiyini və Rusiya hərbçilərinin səlahiyyətlərini aşdıqlarını bildirib. Lavrovun bu mövqeyindən başqa hansı nəticələri çıxarmaq olar?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Lavrov yenə ikibaşlı danışıb: “Qarabağla Ermənistanı birləşdirən Laçın dəhlizi ilə bağlı məsələ doğrudan da razılaşmada var. Bununla paralel olaraq, həmin sənəddə Mehri və başqa dəhlizlərdən də söhbət gedir. Hələlik bunlardan istifadə olunanı yalnız Laçın dəhlizidir. Ancaq bu heç də o anlama gəlmir ki, həmin dəhlizdən ermənilər və ya Rusiya sülhməramlıları necə istəyirsə, elə də istifadə edəcək. Razılaşmadan sonra dəfələrlə gördük ki, Ermənistan şərtləri pis formada pozur. Həmin dəhlizdən istədiyi kimi istifadə edir. Hətta öz rəsmilərini belə Qarabağa göndərir. Burada məsuliyyət birbaşa sülhməramlıların üzərinə düşür. Azərbaycan qətiyyən bununla razı ola bilməz. Narazılıq ən sərt formada Ermənistanın diqqətinə çatdırılıb. Bununla bağlı Prezident mövqe ifadə edib, XİN bəyanat verib. Dəhlizə razılıq vermək o anlama gəlmir ki, oradan Ermənistan necə istəyirsə, elə də istifadə etsin”.
Ekspertin sözlərinə görə, məhz bu məqama görə də Rusiya rəsmiləri dəhlizin mövcudluğu ilə ondan necə istifadə olunacağına dair məsələni bir-birinə qarışdırmamalıdır: “Bunlar fərqli məna daşıyır. Yaxşı olar ki, Rusiya bu məsələdə öz üzərinə götürdüyü öhdəliklərə riayət etsin. Hələ ki, Azərbaycanın marağına uyğun olan dəhlizlərdən istifadəyə başlanmayıb. Yaxşı olardı, Ermənistan öhdəliklərə əməl etsin. Belə davam edərsə, Azərbaycan Laçın dəhlizi ilə bağlı yanaşmanı dəyişə bilər. Rusiya rəsmiləri isə bu yöndə verdikləri bəyanatlarla bağlı məsuliyyət yükünü ciddi anlamalıdırlar”.
Məhəmmədəli QƏRİBLİ
