İlqar Hüseynli: “Azərbaycan Konstitusiyasının imkan verdiyi şərtlər altında yeni metodlar tətbiq olunacaq”
Prezident İlham Əliyev Sumqayıt Kimya Sənaye Parkında “Azərsulfat” MMC-nin sulfat turşusu istehsalı, “Glassica” QSC-nin şüşə tara məhsullarının istehsalı zavodlarının təməlqoyma və “Azerfloat” QSC-nin termoformasiya metodu ilə vərəqə şüşə istehsalı müəssisəsinin açılış mərasimlərindən sonra Azərbaycan Televiziyasına müsahibəsində bildirib ki, azad edilmiş torpaqlarda hər şey planlı şəkildə, düzgün aparılmalıdır:
“Azad edilmiş torpaqların idarə edilməsi ilə bağlı məndə fikirlər var. Bu fikirlər yaxın zamanlarda həyata keçiriləcək. O bölgələrdə mövcud olan vəziyyətə uyğun müasir idarəetmə sistemi qurulmalıdır ki, orada hər şey planlı şəkildə təmin edilsin - şəhərsalma, dövlət orqanlarının funksiyaları...”
Prezidentin sözlərinə görə, əfsuslar olsun ki, ölkəmizin müxtəlif yerlərində bəzi xoşagəlməz hallar məhz nəzarətsizlik ucbatından baş verir: “Bəzi yerlərdə torpaqlar zəbt edilir, insanların əlindən alınır, qeyri-ədalətli şəkildə bölünür. O cümlədən su resursları qeyri-ədalətli şəkildə bölünür, bəzilərinə su çatır, bəzilərinə su çatmır. Bütün bunlar bizə yaraşmır. Biz özümüzü bu qüsurlardan təmizləməliyik və təmizləyirik. Təmizləmə prosesi gedir və gedəcək. Hər kəs bunu bilsin. Heç kim hesab etməsin ki, onun hansısa xüsusi imtiyazı var. Yaxud da ki, kimsə özünü toxunulmaz hesab etməsin. Azad edilmiş torpaqlarda hər şey, demək olar ki, dağıdılıb. Ona görə biz elə bir inkişaf modeli qurmalıyıq ki, ondan sonra biz onu bütün başqa torpaqlara da, necə deyərlər, transfer edə bilək, mövcud qüsurlar aradan qalxsın və ölkəmizin uğurlu inkişafı təmin edilsin. Mənim, əlbəttə ki, əsas işim Qarabağ məsələsinin həlli və sentyabr ayından başlayaraq gedən müharibəyə Ali Baş Komandan kimi rəhbərlik etməyim idi. Bu gün də mənim fəaliyyətimdə o bölgələrin - Qarabağ bölgəsinin bərpası xüsusi yer tutur. Bu təsadüfi deyil, bu təbiidir. Ancaq eyni zamanda, mən ənənəvi iş fəaliyyətimə də həmişə diqqət yetirmişəm. Sumqayıta gəlməyim onu bir daha göstərir. Müharibə başa çatdı, müzəffər Ordumuz müharibədə qələbə çaldı, düşməni məğlub etdi. Azad olunmuş torpaqların bərpası üçün əlimizdən gələni edəcəyik. Hər gün mənim işimin əsas hissəsi buna həsr olunur. Ancaq digər ərazilərin inkişafı da heç vaxt yaddan çıxmayacaq, Azərbaycan xalqı əmin ola bilər. Əminəm ki, biz bu ili də uğurla başa vuracağıq, daha güclü Azərbaycan quracağıq”.
Göründüyü kimi, ölkə başçısı azad edilmiş torpaqların idarə olunması ilə bağlı müasir idarəetmə sistemi qurulmasının zəruriliyindən danışıb. Bu istiqamətdə hansı növ idarəetmənin tətbiqi daha məqsədəuyğun sayıla bilər?
Sosial-strateji Tədqiqatlar və Analitik Araşdırmalar İctimai Birliyinin sədri İlqar Hüseynli “Bakı-Xəbər”ə açıqlamasında bildirdi ki, bu olduqca maraqlı yanaşmadır: “Azərbaycan dövlətinin oturuşmuş idarəetmə modeli var. Bura mərkəzi icra hakimiyyəti və onun yerlərdəki funksiyalarını icra edən qolları aiddir. Azərbaycanda hansısa bölgəyə tamamilə fərqli idarəetmənin tətbiqi mümkün deyil. Prezident bununla Qarabağ bölgəsində strukturlaşmış bir sistemin yaradılmasını istəyir ki, bərpa işləri daha çevik formada getsin.
Ancaq ola bilər ki, Prezidentin daha yeni fikirləri var. Hər halda, belə fikir olacaqsa, biz bunun ictimai müzakirələrə buraxılacağını görə bilərik. Yəqin ki, Prezident köhnə nomenklaturanın tamamilə yenilənməsini nəzərdə tutur. Hazırda işğaldan azad edilən rayonlarımızın idarəetməsində təmsil olunanların böyük əksəriyyəti Bakıda və paytaxta yaxın ərazilərdə məskunlaşıb. Yəni həmin qurumlar formal olaraq rayonla işləyiblər. Ərazi olmayıb, daha çox əhali ilə işləyiblər. Hazırda bir qədər çeviklik lazımdır. Çünki həm ərazi var, həm də orada görüləcək böyük işlər bizi gözləyir. Hətta lazım gəlsə, həmin rayonların icra hakimiyyətləri səhra şəraitində özlərinə düzən qurub işləməlidirlər. Elə rayon var ki, onun icra başçısı hələ də rayona getməyib. Biz bunu sosial şəbəkələrdəki etirazlardan görürük”.
Ekspertin sözlərinə görə, həmin ərazilərdə bələdiyyələrin işinin yaxşı təşkilinə zərurət var: “Hesab edirəm ki, Azərbaycan Konstitusiyasının imkan verdiyi şərtlər altında yeni metodlar tətbiq olunacaq. Çünki çox böyük investisiya layihələrinin icrası üçün mütləq mənada yeni yanaşmaya, çevik idarəetməyə ehtiyac var”.
Məhəmmədəli QƏRİBLİ
