Xoşagəlməz faktların çoxu nəzarətsizlikdən baş verir - Prezident məmur-cəmiyyət münasibətlərinə yenidən qayıtdı...
“Əfsuslar olsun ki, ölkəmizin müxtəlif yerlərində bəzi xoşagəlməz hallar məhz nəzarətsizlik ucbatından baş verir. Bəzi yerlərdə torpaqlar zəbt edilir, insanların əlindən alınır, qeyri-ədalətli şəkildə bölünür. O cümlədən, su resursları qeyri-ədalətli şəkildə bölünür, bəzilərinə su çatır, bəzilərinə su çatmır. Bütün bunlar bizə yaraşmır. Biz özümüzü bu qüsurlardan təmizləməliyik və təmizləyirik. Təmizləmə prosesi gedir və gedəcək. Hər kəs bunu bilsin...”
Bunu Prezident İlham Əliyev Sumqayıt Kimya Sənaye Parkında “Azərsulfat” MMC-nin sulfat turşusu istehsalı, “Glassica” QSC-nin şüşə tara məhsullarının istehsalı zavodlarının təməlqoyma və “Azerfloat” QSC-nin termoformasiya metodu ilə vərəqə şüşə istehsalı müəssisəsinin açılış mərasimlərindən sonra Azərbaycan Televiziyasına müsahibəsində bildirib.
Bildiyimiz kimi, bəzi səlahiyyətli məmurlar öz üzərlərinə düşən vəzifələri layiqincə yerinə yetirmir, fəaliyyətlərində ədalətsizliyə yol verirlər. Əlbəttə, bunun da başlıca səbəblərindən biri nəzarətin, daha dəqiq desək, ictimai nəzarətin ya olmaması, ya da zəif təşkil edilməsidir.
- “Yerli və mərkəzi icra hakimiyyətlərində qeyri-hökumət təşkilatlarının,vətəndaş cəmiyyətinin nümayəndələri təmsil olunmalıdırlar”
Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə bildirdi ki, ölkə başçısının yenidən məmur-cəmiyyət münasibətləri məsələsini vurğulaması, baş verən bu neqativ halların nəzarətsizlik ucbatından olduğunu deməsi ictimai nəzarətin gücləndirilməli olduğunu bir daha gündəmə gətirir. Müsahibimiz qeyd etdi ki, çox zaman dövlət qurumlarında yaradılan ictimai şuralar öz nəzarətetmə funksiyasını normal şəkildə yerinə yetirə bilmir, bu üzdən də sözgedən sahələrə bəzi məmurların ədalətsiz yanaşması müşahidə edilir. R.Zeyni hesab edir ki, ictimai şuraların fəaliyyəti gücləndirilməlidir, əgər ictimai nəzarət formallıqdan əməli işə keçsə, bu problemlər aradan qalxa bilər: “Cənab Prezidentin vurğuladığı məsələ onu deməyə əsas verir ki, ölkəmizdə məmurların fəaliyyətinə ictimai nəzarət zəifdir və bu iş gücləndirilməlidir. Bilirsiniz ki, cənab Prezident hər zaman vətəndaş cəmiyyətinin fəaliyyətinin genişləndirilməsi, şəffaflığın artırılması, ictimai nəzarətin gücləndirilməsi ilə əlaqədar cəmiyyətə çağırışlar edib, mesajlar verib. Bu çağırışlar tam məntiqidir. Çünki biz nə qədər inkişaf etsək də, məmur nə qədər ədalətli olsa da, yenə də ictimai nəzarətə böyük ehtiyac var. Bu, dəfələrlə ölkə başçısının cəmiyyətə çağırışlarında vurğulanıb. Birmənalı şəkildə vətəndaş cəmiyyətinin ictimai nəzarəti bütün sahələrdə təmin etməsi çox vacibdir. Biz də ölkə başçısının çağırışlarına uyğun olaraq, bütün məqamlarda məhz şəffaflığın artırılması, açıq hökumətin təşviqi, rəqəmsal hökumətin yaranması, rəqəmsal idarəetmənin tətbiq edilməsi və eyni zamanda, sosial ictimai nəzarətin gücləndirilməsi ilə bağlı məsələni həmişə gündəmdə saxlamışıq, qanunun tələblərinin yerinə yetirilməsini tələb etmişik”.
R.Zeyni bildirdi ki, “İctimai iştirakçılıq haqqında” Qanun 2014-cü il iyunun 1-dən qüvvəyə minib və bununla əlaqədar olaraq bütün yerli və mərkəzi icra hakimiyyəti orqanlarında ictimai nəzarət mexanizmi qanunun tələblərinə uyğun olaraq yerinə yetirilməlidir: “Yerli və mərkəzi icra hakimiyyətlərində qeyri-hökumət təşkilatlarının, vətəndaş cəmiyyətinin nümayəndələri təmsil olunmalıdırlar, onların fəaliyyəti real şəkildə təmin edilməlidir ki, məmur özbaşnalığına son qoyulsun. Məmur özbaşnalığına son qoyulmalıdır ki, hər hansı bir idarə və müəssisədə ədalətsizlik baş verməsin, kim necə istəyirsə, o cür hərəkət etməsin, qanunun tələblərinə, həmin idarələrin konsepsiyasına, dövlətimizin inkişafına uyğun hərəkət etsin. Bu çox vacibdir. Ona görə də biz də cənab Prezidentin çağırışlarını bir daha dəstəklədiyimizi bildiririk. Bilirsiniz ki, Prezidentin köməkçisi Hikmət Hacıyev bu yaxınlarda bilavasitə yerli və mərkəzi icra hakimiyyətində ictimai şuralara birbaşa məsuliyyət daşıyan şəxslərlə toplantı keçirdi, bir daha bu məsələnin aktual və vacib olduğunu gündəmə gətirdi. 11 dövlət qurumunda ictimai şura olsa da, qalanlarında yoxdur. Məndə olan məlumata görə, ictimai şura olmayan qurumlar da qanunun tələblərinə uyğun olaraq ictimai şuraların yaradılmasına başlayıblar. Amma bir məsələni qeyd etmək istəyirəm, ictimai şuraları görüntü naminə yaratmaq lazım deyil, bu şuranı faktiki yaratmaq lazımdır və fəaliyyət göstərən, cəmiyyətə xeyir verə bilən şura yaratmaq gərəkdir. Yox ki, yaratdılar və yaratdıqlarına dair məruzə etdilər. İş bununla bitmir. İctimai şuralar var, onlar fəaliyyət göstərirlər, lakin biz onların fəaliyyətindən razı deyilik. Çünki fəaliyyət göstərməklə görüntü yaratmaq fərqli məsələlərdir”.
İradə SARIYEVA
