Azad rayonlarımızda erməni vəhşilik izlərinin beynəlxalq təqdimatı genişlənir - ISESCO, Türk dünyasının birgə təşkilatları...

Dəyanət Osmanlı: “30 ildir erməni vəhşilikləri barədə aparılan təbliğatlar bəhrəsini verir”

img

Azad edilmiş Azərbaycan ərazilərinə UNESCO və digər Avropada fəaliyyət göstərən beynəlxalq təşkilatlar missiya göndərmək istəməsələr də, İslam və Türk dünyasını əhatə edən təşkilatlar bölgəyə səfər edirlər, düşmənin törətdikləri vəhşiliklərin, vandalizm aktlarının dəhşətlərini öz gözləri ilə görürlər. 

ISESCO-nun baş direktorunun rəhbərliyilə missiyasının səfərindən sonra Beynəlxalq Türk Mədəniyyəti Təşkilatının (TÜRKSOY), Türkdilli Dövlətlərin Əməkdaşlıq Şurasının (TDƏŞ), Beynəlxalq Türk Mədəniyyəti və İrsi Fondunun nümayəndə heyəti işğaldan azad olunan Füzuli rayonuna səfər edib.

Əvvəlcə qonaqlar Füzuli-Şuşa yolunun tikintisi ilə tanış olublar, Füzuli şəhərinin xarabalıqlarına baxıblar. Füzuli şəhərində dağıdılmış məscidin və “Araz” qəzetinin binalarına baxıblar.

  • “Bu səfər, eyni zamanda, Türk dünyası birliyinin ifadəsidir və düşünürəm, digər beynəlxalq təşkilatlara da nümunə olacaq”

Bütün bunların erməni vəhşiliyinin, vandalizminin beynəlxalq aləmdə tanıdılmasına böyük perspektivlər açdığını deyən “Türk Dünyası İnfo” İctimai Birliyinin rəhbəri, şair-publisist, Azərbaycanda Atatürk Mərkəzinin baş redaktoru Dəyanət Osmanlı “Bakı-Xəbər”ə bildirdi ki, bu amil islam və türk birliyini  ortaya qoyur: “Azərbaycanın Qarabağ zəfərindən sonra cərəyan edən proseslərdən bəlli olur ki, artıq beynəlxalq təşkilatlar vəziyyətlə əyani tanış olmaq üçün bölgəyə səfərlərə diqqət yetirirlər. Artıq  fəaliyyətlərində demokratiya və humanizm prinsiplərini qoruyan qurum və ölkələr erməni vandalizminin bəşəri cinayətlərindən sonuncusunu - Qarabağdakı ağlasığmaz dağıntıları görmək istəyirlər.  Bu, Azərbaycan dövlətinin düzgün qurulmuş siyasətinin nəticəsidir ki, 30 ildir erməni vəhşilikləri barədə aparılan təbliğatlar bəhrəsini verir.

Türk Mədəniyyəti Təşkilatının (TÜRKSOY), Türkdilli Dövlətlərin Əməkdaşlıq Şurasının (TDƏŞ), Beynəlxalq Türk Mədəniyyəti və İrsi Fondunun nümayəndə heyətinin işğaldan azad olunan Ağdam və Füzuli rayonlarına bu günlərdə baş tutan səfərini təqdir edirəm. Nümayəndələr TDƏŞ-in baş katibi Bağdat Amreyev, TÜRKSOY-un baş katibi Düsen Kaseinov, Türk Mədəniyyəti və İrsi Fondunun prezidenti Günay Əfəndiyeva, TDƏŞ baş katibinin müavini Qismət Gözəlov, Xarici İşlər Nazirliyinin İkinci Avropa idarəsinin rəis müavini Zamin Əliyev, TDƏŞ-in layihə direktorları Fərrux Cumayev, Bobur Taqayev, TÜRKSOY-un təmsilçisi Elçin Qafarlı  ictimai-siyasi arenada kifayət qədər tanınmış, nüfuzlu insanlardır. Onların doğma ölkəyə səfərləri və gördükləri mənzərələr özlüyündə hər biri mötəbər informasiya deməkdir. Bu səfər, eyni zamanda. Türk dünyası birliyinin ifadəsidir və düşünürəm, digər beynəlxalq təşkilatlara da nümunə olacaq, gələcəkdə daha da intensiv xarakter alacaq. Nümayəndələr xarabalıqlara baxıblar. Ağdam şəhər məscidində, Dram Teatrının və çörək muzeyinin binalarında da olan nümayəndə heyəti Qarabağ xanlığının əsasını qoyan Pənahəli xan Cavanşirin imarətini və türbəsini ziyarət ediblər və onlarda çox üzgün təəssüratlar yaranıb.

Ermənilər tərəfindən tamamilə məhv edilən şəhər və kəndlərimizin, sosial-mədəni obyektlərimizin, tarixi abidələrimizin, məzarlıqlarımızın hesabı mütləq beynəlxalq məhkəmələrdə onlardan sorulacaqdır. Zaman və siyasət erməni terror dövlətinin, türk düşmənlərinin əleyhinə istiqamətlənib”.

D.Osmanlının fikrincə, gələcəkdə vəziyyət o yerə gəlib çatacaq ki, indi ermənilərə dəstək verənlər də yanlışı anlayıb onlardan uzaqlaşacaqlar. “Əminəm, dünyaya soyqırım yalanları, fitnə sırıyıb, “dərdli əzabkeş” roluna girən və bununla ayaqda durmağa çalışan ermənilər daha acınacaqlı duruma düşəcəklər. Belə olduğu halda, terrorcu hərəkətlərindən, ərazi iddialarından əl çəkmədikcə, onlar sovet hakimiyyətinin ilk illərində bolşeviklərin köməyilə zəbt etdikləri tarixi torpaqlarımızı da könüllü şəkildə tərk etmək məcburiyyətində qalacaqlar. Azərbaycan zəfəri necə böyük əzmlə qazanıbsa, heç kimin şübhəsi olmasın, torpaqların bütövlüyünü də eləcə də qoruyacaq” - deyə ekspert qeyd etdi.

İradə SARIYEVA

Son xəbərlər