Son vaxtlar Azərbaycan və Ermənistan ziyalılarının bir araya gəlməsi ilə bağlı çağırışlar səslənir. Hesab olunur ki, bu kimi görüşlər tərəflər arasında münasibətlərin qurulmasına müsbət təsir edə bilər.
Rusiya Xarici İşlər Nazirliyinin nümayəndəsi Mariya Zaxarova bildirib ki, ölkəsi Azərbaycan və Ermənistan ictimai xadimlərinin humanitar xarakterli təşəbbüslərini alqışlayır: “Biz Azərbaycan və Ermənistan ziyalıları arasında birbaşa dialoqun qurulmasını, eləcə də iki ölkə arasında humanitar xarakterli birgə tədbirlərin keçirilməsini hər vəchlə alqışlayardıq. Bizim fikrimizcə, bu cür təşəbbüslər barışıq, etimad, qarşılıqlı anlaşma atmosferinin formalaşmasına kömək edir, həm Azərbaycan və Ermənistan xalqlarına, həm də bütün Cənubi Qafqaz regionuna, deməli, Rusiya Federasiyasına fayda verir. Əgər Bakı və İrəvan bu istiqamətdə səmimi hərəkət etmək əhval-ruhiyyəsində olduqlarını nümayiş etdirsələr, Rusiya tərəfi, şübhəsiz ki, belə humanitar aksiyalara dəstək verəcək”.
O da məlumdur ki, Ermənistan 44 günlük müharibədə ağır məğlubiyyətə uğrasa da, ölkədə revanşist xarakterli çağırışlar səslənir. İstər hakimiyyətə qarşı radikal mövqedən çıxış edən müəyyən müxalif qüvvələr, istərsə də digər qüvvələr məğlubiyyəti qəbul etmək istəmirlər. Onların arasında bəzi erməni ziyalıları da var. Belə olan halda, maraqlıdır, Ermənistanda revanşizm hələ sönməyə üz tutmayıbsa, o zaman ziyalılararası dialoqun keçirilməsinin nə mənası var? Bunun hansısa əhəmiyyəti ola bilər?
“Bu toplum Azərbaycana qarşı düşmənçilik edir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bunu istisna etdi: “Ermənistan və Azərbaycan arasında sülhün əldə edilməsi üçün müəyyən əlverişli zəmin yaranmalıdır. İndiki məqamda bununla bağlı ictimai prosesin başlaması və xalq diplomatiyasının tətbiqi faydasızdır. İlk növbədə, Rusiyadan belə bir açıqlama verilirsə, demək, bunun heç bir perspektivi yoxdur. Çünki Rusiya iki dövlət arasında sülhün əldə edilməsində maraqlıdırsa, ilk növbədə, 10 noyabr razılaşmasında irəli sürülən bəndlərə əməl edilməsinə çalışmalıdır. Ermənistan silahlı qüvvələrinin bir qismi və silahlı erməni dəstələri Qarabağın sülhməramlı qüvvələrin nəzarətində olan ərazilərində qalırsa, heç bir xalq diplomatiyasından söhbət belə getməz. Rusiya belə səmimidirsə, bu bəndlərə əməl etdikdən sonra Azərbaycan burada maraqlı ola blər. Yaxşı olardı ki, Zaxarova bu barədə fikirləşsin. Ümumiyyətlə, Ermənistan vətəndaş cəmiyyətində, ziyalılar arasında revanş xarakterli çağırışlar azalmır. Ona görə də belə bir cəmiyyətlə xalq diplomatiyası fayda verməyəcək. Xalq diplomatiyası, ümumiyyətlə, ermənilərin maraqlarında deyil. Bu toplum Azərbaycana qarşı düşmənçilik edir. Belə bir vəziyyətdə ziyalılar arasında hansısa görüşlərin keçirilməsi elə bir fayda verməyəcək”.
Politoloq onu da qeyd etdi ki, Ermənistan hələlik ciddi dialoqa hazır görünmür.
Vidadi ORDAHALLI
