Ermənistanla sərhəddə Azərbaycan Ümumqoşun Ordusunun Türkiyə ilə birgə hərbi təlimləri...

Ramil Məmmədli: “Bu, eyni zamanda, iki qardaş ölkə ordusunun birgə döyüş aparma vərdişlərini daha da inkişaf etdirəcək”

img

Qardaş Türkiyə Respublikasının Qars şəhərində keçiriləcək “Qış təlimi-2021”də Əlahiddə Ümumqoşun Ordunun hərbi qulluqçuları da iştirak edəcək. Təlimə cəlb edilmiş şəxsi heyət və hərbi texnikaların təlim yerinə yola salınması münasibətilə mərasim keçirilib.

Müdafiə Nazirliyindən verilən məlumata görə, yolasalma mərasimində Dövlət Himni səsləndirildikdən sonra çıxış edən general-mayor Fazil Ağalarov inkişaf edən Azərbaycan-Türkiyə hərbi-texniki əməkdaşlığından, hər il Naxçıvan və Qars şəhərlərində keçirilən birgə hərbi təlimlərin əhəmiyyətindən, müzəffər Ordumuzun Vətən müharibəsində qazandığı şanlı qələbədən danışaraq, “Qış təlimi-2021”də iştirak edəcək bölmələrə uğurlar arzulayıb. Çıxışların ardından təlimə cəlb edilmiş bölmələr Naxçıvan şəhərindən Sədərək sərhəd-keçid məntəqəsinə doğru yola düşüb. Araz çayı üzərindəki “Ümid” körpüsündən keçən bölmələrimiz Qars şəhəri istiqamətində hərəkəti davam etdirib.

Qeyd edək ki, Türkiyənin Qars şəhəri həm də Ermənistanla sərhəd ərazi sayılır. Bu baxımdan da belə birgə təlimin keçirilməsi hansı əhəmiyyətə malik ola bilər?

 Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, 1994-cu ildən başlayaraq Azərbaycan və Türkiyə silahlı qüvvələri arasında hərbi, hərbi-siyasi və hərbi-texniki əməkdaşlıq yeni müstəviyə keçdi: “Xüsusilə də  1994-cü ilin fevral ayında imzalanan məlum müqavilədən sonra iki qardaş ölkənin hərbi  qurumları daha dərin formada əməkdaşlığa start verdilər. Bunun məntiqi nəticəsini biz bu illər ərzində əldə olunan uğurlarda görürük. 44 günlük Vətən müharibəsi dönəmində Türkiyənin nümayiş etdirdiyi mövqe bunu bir daha təsdiqləmiş oldu.  Azərbaycan Ordusuna aid olan Əlahiddə Ümumqoşun Ordusunun Türkiyənin Qars şəhərində keçirilən  irimiqyaslı hərbi təlimlərdə iştirakı da məhz qeyd olunan hərbi əməkdaşlığın və əlaqələrin məntiqi davamıdır. Belə təlimlər ordunun döyüş ruhunu artırır və  bu yöndə olan vərdişləri daha da təkmilləşdirir. Naxçıvan strateji cəhətdən Ermənistanla həmsərhəd bölgədə yerləşir. Belə bir regionda güclü ordu birləşmələrinin olması vacib şərtdir. Bu istiqamətdə Türkiyə ordusu ilə sıx əməkdaşlıq etmək daha məqsədəuyğundur. Çünki Naxçıvan MR həm də Türkiyə ilə quru sərhədinə malikdir”.

Ekspertin sözlərinə görə, Əlahiddə Ümumqoşun Ordunun zabit və şəxsi heyətinin dünyanın ən müasir ordusuna sahib olan ölkədə təlim keçməsi çox sevindiricidir: “Bunun ordumuzun inkişafına yalnız müsbət təsiri olacaq. Nisbətən risqli sayılan ərazimizin təhlükəsizliyinin daha etibarlı təşkili çox zəruridir. Bu, eyni zamanda, iki qardaş ölkə ordusunun birgə döyüş aparma vərdişlərini daha da inkişaf etdirəcək”.

Məhəmmədəli QƏRİBLİ

Son xəbərlər