Bu gün Azərbaycan hərb müstəvisində dünyanın yenə ən güclü ölkələri sırasında yer almaqda, bu səpkidə mövqelərini daha da gücləndirməkdədir. Bu fonda qeyd edək ki, nüfuzlu “Global Firepower” təşkilatının 2021-ci il üçün dünyanın ən yaxşı orduları ilə bağlı açıqladığı reytinq cədvəli də Azərbaycan ordusunun gücünün artıq beynəlxalq miqyasda etirafının daha bir təsdiqidir. Bu il üçün açıqlanan cədvəldə 138 ölkənin ordusu arasında Azərbaycan 64-cü olub. Qonşu Gürcüstan ordusu 92-ci, Ermənistan ordusu isə 100-cü yerdədir. Beləliklə, ordumuz Ermənistan silahlı qüvvələrindən 36 pillə yüksəkdə qərarlaşıb. Belə vəziyyətdə Azərbaycanın bundan sonra da Ermənistanın Qarabağ məsələsində istənilən addımına sərt cavab verəcəyi qaçılmaz hal sayılır. Xüsusən də söhbət Ermənistandakı revanşist qüvvələrdən gedir. Ermənistanın “Joxovurd” qəzetinin yazdığına görə, indi erməni ordusunu nə müxalifət, nə də hökumət dirçəltmək iqtidarındadır.
Digər tərəfdən, Ermənistan hakimiyyətini xəyanətdə ittiham edən müxalifətin özü də cəmiyyət tərəfindən eyni ittihamla üzləşir. Məsələn, mxalifətin baş nazir postuna vahid namizədi olan Vazgen Manukyan Şirak vilayətinə və Gümrü şəhərinə səfərləri zamanı eyni ittihamlarla qarşılaşıb. Manukyanın olduğu avtomobil karvanının qarşısını kəsən etirazçılar onu Ermənistana xəyanət etməkdə, xarici qüvvələrin əlində oyuncaq olmaqda ittiham ediblər. Vazgen Manukyanın etirazçıları “səfil” və “avara” adlandırması isə Ermənistan cəmiyyətində ciddi etirazlara səbəb olub. Erməni ekspertlər insanların həm hakimiyyətə, həm də müxalifətə olan etimadını itirdiklərini bildirirlər. Onların qənaətinə görə, erməni dövlətçiliyinin taleyi indi Azərbaycanın əlindədir.
Elə ordunun yoxluğundan şikayət edən Vazgen Manukyan da eyni mövqedədir: “Müharibə zamanı hərbçilər ölkə rəhbərinin xəyanət yolu ilə getdiyini görəndə çevriliş etməli idilər”. O bildirib ki, son vaxtlarda Ermənistanda general rütbələri rüşvət predmetinə çevrilib: “Son vaxtlarda general medalları və rütbələri rüşvət kimi bir şeyə çevrilib. Ermənistan ordusunun bərpa olunmasına ən azı 2-3 il vaxt lazımdır, amma bu vaxt ərzində hərbi əməliyyatlara gedəcək axmaq tapılmayacaq. Bəzən deyirlər: əgər Nikol Paşinyan vəzifədən getsə, başqaları gəlsə, müharibə yenidən başlayacaq. Xeyr, belə ordu ilə kim müharibəyə başlayacaq?”. Vazgen Manukyan bildirib ki, Ermənistan orduya malik olmalıdır, bunsuz dövlət ola bilməz. Onun sözlərinə görə, rəsmi İrəvan son zamanlar Rusiya, Çin və İranla bağlı yanlış diplomatik siyasət yürüdüb: "Bütün bunlar ABŞ-ın xoşuna gəlmək üçün hazırlanırdı, bəs biz nəticədə nə əldə etdik? Heç nə, hər şey itirildi, yad oyunun oyuncağı olduq”. Manukyanın sözlərinə görə, Ermənistan Türkiyə ilə dostluq münasibətləri qurmalıdır. Ona görə ki, siyasi riyaziyyat bunu tələb edir. Eləcə də yaddan çıxarmaq lazım deyil ki, liderlərin son Moskva görüşündən sonra Ermənistan da Azərbaycan ərazisindən keçməklə Rusiyaya, İrana dəmir yolu çıxışı imkanına malik olacaq. Buna qarşı çıxan qüvvələr isə Ermənistanı fəlakətə sürükləyir. Bu sırada erməni diasporu da yer alır.
Belə vəziyyətdə o da diqqət çəkir ki, məğlub vəziyyətdən çıxa bilməyən və çöküş sahələri gün keçdikcə artan Ermənistanda çarə ölkə xaricində axtarılır. Hətta diaspor Ermənistan xaricində parlament yaratmağı təklif edir. Bu təklifə artıq Kanadada yaşayan erməni tarixçi, yazıçı Raffi Bedrosyan çıxış edib. Onun sözlərinə görə, yeni parlamentə beş bölgədən erməni icmalarının nümayəndələri daxil olmalıdır: "Avropa, Şimali Amerika, Cənubi Amerika, Yaxın Şərq və Rusiya. Diaspor erməniləri bölgələrindəki namizədlərə səs verməlidirlər. Bundan əlavə, diaspor ermənilərindən hər ay sabit məbləğ, məsələn, gəlirlərinin faizi Ermənistan hökumətinə vergi olaraq ödənilməlidir. Diaspor parlamenti bu vəsaitlərin xərclənməsinə nəzarət etməlidir". Bedrosyan Qarabağdakı 44 günlük müharibənin nəticələrinin dünyanın hər tərəfindəki erməniləri dəhşətə gətirdiyini və şoku daha da artıran nüansın Ermənistan ordusunun "qalib gələcəyik" mesajını verməsi olduğunu qeyd edib: "Diaspor erməniləri həvəslə müharibəyə qatıldı, 1 ayda son 20 ildə toplandığından daha çox pul bağışladı. İndi müharibədə uduzduğumuz üçün diaspor erməniləri tamamilə məyusluq, inam itkisi yaşayır və Ermənistan hökumətinin həm hazırkı, həm də keçmiş liderlərini günahlandırırlar. Ancaq qəzəb dalğası səngiyir və növbəti addımlarımızı düşünməliyik".
Nahid SALAYEV
