Prezident Vətən müharibəsinin dünyada analoqu olmayan bir xüsusiyyətini də açdı - hər gün irəli...

İbrahim Rüstəmli: “Əməliyyatlar bütün incəliklərinə qədər hesablanaraq həyata keçirildi”

img

“44 günlük müharibənin hər bir günü zəfər günü idi. Hər gün biz qabağa gedirdik”.

Bunu Prezident İlham Əliyev Şuşada hərbçilərlə görüşü zamanı deyib.

Ölkə başçısının sözlərinə görə, bizim şanlı Ordumuzun 44 günlük müharibəsi XXI əsrin müharibəsidir: “Biz bu müharibəyə hazırlaşırdıq və bunu gizlətmirdik. Mən dəfələrlə demişdim ki - o cümlədən hərbçilərlə görüşlərimdə, çoxsaylı görüşlərimdə - əgər düşmən torpaqlarımızdan öz xoşu ilə çıxmasa, məcbur edəcəyik onları, qovacağıq torpaqlarımızdan, güc amili öz rolunu oynayacaqdır və belə də oldu, 44 günlük müharibənin hər bir günü zəfər günü idi. Hər gün biz qabağa gedirdik. Bir gün belə geri addım atmadıq. Bu, müharibələrdə çox nadir hallarda müşahidə edilən bir mənzərədir. Müharibələrdə hücumlar olur, geriyə çəkilmə olur, manevrlər olur, biz isə hər gün qabağa gedirdik. Hər həftə onlarla yaşayış məntəqəsini işğalçılardan azad edirdik. Nəticədə düşmənə sarsıdıcı zərbələr endirərək 300-dən çox yaşayış məntəqəsini və Şuşanı azad etdik. Onları məcbur etdik və cəmi 20 gün ərzində Ağdam, Laçın və Kəlbəcər rayonlarından qoşunlarını çıxardılar, rədd oldular bizim torpaqlarımızdan və biz qayıtmışıq”.

Həqiqətən də Azərbaycan 44 günlük müharibə zamanı çox unikal hərbi uğurlara imza atdı. Bütün bunların nəticəsində əldə olunan nailiyyətlər düşmənin məğlubiyyətini tezləşdirdi.

“Ali Baş Komandanın bu əməliyyatları şəxsən nəzarətdə saxlaması da qələbənin əldə olunmasında müstəsna rol oynadı”

Məsələyə münasibət bildirən hərbi ekspert İbrahim Rüstəmlinin sözlərinə görə, hər gün irəli getməyimiz həm tarixi, həm də hərbi baxımdan ciddi faktdır: “Doğrudan da 44 günlük müharibə zamanı bizim ordumuz hər gün irəlilədi. Bunun arxasında Azərbaycan dövlətinin həyata keçirdiyi uğurlu hərbi siyasət dayanır. Yəni hərbi əməliyyatların strateji və taktiki plan üzrə qabaqcadan cızılması, daha sonra həyata keçirilməsi öz bəhrəsini verdi. Bunun başlıca səbəblərindən biri də hazırlanan hərbi əməliyyat planına son dərəcə kompleks şəkildə yanaşılmasıdır. Çünki əməliyyatlar bütün incəliklərinə qədər hesablanaraq həyata keçirildi. Bütün bunların nəticəsində Azərbaycan Ordusu hər gün irəlilədi. Təbii ki, Ali Baş Komandan İlham Əliyevin bu əməliyyatları şəxsən nəzarətdə saxlaması da qələbənin əldə olunmasında müstəsna rol oynadı. Eyni zamanda, strateji planların taktiki şəkildə reallaşdırılması zamanı ortaya çıxan bu və ya digər problemlərə ciddi müdaxilələrin çevik şəkildə təmin edilməsi də öz sözünü dedi. Çox mükəmməl şəkildə əməliyyatların redaktə edilməsi əldə edilən uğurlara öz töhfəsini verdi. Bütün bunlar cənab Prezidentin böyük intellektinin və fədakarlığının göstəricisi idi. Bunun arxasında Azərbaycan Ordusu və onun peşəkarlığı dayanırdı”.

Hərbi ekspert onu da qeyd etdi ki, bundan sonra bir çox ölkələr Azərbaycanın hərbi uğurunun sirlərini öyrənəcək.

Vidadi ORDAHALLI

Son xəbərlər