“Bizim dəvətimizlə yanvar ayında ICESCO-nun missiyası Azərbaycana gələcək və burada görüşlər olacaq”. Bu fikirləri Prezident İlham Əliyev yanvarın 5-də Anar Kərimovu Mədəniyyət naziri təyin olunması ilə əlaqədar videoformatda qəbul edərkən çıxışı zamanı deyib.
Dövlət başçısı bildirib: “Mən hesab edirəm ki, onlar azad edilmiş torpaqlara da getməlidirlər. Ondan sonra ekspertlər qrupu gəlməlidir. Müsəlman abidələrinin ermənilər tərəfindən dağıdılması ilə bağlı onlar missiya həyata keçirməlidirlər və öz hesabatında bunu əks etdirməlidirlər. Əlbəttə, bütün təhlükəsizlik tədbirlərini nəzərə almaq şərtilə maksimum imkan yaradılacaq. Çünki o bölgələrdə hələ ki, minalar kifayət qədər çoxdur və təhlükəsizlik tədbirləri mütləq təmin edilməlidir”.
ISESCO-nun missiyasının Azərbaycana gəlməsi və onların işğaldan azad edilən torpaqlarımızda islam abidələrinə qarşı erməni vandalizmini öz gözləri ilə görməsi erməni vandalizminin ifşasında İslam dünyasının rolunun artmasına təsir edə bilərmi?
“...ermənilərin islam abidələrinə, məscidlərə qarşı törətdiyi vandalizm aktlarını öz gözləri ilə görən islam dövlətləri bundan bir nəticə çıxaracaqlar”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli “Bakı-Xəbər”ə bildirdi ki, bütün hallarda, ISESCO-nun missiyasının Azərbaycana səfərinə müsbət yanaşmaq lazımdır. “ISESCO-nun missiyasının Azərbaycanın işğaldan azad edilən ərazilərinə səfəri vacibdir. Bu qurumun missiyası Ermənistanın vandal silahlı birləşmələrinin, separatçı qüvvələrin bizim ərazilərimizdə müsəlman abidələrini, məscidləri, dini inanc yerlərini hansı vəhşiliklərlə dağıdıb tari-mar etdiyini, müxtəlif formalarda təhqir etdiyini öz gözü ilə görüb araşdırmaqdır. Bu, yaxşı haldır. ISESCO-nun missiyası burada gördüyü dəhşətləri beynəlxalq aləmə və İslam dünyasına çatdırmaqda da mühüm rol oynayacaq. Əgər indiyə qədər UNESCO və ISESCO tərəfindən Azərbaycanın ədalətli mövqeyinə fərqli baxışlar var idisə, ISESCO-nun missiyası bölgəyə səfəri zamanı dağıdılan, təhqir edilən məscidlərimizi, dini abidələrimizi öz gözləri ilə gördükdən sonra əvvəlki mövqelərindən geri çəkiləcəklər, dünya ictimaiyyəti də, İslam aləmi də bir daha görəcək ki, Ermənistanın işğalçı, separatçı qüvvələri Azərbaycan abidələrinə, müsəlman məscidlərinə qarşı hansı faşizm, vandalizm cinayətləri törədib. Bununla da nəticədə erməni vandalizminin əsl mahiyyəti bir daha ortaya çıxacaq. Erməni vandalizminin ortaya çıxarılması və ifşa edilməsi üçün təkcə İslam dünyası, bütün beynəlxalq aləm yox, ISESCO və digər beynəlxalq təşkilatlar mühüm rol oynamalıdır. Bunun önəmli cəhətləri budur. Hesab edirəm ki, ISESCO ilə yanaşı, digər müvafiq beynəlxalq təşkilatlar da Azərbaycana missiya göndərməli və əsl həqiqətləri öz gözləri ilə görməli və beynəlxalq aləmə çatdırmalıdırlar. Bu məsələdə İslam Əməkdaşlıq Konfransı da fəallıq göstərməlidir. Ümumiyyətlə, erməni vandalizminin beynəlxalq aləmə çatdırılmasında islam dövlətləri daha böyük aktivlik göstərməlidirlər”.
F.Ələkbərlinin sözlərinə görə, şübhəsiz, qardaş Türkiyənin mövqeyi həm bizim, həm də dünya üçün aydındır, amma Türkiyə ilə yanaşı, digər islam ölkələri də bu məsələdə aktiv olacaqlar: “Xüsusən də İran İslam Respublikası, Misir, Birləşmiş Ərəb Əmirlikləri, Səudiyyə Ərəbistanı və digər müsəlman dövlətləri də bu məsələdə həssaslıq nümayiş etdirməlidirlər. Yəni erməni vandalizminə, təhqirinə məruz qalan dini abidələrimiz, məscidlərimiz İslam dünyasının bir parçasıdır. Ona görə də məhz bu məsələlərdə islam ölkələrinin Azərbaycanın yanında yer alması çox vacibdir. Hətta deyərdim ki, bəzi islam dövlətləri istər Qarabağ, istərsə də digər məsələlərdə Azərbaycanın yanında olmaq əvəzinə, Ermənistana daha çox meyl edirlər. Fikrimcə, ISESCO-nun missiyasının Azərbaycana səfərindən sonra ermənilərin islam abidələrinə, məscidlərə qarşı törətdiyi vandalizm aktlarını öz gözləri ilə görən islam dövlətləri bundan bir nəticə çıxaracaqlar. Ümid edirəm ki, bütün hallarda, ISESCO-nun missiyasının ölkəmizə gəlməsi bütün müsəlman ölkələri, ö cümlədən də qeyri-müsəlman ölkələri üçün həqiqətləri üzə çıxaracaq, bu bir nümunə olacaq, Azərbaycanın haqq səsi bir daha müsəlman aləminə, habelə dünyaya çatdırılacaq” - deyə F.Ələkbərli qeyd etdi.
İradə SARIYEVA
