Martın 11-də Ümumdünya Səhiyyə Təşkilatının pandemiya elan etdiyi koronavirus sürətlə Yer üzündə yayılmaqda davam edir. Aparılan son statistikaya əsasən, indiyədək dünyada 76 milyondan çox insan COVID-19-a yoluxub, 1 milyon yarımdan çox insan bu təhlükəli virusdan həyatını itirib. Yoluxmanın 45 faizdən çoxu Şimali və Cənubi Amerikanın payına düşür, digər yerləri isə Avropa, Cənub-şərqi Asiya bölüşür.
Hazırda COVID-19 xəstəliyinin sürətlə yayılması, yoluxan və vəfat edən şəxslərin sayında kəskin artımın baş verməsi bütün dünya üçün ən ciddi problem olaraq qalmaqdadır. Ayrı-ayrı ölkələrin təcrübəsi göstərir ki, xəstəliyin qarşısını almaq üçün hökumətlər sərt məhdudiyyətlər tətbiq etmək məcburiyyətində qalırlar. Bu, iqtisadi duruma, əhalinin maddi vəziyyətinə mənfi təsir göstərsə də, insanların həyatının və təhlükəsizliyinin qorunması üçün sərtləşdirilmə istiqamətində addımlar atılır.
Azərbaycanda da COVID-19-a yoluxma hallarında əvvəlki aylarla müqayisədə artım müşahidə olunmaqdadır. Buna görə də ölkəmizdə son aylarda yaşanan yüksək yoluxma səviyyəsi nəzərə alınaraq virusun yayılmasının qarşısının alınması məqsədilə bir sıra addımlar atılıb, Nazirlər Kabineti yanında Operativ Qərargah tərəfindən dekabrın 14-dən gələn il yanvarın 18-dək sərtləşdirilmiş karantin tədbirlərinin tətbiqinə başlanıb. Karantin qaydalarının sərtləşdirilməsi yoluxma sayına təsir edib. Son günlərin statistikasına nəzər salsaq, yoluxma sayının sürətlə azaldığını müşahidə etmək olar.
Dekabrın 18-də Prezident İlham Əliyev Müstəqil Dövlətlər Birliyinin Dövlət Başçıları Şurasının videokonfrans formatında keçirilən iclasındakı çıxışında da bu məsələyə toxunaraq bildirdi ki, koronavirusa qarşı peyvənd hazırlanıb və bəzi ölkələrdə tətbiqinə başlanıb. Ölkəmizdə də vaksinlərin alınması ilə əlaqədar hazırlıq işləri görülüb, GAVI tərəfindən təsis edilmiş COVAX təsisatına qoşulub. Maraqlıdır, COVAX təsisatına qoşulma bu sahədə nə kimi effekt verəcək?
“...bütün ölkələr üçün ədalətli və bərabər əlçatanlıq imkanı...”
“Sağlamlığa xidmət” İctimai Birliyinin sədr müavini Pərvanə Vəliyeva “Bakı-Xəbər”ə açıqlamasında qeyd etdi ki, COVAX təsisatına qoşulmaq üçün müraciət edən ölkələr təsdiqlənib: “COVAX təsisatı Ümumdünya Səhiyyə Təşkilatı tərəfindən koronavirusa qarşı peyvəndin tapılması və ölkələrin təmin edilməsi ilə bağlı yaradılmış alyansdır. Bu alyansa qoşulmaq üçün 190-dan çox ölkə müraciət edib. Azərbaycan COVID-19 xəstəliyinə qarşı peyvəndlərlə bağlı həm ikitərəfli, həm də çoxtərəfli COVAX layihəsinin iştirakçısıdır. Müraciət edən ölkələrin bir qismi bu alyansa qoşula bilmədi”.
Həmsöhbətimiz onu da bildirdi ki, vaksinlər, ilk növbədə, tibb işçilərinə, yaşı 65-dən yüksək olan şəxslərə və xroniki xəstəliyi olan insanlara vurulur.
P.Vəliyevanın sözlərinə görə, COVAX platformasının əsas məqsədi COVID-19 ilə mübarizədə vaksin istehsalını sürətləndirmək və bütün ölkələr üçün ədalətli və bərabər əlçatanlıq imkanı yaratmaqdır.
Günel CƏLİLOVA
