Ermənilər işğal altındakı Azərbaycan ərazilərində süni məskunlaşdırma siyasətini davam etdirir. Erməni mediasında yayımlanan süjetlərin birində yaxınlarda Livandan Qarabağın Şuşa şəhərinə köçürülmüş erməni ailəsi haqqında video təqdim olunub.
Həmin süjetdə göstərilir ki, Toni Hacara adlı Livan ermənisi həyat yoldaşı və övladı ilə birlikdə Şuşada məskunlaşıb. O, doğma yurd-yuvalarından qovulmuş azərbaycanlılardan birinə məxsus evə köçüb. İxtisasca aşbaz olan Hacara Qarabağda Yaxın Şərq kulinariya məktəbini inkişaf etdirəcəyini deyib. Xatırladaq ki, Livanın paytaxtı Beyrutda baş verən partlayışı bəhanə edən Ermənistan hakimiyyəti Livan ermənilərinin kütləvi köçünü təşkil edib. Son 2 ayda 10 təyyarə reysi ilə 1300-dən artıq erməni Ermənistan və Qarabağa köçürülüb.
Ermənilərin işğal altındakı ərazilərimizdə həyata keçirdiyi süni məskunlaşdırmaya əlaqədar qurumlar və xüsusilə də həmsədr ölkələr niyə etiraz etmir?
Politoloq Əhəd Məmmədli “Bakı-Xəbər”ə açıqlamasında bildirdi ki, qondarma “dqr” rejiminin rəhbəri Araik Arutunyan Livanda yerləşən Kilikiya Katolikosluğunun rəhbəri, diaspor ermənilərinin dini lideri I Arama zəng edib, Beyrutdakı partlayışa görə 100-150 erməni ailəsinin Livandan Qarabağa köçürülməsini təklif etmişdi: “Həmin vaxt I Aramın təklifə müsbət cavab verdiyi və prosesin detallarının müzakirəsinə başlandığı bildirildi. O vaxt da biz qeyd etdik ki, İrəvan Livan ermənilərini, Ermənistandan daha çox, işğal altındakı Azərbaycan ərazilərinə köçürməyə çalışacaq. Çünki Ermənistanın indiki sosial-iqtisadi vəziyəti xaricdən yeni şəxslərin cəlbinə imkan vermir. Qarabağa köçürülən ermənilərə isə ilk mərhələdə diaspor yardım edir. Artıq prosesin reallaşdığını görürük.Yaxın Şərqdən ermənilərin işğal altındakı torpaqlara köçürülməsi yolverilməzdir. Bu vətəndaşlar arasında həm də terrorçular var. Azərbaycan Prezidenti dəfələrlə öz çıxışlarında qanunsuz köçürülmə siyasətini pisləmiş, ATƏT-in faktaraşdırıcı missiyasının son dövrlərdə regiona gəlməməsini tənqid etmişdi. ATƏT-in faktaraşdırıcı missiyaları sonuncu dəfə 2005-2010-cu illərdə Azərbaycanın ciddi təhriki ilə işğal edilmiş ərazilərə gəlib. Ermənistan tərəfindən həyata keçirilən qanunsuz məskunlaşdırma faktı hesabatlarında qeyd olunub. Lakin artıq uzun müddət keçib və bu dövr ərzində Suriyadan ailələrin bölgədə yerləşdirilməsinə dair məlumatlar var. Ermənistanın bu əməlləri beynəlxalq humanitar hüququn, eləcə də 1949-cu il Cenevrə Konvensiyası və onun əlavə Protokollarının kobud pozulmasıdır. Ermənistanın məqsədi bu torpaqlarda ermənilərin sayını süni şəkildə artıraraq, ərazilərin etnik-mədəni xüsusiyyətlərinin dəyişdirilməsidir.
ATƏT və onun Minsk Qrupunun faktaraşdırıcı missiyası bu prosesi nəzarətə almalıdır və beynəlxlaq hüquq normalarına uyğun ölçü götürməlidir. Amma illərdir ki, beynəlxalq təşkilatlar ermənilərin süni məskunlaşma prosesinə göz yumur. Xüsusilə də həmsədr ölkələrin seyrçi qalması onların nizamlanma prosesinə ciddi yanaşmadıqlarını üzə çıxarır”.
Bu məsələdə ATƏT-in Minsk Qrupunun susqunluğunun səbəbi məlumdur. Çünki o qrupun hər üç həmsədr ölkəsi ermənipərəst mövqedən çıxış edir. Bəs Avropa Şurası, BMT, Avropa ittifaqı və ya digər qurumlar nədən ermənilərin belə qanunsuz məskunlaşma prosesi barədə bir söz belə demir?
Məhəmmədəli QƏRİBLİ
