Ermənistanda hakimiyyət uğrunda mübarizənin qızışdığı bir vaxtda Azərbaycanın işğal olunmuş ərazilərində qurulan qondarma rejimin “rəsmiləri” İrəvanı çətin duruma salıblar.
Ermənistanın “Analitik.am” nəşri yazıb ki, “DQR”in “təhlükəsizlik şurasının rəhbəri” Samvel Babayan növbəti dəfə Ermənistanı pis vəziyyətdə qoyub. Belə ki, S.Babayan “DQR” ilə Ermənistan arasında hərbi ittifaqın imzalanması ilə bağlı suala bu cür cavab verib: “Biz hərbi ittifaqı kimlə bağlayırıq? Yəni bu müqaviləni kim kimlə imzalayır? Belə çıxır ki, Ermənistan müqaviləni özüylə bağlayır?”
Erməni nəşri yazır ki, mahiyyət etibarilə Babayan bununla separatçı qurumun hüquqi olaraq mövcud olmadığını, Dağlıq Qarabağı Ermənistanın işğal etdiyini və hazırda da burada Ermənistan ordusunun olduğunu təsdiqləyib. Bu səbəbdən Babayanın məlum bəyanatı İrəvanda qalmaqal yaradıb. Bu açıqlamadan bir neçə saat sonra İrəvandan separatçı rejimin liderlərinə sözügedən bəyanatı bütün media orqanlarından sildirmək üçün əmr gəlib: “Bu məlumat Dağlıq Qarabağı Ermənistanın işğal etdiyini təsdiqləyir. Ancaq İrəvan beynəlxalq ictimaiyyətə rəsmi səviyyədə Ermənistan ordusunun “DQR”ə yalnız dəstək verdiyini göstərmək istəyir”.
Bununla Ermənistanın işğalçı mahiyyəti bir daha ifşa edildi. Özləri, bir növ, etiraf etmiş oldular ki, Dağlıq Qarabağı oradakı separatçı ermənilər yox, məhz Ermənistan işğal edib.
“...buna heç kəs inanmayacaq”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “Ermənistanın Azərbaycan ərazilərini işğal etməsi BMT qətnamələrində və digər beynəlxalq təşkilatların sənədlərində təsbit edilib. Rəsmi İrəvan nə qədər desə də biz orada müstəqil bir subyektə dəstək veririk, buna heç kəs inanmayacaq. Bu onların özü tərəfindən dəfələrlə təhrif edilib və işğalı qabardıblar. Qeyd edim ki, Babayanın özü bunu deməklə bir daha işğal faktorunu təsdiqləmiş oldu. Ümumiyyətlə, "DQR" deyilən bir qurum yoxdur və ortada Ermənistanın yaratdığı terrorçu rejim var. Hesab edirəm ki, rəsmi Bakı Ermənistanin bu avantürasının qarşısını yaxın perspektivdə almalıdır. Bundan əlavə, Ermənistan nə qədər çalışsa, bu oyuncaq qurumu heç yerdə tanıda bilməyəcək. Qarabağda terrorçu rejim birbaşa Ermənistan rəhbərliyinin diktəsi ilə hərəkət edir. Guya ikitərəfli hərbi yardımla bağlı məsələ Babayan tərəfindən ifşa olundu. Bu onu göstərir ki, oradakı rejimi də özlərinin bir subyekti kimi tanımırlar”.
Politoloq onu da qeyd etdi ki, bütövlükdə, gedən proseslər Azərbaycanın lehinə dəyişir və bunun pozitiv nəticələri olacaq.
Vidadi ORDAHALLI
