Ermənistan Suriyaya 450 hərbçi göndərib. Məqsəd onlardan türk ordusuna qarşı və türklər tərəfindən dəstəklənən Azad Suriya Ordusu ilə döyüşlərdə istifadə etməkdir. Bu barədə İsrailin NZİV.net kanalı məlumat yayıb.
Portal erməni hərbçilərin dövlət hərbçiləri və ya qeyri-formal bölmələrin üzvləri olması barədə məlumat vermir. Erməni muzdluların koordinasiyasını Suriya hərbi kəşfiyyat generalı Muxsan Nafnuf həyata keçirəcək. Koordinasiya Rusiyaya məxsus hərbi bazada həyata keçiriləcək. Portalın məlumatına görə, erməni muzdluların Bəşər Əsədin tərəfində döyüşməsi Rusiyanın son dövrlərdə Ermənistana açıq hərbi dəstək göstərməsilə başlayıb.
Ermənistanın bu addımı hərbi ekspertlər tərəfindən necə qiymətləndirilir?
Ramil Məmmədli: “Bütün bu təzyiqlərə baxmayaraq, Türkiyə bu məsələdə də ermənilərin lazımi cavabını verəcək”
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, uzun illərdir erməni siyasi təşkilatları xarici ölkələrdə əvvəl Osmanlıya, sonra isə Türkiyəyə qarşı səlib yürüşü həyata keçirir:“Bu cür aksiyalarda yüzlərlə türkiyəli qardaşımız şəhid olub. Onların arasında müxtəlif peşə sahibləri olub. Ermənilərin daha çox hədəfə aldığı zümrə isə hərbçilər və diplomatlar olub. Sizin verdiyiniz sual da həmin prosesin tərkib hissəsidir. Uzun illərdir ki, Suriyada biz ermənilərdən ibarət hərbi birləşmələrin türklərə qarşı cəbhədə yer aldıqlarını görürük. Onların arasında, yerli ermənilərlə yanaşı, Ermənistandan gedən hərbçilər də var. Erməni terror qruplaşmalarının bəzi düşərgələri də məhz Suriya ərazisində yerləşir. Türkiyə-Azərbaycan münasibətlərinin daha da dərinləşməsi, hərbi münasibətlərin güclənməsi, faktiki olaraq bir ordu şəklində Qarabağ məsələsinin həllinə göstərilən diqqət erməniləri və onların havadarlarını narahat etməyə bilməz. Ermənistan burada məsələnin yalnız görünən tərəfidir. Bütün dünya boyu onlar Türkiyənin əleyhinə fəaliyyətdədirlər. Suriyadakı vəziyyət onların əlinə düşən şansdır. Ancaq bunu onlar elə düşünür. Çünki Türkiyə ordusu Suriyada dünyanın ən güclü orduları ilə üz-üzə gəldi və qalib çıxdı. Burada ən başlıca qızışdırıcı rollardan birini də erməni kilsəsi oynayır. Bütün bu təzyiqlərə baxmayaraq, Türkiyə bu məsələdə də ermənilərin lazımi cavabını verəcək. Suriyada Türkiyə ilə baş-başa gəlmək Ermənistanın çapına uyğun olan məsələ deyil. Burada açıq-aşkar Rusiyanın dəsti-xətti də görünür”.
Qabil Hüseynli: “Ermənistanın Suriyaya göndərdiyi hərbçiləri həm təcrübə qazanır, həm də Türkiyənin regionda başını qatmağa çalışır”
Politoloq Qabil Hüseynli isə hesab edir ki, Ermənistanın Suriyaya göndərdiyi hərbçilər nizami ordu mənsubları deyil:“Ümumiyyətlə, hazırda rəsmi İrəvanın ölkə xaricinə hərbçi göndərmək potensialı yoxdur. Ermənistanda bu gün hərbçi çatışmazlığının yaşandığını hər kəs bilir. Lakin bir müddət öncə Ermənistanda “Müdafiə haqqında” qanuna edilən dəyişikliklərə əsasən, ölkədə könüllü hərbi dəstələrin yaradılmasına cəhd edilir. Bu o deməkdir ki, Ermənistan mülki insanlardan təşkil edilən hərbi birləşmələrini təlim keçmək üçün Suriya və digər Şərq ölkələrinə göndərir. Onları burada ASALA terror təşkilatının təcrübəli hərbçiləri qarşılayıb təlim keçir, daha sonra aktiv döyüşlərə cəlb edir. Məhz bu prosesdən sonra sağ qalanlar yenidən ölkəyə qayıdır.
İkincisi, Ermənistanın Suriyaya göndərdiyi hərbçiləri həm təcrübə qazanır, həm də Türkiyənin regionda başını qatmağa çalışır. Çünki Türkiyənin hazırda Ermənistan-Azərbaycan Dağlıq Qarabağ münaqişəsinə diqqət etməsi rəsmi İrəvanı çox narahat edir. Buna görə də Ermənistan Suriyada Türkiyəyə qarşı olan istənilən qüvvəyə dəstək verməyə çalışır”.
Bəlli olan budur ki, Ermənistan dünyanın heç bir yerində Türkiyə ilə qarşı-qarşıya gəlmək gücündə olan ölkə deyil. Bu səbəbdən də, ermənilərin cəhdləri yersizdir.
Məhəmmədəli QƏRİBLİ
