Məlum olduğu kimi, Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevin rəhbərlik etdiyi nümayəndə heyətinin Türkiyəyə səfəri davam edir.
Sentyabrın 8-də Azərbaycan nümayəndə heyətinin rəhbəri Hikmət Hacıyev İstanbulda fəaliyyət göstərən beynəlxalq media qurumlarının nümayəndələri ilə görüşərək müzakirələr aparıb.
Prezidentin köməkçisi özünün “Twitter” səhifəsində görüşlə bağlı yazıb: “İstanbulda fəaliyyət göstərən beynəlxalq media nümayəndələri ilə görüşmək və açıq dialoq aparmaq çox xoş idi. Ermənistan-Azərbaycan münaqişəsi, regional və beynəlxalq mövzularda geniş müzakirələr apardıq”.
Keçirilən görüşlərin əhəmiyyətini vurğulayan Hikmət Hacıyev deyib ki, biz media sahəsinin müxtəlif istiqamətləri üzrə ətraflı müzakirələr apardıq. Düşünürük ki, əməkdaşlıq üçün böyük potensial var. Türkiyə son dövrlərdə sənədli və bədii filmlərin hazırlanması sahəsində böyük təcrübə qazanıb. Türkiyə televiziyaları istər texnologiya, istərsə də kontent yaradılması baxımından yaxşı imkanlara malikdirlər. Bu xüsusda əməkdaşlıq üçün geniş imkanlar və böyük resurslar var.
Bütövlükdə, bu, Türkiyə-Azərbaycan media əməkdaşlığında, informasiya təhlükəsizliyi sahəsində əməkdaşlıqda yeni bir mərhələdir. Türkiyə-Azərbaycan media əməkdaşlığında indiki yeni mərhələnin əsas məqsədləri, vəzifələri və hədəfləri nədən ibarətdir?
“Əldə edilən razılıqlar ona gətirib çıxaracaq ki, artıq həm Türkiyədə, həm də Azərbaycanda...”
Sözügedən məsələyə aydınlıq gətirən media eksperti Azər Həsrət bununla bağlı bir sıra məqamlara toxundu: “Əvvəla Türkiyə ilə Azərbaycan bir millət, iki dövlət olduğuna görə bizim dərdimizlə sevincimiz eynidir. Bir-birimizi bütün müstəvilərdə dəstəkləyirik. Bunun da ən gözəl nümunəsini Prezident İlham Əliyev və həmkarı Rəcəb Tayyib Ərdoğan ortaya qoyub. Yəni onlar istənilən fürsətdə və şəraitdə qarşılıqlı şəkildə dövlətlərimizin maraqlarından, mənafelərindən çıxış edirlər. Azərbaycan Prezidenti qardaş ölkənin, Türkiyənin Prezidenti də bizim maraqlarımızdan çıxış edir. Bütün bunlara baxmayaraq, illərdir iki ölkənin media əməkdaşlığı sahəsində boşluq da var. Məsələ ondadır ki, Azərbaycan mediası ilə Türkiyə mediasının inteqrasiyası çox gecikib. Yəni bizim mediamız dövlət rəhbərlərimizin qarşılıqlı isti münasibətləri səviyyəsində inteqrasiya edərək bu boşluğu doldurmalıdır. Hikmət Hacıyevin rəhbərlik etdiyi nümayəndə heyətinin Türkiyəyə səfəri, orada vahid media platformasının yaradılması istiqamətində danışıqların aparılması, müəyyən razılıqlara gəlinməsi ondan xəbər verir. Türkiyə mediası üçün Azərbaycan auditoriyası da Türkiyə auditoriyasının bir parçası olmalıdır. Eyni zamanda, bizim mediada da o cür olmalıdır. Hər iki ölkənin auditoriyası vahid oxucu, dinləyici, tamaşaçı auditoriyası kimi olmalıdır. Bax, Hikmət Hacıyevin səfərinin gətirəcəyi fayda bundan ibarət olmalıdır. Əldə edilən razılıqlar ona gətirib çıxaracaq ki, artıq həm Türkiyədə, həm də Azərbaycanda fəaliyyət göstərən media qurumları, birmənalı olaraq, iki ölkənin ərazisini vahid bir coğrafiya kimi qəbul edəcək və ona uyğun da yayımlarla məşğul olacaqlar. Düşünürəm ki, bundan bizim media da çox ciddi fayda görəcək. Ona görə ki, Azərbaycanın 10 milyon, amma Türkiyənin 83 milyon nəfər əhalisi var. Bundan başqa, xarici ölkələrdə yaşayan türk diasporunun nümayəndələri də bizim üçün əlavə oxucu, tamaşaçı və dinləyici auditoriyasıdır”.
Media eksperti hesab edir ki, işlər məhz bu yöndə qurulmalıdır.
Vidadi ORDAHALLI
