Ermənistanın “İrates” nəşri yazır ki, Qarabağ erməniləri təhlükəli postlara Ermənistan ermənilərini göndərirlər. Belə ki, işğal olunmuş Dağlıq Qarabağ ərazisində dislokasiya olunmuş Ermənistan Silahlı Qüvvələrinin hərbi hissələrindən birində növbəti dəfə yerlibazlıq halı yaşanıb.
Ağdərə (ermənilər Mardakert adlandırırlar) şəhərinin sakini və hazırda həqiqi hərbi xidmətdə olan gənc əsgər Zakaryan Avedi Gevorq Ağdam rayonunun Papravənd (ermənilər Nor Karmiravan adlandırırlar) yaşayış məntəqəsində dislokasiya olunmuş Ermənistan Silahlı Qüvvələrinin Hava Hücumundan Müdafiə Qüvvələrinin hərbi hissələrindən birində 2-ci divizionun kəşfiyyat uzaqlıq ölçəni vəzifəsinə təyin olunub. Döyüş postunun təhlükəli olmasını nəzərə alan və Dağlıq Qarabağdan olan komandanlıq əsgər Avedi Zakaryanı posta göndərməyə qıymayaraq, onun əvəzinə Ermənistandan olan əsgər Seyran Martirosyanı göndərib.
Bu haqda əsgər S.Martirosyanın valideynləri Ermənistan Müdafiə Nazirliyinin rəsmi saytına müraciət edərək şikayətlərini bildiriblər, amma buna məhəl qoyan olmayıb. Nazirliyin “fəaliyyəti” valideynlərin şikayətini pozmaq olub və bununla özlərinin vəzifə borclarını yerinə yetirmiş hesab ediblər. Nəşr yazır ki, əslində, Tovuz döyüşlərindən sonra belə hallar daha da artıb, sadəcə, bu kimi faktların çoxu gizlədilir.
Görünür, uzun müddətdir davam edən Ermənistan və Dağlıq Qarabağ erməniləri arasındakı ədavət son zamanlar daha da kəskinləşib. Ən başlıcası, bu onu göstərir ki, Tovuz döyüşlərindən sonra ermənilər bərk qorxuya düşüblər. Bu səbəbdən güllə qabağına Ermənistan ermənilərini verirlər.
“Düşmən ordusu daxilində konfrantasiyaların daha da dərinləşməsi qaçılmazdır”
Məsələyə münasibət bildirən ehtiyatda olan polkovnik-leytenat, hərbi ekspert İbrahim Rüstəmlinin fikrincə, zaman-zaman Qarabağ erməniləri ilə Ermənistan erməniləri arasında müxtəlif çəkişmələr olub: “Son baş verənlər də məlum çəkişmələrin tərkib hissəsidir. Məsələ ondadır ki, Ermənistanda yaşayan ermənilər arasında Qarabağ ermənilərinə münasibət birmənalı deyil. Sadə Ermənistan vətəndaşı öz övladını Qarabağda görmək istəmir. Yəni onun Qarabağda xidmət etməsini, döyüşməsini və ölməsini istəmir. Qarabağı özlərinə əlavə yük hesab edirlər. Ona görə də tərəflər arasında konfrantasiya dərinləşir və müxtəlif formada özünü göstərir. Qarabağ erməniləri ilə Ermənistan erməniləri arasında çox ciddi fikir ayrılıqları var və bu, zaman-zaman müxtəlif qarşıdurmalara gətirib çıxarır. Bir neçə dəfə səngərdə əsgərlər arasında insidentlər yaşanıb və belə halları çox vaxt gizlədirlər. Çünki həmişə Qarabağ erməniləri Ermənistan ermənilərinə yuxarıdan aşağı baxıblar. Bunun arxasında müxtəlif amillər dayanır. Onlardan biri də ondan ibarətdir ki, İrəvan ermənisi Qarabağ ermənisinə elə Qarabağın problemi kimi baxır. Yəni orada sizin üzünüzdən biz burada müharibəyə cəlb olunmuşuq və sair düşüncələr hakimdir. Bu səbəbdən tərəflər arasında ciddi ziddiyyətlər var və Qarabağda xidmət edən Ermənistan erməniləri “dedovşina”ya məruz qalırlar. Çətin postlarda onları qabağa verirlər”.
İ.Rüstəmli onu da qeyd etdi ki, Ermənistan ordusu hər zaman qorxaq olub: “Onların qorxaqlığı tək Tovuz döyüşlərindən sonra özünü götərməyib. Heç vaxt onların ordusunun döyüşkən olması barədə eşitməmişik. Bunu tək biz demirik. Ermənilərin Birinci Qarabağ müharibəsindəki uğura nəyin sayəsində nail olduqlarını hamı yaxşı bilir. Aprel döyüşlərində ermənilərin döyüş mövqelərini necə qoyub qaçdıqlarını gördük. Ona görə də Ermənistan ordusu daxilində konfrantasiyaların daha da dərinləşməsi qaçılmazdır”.
Hərbi ekspertin fikrincə, belə hallar Ermənistan ordusunda mənəvi aşınmanı dərinləşdirir.
Vidadi ORDAHALLI
