Məlum olduğu kimi, Azərbaycan Müdafiə Nazirliyi MDB-nin, KTMT-nin və Şanxay Əməkdaşlıq Təşkilatının birgə "Qafqaz -2020" hərbi təlimlərində iştirak etməyəcəyini bəyan edib.
Hər zaman olduğu kimi, yenə də ermənilər bundan Azərbaycana qarşı bir təbliğat vasitəsi kimi istifadə etməyə cəhd edirlər. İsterik formada hay-küy salıblar. Azərbaycanın sözügedən qərarına həqiqətən heç bir uyğunluğu olmayan izahlar verir və "arqumentlər" gətirirlər. Məsələn, deyilir ki, guya Azərbaycan Türkiyədən asılı, qeyri-müstəqil, terrorçu ölkə, “Metsamor” AES-i partlatmaq niyyətində olduğu, Macarıstanda qətl törətmiş zabitə bəraət verdiyi və sair üçün terror əleyhinə keçirilən təlimlərdə iştirak edə bilmir. Guya bu “səbəblərdən” Azərbaycan təlimlərdə iştirakdan imtina edib. Yalanların dərəcəsinə Azərbaycanda hər kəs əmindir. Azərbaycanın sözügedən təlimdə iştirak etməməsinin çox sadə və həqiqi izahı olduğu halda, erməni saxtakarlıq maşını yenə öz işindədir. Məsələ ondadır ki, Azərbaycan KTMT-də, ŞƏT-də təmsil olunmur. Yəni həmin təşkilatların üzvü deyil. Bu səbəbdən həmin təlimlərə qatılmağa borclu da deyil. Üstəlik, Azərbaycan realda təcavüzkar, işğalçı və terrorçuları himayə edən Ermənistanla hansı məntiqlə hərbi təlim ortağı ola bilər?! Qonşusunun torpaqlarında işğal yolu ilə separatçı qurum yaradan Ermənistan, etnik təmizləmə apararaq Xocalıda və digər yerlərdə genosid törədən Ermənistan, BMT qətnamələrini icra etməyən Ermənistan, Hitlerə satılaraq minlərlə sovet vətəndaşını və yəhudini məhv edən faşist quyruqlarına heykəl qoyan bir ölkə. Dövlət səviyyəsində faşizmin əbədiləşdirilməsi siyasəti aparan Ermənistan - bütün bu damğaları özündə daşıyan bir ölkənin Azərbaycanı terrorçu adlandırmasının adı nədir?
“Azərbaycanın məlum təlimlərdən imtina etməsi tamamilə doğru addımdır”
Məsələyə münasibət bildirən AMİP funksioneri Əli Orucovun sözlərinə görə, Ermənistan bununla bir sıra çirkin məqsədlər güdür: “Əvvəla Ermənistanın özü terrorçu dövlətdir və bu, zaman-zaman müxtəlif formada özünü göstərib. Bütövlükdə, ermənilər harada yaşamasından asılı olamayaraq, terrorçu xislətə malik olublar. Bu həmin ermənilərdir ki, 70-ci illərin ortalarından başlayaraq, 1986-cı ilə qədər dünyanın müxtəlif ölkələrində 40-dan çox türk diplomatını vəhşicəsinə qətlə yetirdilər. Bu həmin ermənilərdir ki, Yaxın Şərqdəki terrorçularla çox sıx əlaqədə olublar. Bu həmin ermənilərdir ki, faşistlərlə yaxından əməkdaşlıq edərək konslagerlərdə dinc insanlara, hərbi əsirlərə divan tutulması prosesində yaxından iştirak ediblər. Nəinki yaxından iştirak ediblər, hətta bu işdə xüsusi “fərqləniblər”. Söhbət Qaregin Njde və digər ermənilərin faşistlərin tərəfinə keçib onlarla yaxın əməkdaşlıq etmələrindən gedir. Onu da qeyd edim ki, Ermənistan SSRİ tərkibində olan dövrdə belə, bu və ya digər formada beynəlxalq terrorizmə dəstək verib. Müstəqillik əldə etdikdən sonra isə bilavasitə terrorizmi himayə edib. Bununla bağlı çoxsaylı fakt sadalamaq olar. Təkcə Ermənistanda dövlət səviyyəsində faşistlərə xidmət edənlərin adının əbədiləşdirilməsi, onlara abidələr ucaldılması deyilənlərə əyani sübutdur. Ona görə də ermənilər öz adını başqasına qoymasınlar. Onların bu haqda danışmağa əsası yoxdur.
Azərbaycanın “Qafqaz-2020” təlimlərindən imtina etməsi tamamilə doğru addımdır. Ona görə ki, Azərbaycan terrorçu Ermənistanla bu kimi təlimlərdə birgə iştirak edə bilməz. Ən azından, bunun məntiqi yoxdur. Hesab edirəm ki, Ermənistanın bundan bizə qarşı bir təbliğat vasitəsi kimi istifadə etməsi gözlənilən idi. Çünki düşmən dövlətdən nə desən gözləmək olar”.
Siyasi ekspert hesab edir ki, Azərbaycan bu kimi hücumlara hazır olmalı və dərhal adekvat addımlar atmalıdır. Bir növ, aparılan siyasət bunun üzərində qurulmalıdır.
Vidadi ORDAHALLI
