Bu gün dünyanın ən təhlükəli pandemiya ocaqlarından birinə çevrilən Ermənistanda koronavirusa yoluxanların sayının günü-gündən kəskin şəkildə artdığı, ölü sayının 800 nəfərə yaxın olduğu məlumdur. Gərgin daxili siyasi və iqtisadi tənəzzül yaşayan Ermənistanda hökumət aylardır koronavirusu heç cür nəzarət altına ala bilmir.
Virus həlqəsi get-gedə genişlənir və hələ də onun qarşısını almaq üçün Ermənistan hökuməti ortaya hər hansı bir mübarizə strategiyası qoya bilməyib. İşğalçı ölkə pandemiya ilə mübarizə aparmaq əvəzinə, Rusiyanın və bəzi Avropa dövlətlərinin dəstəyilə silahlanır, Azərbaycanın ərazi bütövlüyünə qarşı yeni təxribatlar hazırlayır. Ölkənin daxilində isə həm hakimiyyət çəkişməsi, həm ciddi iqtisadi və virus böhranı daha kəskin şəkil alır. Baxmayaraq ki, müxtəlif dövlətlər tərəfindən koronavirusla mübarizə aparmasına görə Ermənistana müxtəlif cür ianələr edilir, dərmanlar, testlər və sair göndərilir, amma Paşinyan hökuməti gələn ianələri də öz maraqlarına yönəldir.
Koronavirusa qarşı heç bir əməli tədbir görməyən Paşinyan hökuməti ölkəsində virusun artmasının səbəbkarı kimi özünü günahkar bilmir, əksinə, beynəlxalq təşkilatları, xüsusən də Ümumdünya Səhiyyə Təşkilatını (ÜST) ittiham edir.
Paşinyanı dəstəkləyən “Maarifçi Ermənistan” partiyasının deputatı pandemiya ilə mübarizə qanununun müzakirəsi zamanı ÜST-ə və onun efiopiyalı rəhbərinə ağılasığmaz ittihamlar irəli sürüb. O deyib ki, ÜST-in qərarları bizim üçün məcburi olmamalıdır, bizim öz konstitusiyamız var. Bununla da açıq şəkildə ÜST-in verdiyi qərarlara qarşı çıxdıqlarını ortaya qoyan Paşinyan tərəfdarları qeyd ediblər ki, qurumun efiopiyalı sədri öz ölkəsindəki genosid aktları üçün məsuliyyət daşıyır, öz ölkəsində adı korrupsiya əməllərində çəkilir, həmçinin də pandemiyanın ilk başlanğıcında lazımi məlumatları vaxtında təqdim etmədiyinə görə pandemiyanın bütün dünyada tüğyan etməsində məsuliyyət daşıyır.
Ermənistan ÜST-i niyə tənqid edir? ÜST-lə Ermənistan arasında nə baş verir?
Ekspertlərin qənaətinə görə, Ermənistanda Paşinyan tərəfdarlarının ÜST-i ittiham etməsinin əsas səbəblərindən biri odur ki, bu ölkədə virusun geniş xarakter almasının və qarşısıalınmaz bir şəklə düşməsinin məsuliyyətini Paşinyan hökumətinin üzərindən atmaq istəyirlər. Hazırda erməni xalqı virusla doğru-düzgün mübarizə aparmadığına, bu istiqamətdə heç bir tədbir görmədiyinə və xalqın, ölkənin taleyini Allah ümidinə buraxdığına görə Paşinyanı və onun hökumətində yer alanları ciddi tənqid etdiyini deyən ekspertlər hesab edirlər ki, paşinyançılar Paşinyanın yarıtmaz siyasətini ört-basdır etmək üçün xalqı bu cür aldatmaq istəyirlər. Ekspertlərə görə, bunun digər səbəbi isə Paşinyan hökumətinin pandemiyadan sui-istifadə edərək ÜST-dən gözlədiyi milyonlarla vəsaiti ala bilməməsidir. Ermənistan hökumətinin ÜST-dən qoparmağı xəyal etdiyi milyonlarla vəsaiti koronavirusla mübarizəyə deyil, öz məqsədlərinə yönəltmək istəyində olduğu da istisna edilmir. ÜST-in pandemiya ilə bağlı bütün dünyanı vaxtında məlumatlandırdığını deyən ekspertlər hesab edirlər ki, düşmən ölkənin bu ittihamlarının heç bir əsası yoxdur.
Bundan başqa, ABŞ-ın da ÜST-i tənqid etdiyini xatırladan ekspertlərin fikrincə, Paşinyan hökumətinin öz tərəfdarlarının dililə ÜST-i və onun rəhbərini əsassız şəkildə tənqid etməsi də dolayısı ilə onların ABŞ-a dəstəyini göstərməyə hesablanıb.
ÜST vaxtında pandemiyanın kəskin xarakter aldığı Ermənistanı qırmızı zona elan etməli idi, lakin qurum bu ölkəyə qarşı arzuedilən addımı atmadı, bu da indi Ermənistanın ÜST-ə “müharibə elan” etməsi ilə nəticələnib.
“Ermənistan növbəti dəfə, ənənəvi olaraq, dünyaya “məzlum erməni” obrazını sırımaq istəyir”
Siyasi şərhçi Azər Həsrətin fikrincə, bu, Ermənistanın ənənəvi yanaşmasıdır. Ermənistanın hər yerdən və hər kəsdən yardım, ianə diləndiyini qeyd edən A.Həsrətin sözlərinə görə, paşinyançıların da ÜST-i bu şəkildə qaralaması və onun özünü, rəhbərliyini ittiham etməsi də məhz bu amildən qaynaqlanır. “Təbii ki, bu yardımları zorla əldə etmək istəyir, buna nail olmadıqda isə “yazıq” donu geyərək yalvarmağa başlayırlar. Paşinyan tərəfdarlarının da ÜST-ə və onun rəhbərinə qarşı bu cür ittihamlar irəli sürməsi bu qurumdan gözlədikləri maliyyə yardımını ala bilməmələri ilə bağlıdır. ÜST kimə gəldi, hara gəldi, sağa-sola pul paylayan təşkilat deyil ki. Bilirsiniz ki, Azərbaycan dövləti pandemiya dövründə hər biri 5 milyon dollar olmaqla iki dəfə ÜST-ə yardım edib. Çünki Azərbaycan ümumbəşəri məsuliyyəti paylaşan, onun altına çiynini verən bir dövlətdir. Ancaq Ermənistan isə nəinki ÜST-ə yardım etmədi, hətta o qurumdan maliyyə yardımı gözlədi. Lakin gözləntiləri boşa çıxdığı üçün, ənənəvi şəkildə, ÜST-i və onun rəhbərliyini qaralamağa başlayıb. Mənə elə gəlir ki, o adam bəlkə də heç Ermənistan və ermənilər haqda bilgili deyil. Sadəcə olaraq, Ermənistan növbəti dəfə ənənəvi olaraq dünyaya “məzlum erməni” obrazını sırımaq istəyir, ona görə də ÜST-in üstünə bu cür absurd ittihamlarla getməyə cəhd göstərilir. Fikrimcə, dünya bu dəfə aldanan deyil, çünki pandemiya həqiqətən də dünyanın hər yerində böyük fəlakətlərə yol açır, o cümlədən də Ermənistanda”.
A.Həsrətin qənaətinə görə, pandemiya ilə bağlı Azərbaycandakı vəziyyətlə Ermənistandakı vəziyyəti müqayisə etsək, bizim ölkədə bu istiqamətdə vəziyyət Ermənistandan qat-qat qənaətbəxşdir. “Niyə belədir, nə üçün balaca Ermənistanda yoluxma halları bizdən qat-qat çoxdur, ölənlərin sayı iki dəfədən artıqdır” - sualının cavabını Paşinyan hökumətinin özü verməli olduğunu deyən A.Həsrətin sözlərinə görə, Ermənistan hakimiyyəti öz fəaliyyətini təhlil etməlidir ki, niyə qonşu Azərbaycanda əhalinin sayı Ermənistan əhalisinin sayından 3 dəfə artıq olduğu halda, yoluxma halları müqayisə edilməyəcək dərəcədə azdır, ölüm halları da o cümlədən. “Ermənistanda isə əhalinin sayı az olduğu, üstəlik də testlərin sayı Azərbaycandan 5 dəfə az olduğu halda, yoluxma və ölü sayı Azərbaycandan çoxdur. Bu sualın cavabı ÜST-də deyil, Ermənistan hakimiyyətindədir” - deyə A.Həsrət bildirdi.
İradə SARIYEVA
