Pandemiyanın statistikasını aparan “Worldometer” saytının məlumatına görə, dünyada koronavirus infeksiyasına yoluxanların sayı 27 milyon nəfəri ötüb. ABŞ, Braziliya, Hindistan yenə virusa tutulanların sayı baxımından ilk üçlüyə daxildir. MDB məkanında isə ən pis vəziyyət Rusiyadadır. Bu ölkədə koronavirus infeksiyasına tutulanların sayı 1 milyonu ötüb. Amma bir sıra parametrlər baxımından təkcə MDB yox, dünyada ən pis vəziyyət Ermənistana məxsusdur. Məsələn, hər 100 min nəfərə düşən koronavirus xəstələrinin sayı baxımından Ermənistan Avropa lideri adını qazanıb.
“Vahid Ermənistan” partiyasının rəhbəri Artur Qazinyan ölkənin bu acınacaqlı hala düşməsində Nikol Paşinyan iqtidarını ittiham edir:“Hörmətli cənab Paşinyan, bu il martın 18-də siz aşağıdakı fikri bildirdiniz - “Koronavirusdan sonra nə olacağını bilmirik. Qeyri-müəyyən vəziyyətdir. Lakin bu qeyri-müəyyənlik bizim üçün yeni imkanlar açacaq. İndi hər şey dağılır və biz böyük tikinti meydanına sahibik”. İndi xahiş edirəm deyin, “bizi” deyərək siz konkret olaraq kimi nəzərdə tuturdunuz? Ailənizi, siyasi komandanızı, yoxsa dövləti? Siz pandemiyanın sizin üçün yeni imkan olduğunu iddia etməyə davam edirsiniz? Əgər belədirsə, onda koronavirus pandemiyasından hansı növ imkan əldə etməyi gözləyirsiniz? Qeyd etməyi vacib hesab edirəm ki, Ermənistan və erməni xalqı işgəncələrdən, insan həyatları itirməkdən və iqtisadi çöküşdən başqa hər hansı başqa imkan əldə etməyib və yaxın gələcəkdə də gözləmir”. Ermənistanda səhiyyə təşkilatçısı, həkim Gevorq Qriqoryan isə ölkəsinin hər yüz min adama düşən koronavirus xəstələrinin sayına görə Avropada birinci yerdə olmasını rüsvayçılıq adlandırıb. O, Ermənistan hökumətinin virusa qarşı mübarizəsinin tamamilə iflasa uğradığını deyib.
Xatırladaq ki, bu günlərdə “statista.com” portalı Ermənistanın hər yüz min adama düşən koronavirus xəstələrinin sayına görə Avropada lider olduğunu açıqlayıb. Belə ki, Ermənistanda hər yüz min adama düşən xəstələrin sayı 1500-ə yaxınlaşır. Bu fonda Ermənistanda virusa yoluxanların və pandemiya qurbanlarının sayı artmaqda davam edir. Son məlumatlara əsasən, Ermənistanda virusa yoluxanların sayı 45 minə çatır. Ölkə əhalisinin sayı nəzərə alındıqda bu böyük göstərici sayılır. Elə Gevorq Qriqoryan da məsələyə bu prizmadan nəzər salır: “Koronavirusla mübarizənin tam iflasa uğradığı haqda mən hələ aprelin ortalarında, fövqəladə vəziyyət rejiminin uzadılmasına baxmayaraq yoluxanların sayının artmaqda olduğu vaxtlarda danışmışdım. Bizim hökumətin koronavirusla mübarizəsinin iflasa uğraması faktdır, müzakirə olunmur. Problem odur ki, biz səhiyyə sistemimizlə birlikdə beynəlxalq ictimaiyyət qarşısında biabır olmuşuq”. Səhiyyə eksperti əlavə edib ki, Ermənistan dörd qonşusundan ikisi ilə sərhədləri bağlı olduğu halda öz sərhədlərini koronavirusdan qoruya bilməyib, eyni zamanda virusun bu cür geniş yayılmasının qarşısını almaqda aciz qalıb. Onun sözlərinə görə, virusa qarşı mübarizə tədbirlərini hələ yanvar ayında, Ümumdünya Səhiyyə Təşkilatı virusun insandan insana ötürüldüyü barədə bəyanatından dərhal sonra görmək, sərhədləri bağlamaq, ölkəyə qayıdan turistləri karantinə yerləşdirmək lazım idi: “Ancaq bizim səhiyyə sisteminin rəhbərləri, başda nazir Arsen Torosyan, xəstəliklərə nəzarət və profilaktika üzrə Milli mərkəzin rəhbərliyi olmaqla, birbaşa efirdə bildirdilər ki, karantin effektiv deyil, sərhədləri bağlamaq düzgün deyil və sair. Onlar öz addımları ilə virusun ölkəyə keçməsi ilə mübarizəni iflasa uğratdılar. Həmin vaxt Paşinyan da virusla mübarizə tədbirləri görmək əvəzinə təbliğat kampaniyası aparırdı və koronavirusa evdə çəkilmiş araqla qalib gəlməyin mümkünlüyü haqda danışırdı. Biz koronavirusla mübarizəni kompleks şəkildə iflasa uğratdıq”. Bu arada xatırladaq ki, Ermənistanın səhiyyə naziri Arsen Torosyanın avqustun 30-dan 19 günlük məzuniyyətə getməsi də böyük narazılıqla qarşılanır. Ermənistan parlamentinin “İşıqlı Ermənistan” fraksiyasının rəhbəri Edmon Marukyan koronavirus şəraitində məzuniyyətə getdiyinə görə Torosyanı tənqid edib: “Görəsən dünyanın hansı ölkəsində səhiyyə naziri koronavirusdan yüzlərlə ölüm, başqa səbəblə, ancaq yenidən koronavirusla əlaqədar yüzlərlə ölüm qeydə alıb və bu şəraitdə məzuniyyətə gedib? Yəqin Ermənistan yenə burada nadir nümunədir və bu da hakimiyyətin xalqa münasibətidir”.
Hazırda real durum budur ki, pandemiya fonunda Ermənistanda acınacaqlı bir vəziyyət yaranıb və proses nəzarətdən çıxıb. Koronavirus pandemiyasının geniş yayıldığı dövrdə tətbiq edilən məhdudiyyətlərə görə ölkə iqtisadiyyatının iflic vəziyyətə düşməsi də narazılığı artırır. Hökumətin tətbiq etdiyi antiböhran proqramı maliyyə cəhətdən yetərli deyil və vətəndaşlar üçün ciddi nəticə vermir, onların sosial-iqtisadi problemlərini həll etmir. Bu durumda Paşinyana qarşı müxalif mövqedə olanlar narazılıqdan istifadə edib hakimiyyətə qarşı gedişlər etməyə çalışır. Hökumətin buna inzibati və güc yolu ilə cavab verməyə hazırlaşması isə Ermənistanda yeni daxili qarşıdurmaya rəvac verir.
Tahir TAĞIYEV
