Ermənistan Baş nazirinin həyat yoldaşı Anna Akopyanın Qarabağda hərbi geyimdə fotosessiyası bəzi erməni nəşrləri tərəfindən gülünc qarşılanmaqla yanaşı, sərt tənqid edilib. “Qraparak” qəzeti yazır ki, məzmunla formanın vəhdəti olmalıdır, amma Annanın timsalında bu yoxdur.
Qeyd olunur ki, bu adi insan sərgüzəştləri lazımi zamanda, yerində, düzgün şəkildə edildiyi halda heç bir problem yaratmır: “Bu kiçik nüansı zamanın, məkanın və görüntünün uyğunluğu barədə düşüncəsini itirən Baş nazirin həyat yoldaşı Anna Akopyan dərk edə bilmir. Əslində, təəssürat budur ki, yaxşı bir perinin sehri ilə anında Zoluşka şahzadəsinə çevrilən və yüksək statusundan necə zövq alacağını anlamayan əyalətdən olan yetkin bir qızla qarşılaşmışıq. Bu çox çətin bir işdir, çünki hamı qəddar həyatdan kral sarayına gedən yolun sınaqlarına dözmür. Zoluşka kral həyatına müqavimət göstərə bilməz, statusun məntiqi əvəzlənməsi kənd cəhalətini, yüksək səviyyəli vətəndaşlıq, ac özünə inam və zövqsüz rəngləri, əyalət kimliyini və mürəkkəb aristokratiyanı birləşdirən məntiqsiz bir hibridə çevrilib”.
Qəzet yazır ki, Annanın imicini təsvir etmək üçün bir sözlə ifadə etməli olsaq, o halda saxtakarlıq üzərində dayanmalı olacağıq: “O, həqiqətən saxtadır, Ermənistanı minən və bütün şıltaqlıqlarını təmin etməyi tələb edən saxta bir şahzadədir. Bu saxtakarlığın əsas simvolu Anna Akopyanın gəzdiyi və yanındakı insanları kənd sənətinin ölümsüzlüyü kimi şəklini çəkməyə məcbur etdiyi kamuflyajlı bikinidir. Bütün bunlar yalan deyilsə, hərbi forma sevgisi səmimidirsə, onda qoy gedib orduda xidmət etsin. Həqiqətən siyasətlə maraqlanırsa, qoy ərindən kənar siyasətə girsin, öz oyununu oynasın və Baş nazirin arxasında gizlənmiş siyasi fitnələrə səbəb olmasın, bütün bunlar günahsız bir kamuflyaj görüntüsü altında baş verməsin. Bu insanlar, həqiqətən, harada olduqlarını anlamırlar, məqamın ciddiliyini və məsuliyyətini dərk etmirlər”.
Göründüyü kimi, Paşinyanın arvadının hərbi formada şəkil çəkib silahdan istifadə etməsi gülünc qarşılanır. O bundan siyasi dividend götürməyə çalışsa da, tamamilə fərqli bir mənzərə ilə üzləşib.
“3 ay öncə erməni və azərbaycanlı qadınlara müraciət edərək onları sülhü dəstəkləməyə çağırdı”
Sözügedən məsələ ilə bağlı fikirlərini baki-xeber.com-la bölüşən hərbi ekspert Ramil Məmmədlinin sözlərinə görə, ölkəyə rəhbərlik edən şəxsin xanımı hərbi vətənpərvərliklə bağlı elə addımlar atmalıdır ki, bu, cəmiyyətdə gülüş hədəfinə çevrilməsin: “Ancaq Anna Akopyanın məlum hərəkətləri nəinki cəmiyyətdə gülüş hədəfinə çevrilir, eyni zamanda, ikrahla qarşılanır. Çünki bu, süni görünür və Anna mələk donuna girmiş şeytan təsiri bağışlayır. Mən özüm də həmin görüntülərə baxmışam və həqiqətən də gülünc təsir bağışlayır. Özünü elə aparır ki, sanki “döyüşə” hazırlaşır. Təsadüfi deyil ki, bütün bunlar erməni mətbuatında sərt tənqid atəşinə tutulub. Çünki hər bir məsələnin təbii və süni tərəfi var. Məlum görüntülərdə açıq-aşkar görünür ki, bütün bunlar süni reklam formasındadır və təbliğat məqsədi daşıyır. Gör bu, Ermənistanda necə ikrah hissi ilə qarşılanır ki, erməni mediası sözügedən məsələ ilə bağlı açıq-aşkar yazır. Məsələnin gülünc tərəfi həm də odur ki, səngərdə hərbi forma geyən Akopyan qulağına brilyant sırğa, barmağına bahalı üzük, boynuna qızıl sep taxıb. Təbii ki, bu, uğurlu təbliğat sayıla bilməz. Məsələnin həm də siyasi-hərbi tərəfi var. Bu onunla bağlıdır ki, adətən, qadınlar sülhpərvər olurlar. Qadın ana, bacı olaraq müharibənin, qan-qadanın əleyhinə çıxış etməlidir. Annanın belə addım atması isə onun hansı təfəkkürə, əxlaqa malik olduğunu ortaya qoyur. Bu da çox ikrah doğuracaq bir məqamdır. Onu da qeyd edim ki, A.Akopyan 3 ay öncə erməni və azərbaycanlı qadınlara müraciət edərək onları sülhü dəstəkləməyə çağırdı. İndi isə əlində avtomat səngərdə şəkil çəkir və bununla müharibəni təbliğ edir. Bütün bunlar həqiqətən də ikrah doğuran məqamlardır”.
Hərbi ekspertin fikrincə, faktiki olaraq, A.Akopyanın ucuz təbliğat cəhdi onun özünə qarşı çevrilir. Bu isə, bütövlükdə, Paşinyanın əleyhinə işləyəcək.
Vidadi ORDAHALLI
