Gürcüstan Avropa İttifaqının (Aİ) rusiyalı müxalifətçi, Korrupsiya ilə Mübarizə Fondunun qurucusu Aleksey Navalnının zəhərlənməsi ilə bağlı bəyanatına qoşulub. Bu barədə Gürcüstanın Xarici İşlər Nazirliyindən bildirilib. Qeyd olunub ki, bu gün ATƏT-in Daimi Şurasının iclasında Aİ-nin nümayəndə heyətinin təşəbbüsü ilə A.Navalnının zəhərlənməsi müzakirə olunub. Məsələ ilə bağlı Aİ bəyanat qəbul edib və Gürcüstan sənədi dəstəkləyib.
Aİ bəyanatda rusiyalı müxalifətçinin “Noviçok” kimyəvi maddəsi ilə zəhərlənməsindən narahatlıq ifadə edərək, Rusiya hakimiyyəti tərəfindən məsələ ilə bağlı müstəqil və şəffaf araşdırmanın aparılmasının zəruriliyini qeyd edib. Məlumdur ki, Rusiya son ayda Ermənistana bir neçə təyyarə dolu silah göndərib. Bu narahatlıq, hətta Prezident İlham Əliyev səviyyəsində diqqətə çatdırılıb. Ancaq görünən budur ki, Rusiya öz əməlindən əl çəkməyib və prosesi davam etdirir. Belə olan təqdirdə, Rusiyanın silah tranşına cavab jesti kimi Azərbaycanın da Navalnı ilə bağlı bəyanata dəstək verməsi lazımdırmı?
Beynəlxalq məsələlər üzrə ekspert Yeganə Hacıyeva “Bakı-Xəbər”ə açıqlamasında bildirdi ki, Navalnının zəhərlənməsi ilə bağlı yekdil rəy, hələ ki, yoxdur:“Bu barədə onun müalicə olunduğu xəstəxananın rəyi var, ancaq Almaniya hökumətinin bununla bağlı hər hansı rəyinə rast gəlinmir. Orada bununla bağlı komissiya yaradılıb. Söhbət istintaq komissiyasından gedir. Çünki belə bir hadisənin baş verməsi həm də cinayət faktıdır. Cinayətin baş verməsilə bağlı məhkəmə qərarı olmalıdır. Navalnının zəhərlənməsilə bağlı bir çox suallar var ki, hələ də açıq qalır. Bəzi məlumatlar var ki, qatarda zəhərlənib, ümumiyyətlə zəhərlənmədiyi barədə də məlumatlar mövcuddur. Rusiya hökumətinin bununla bağlı izahı var. Həmin ölkədə bir reformator qrup var ki, onlar doğrudan da Navalnının zəhərlənməsi barədə bəlli rəy formalaşdırır. Bir sözlə, situasiya tam aydın deyil. Gürcüstan Rusiyanın ona qarşı etdiyi pisliklərin fonunda bunu bir şans kimi qiymətləndirir və Rusiyaya qarşı istifadə edir. Məsələyə sırf hüquqi aspektdən yanaşdıqda bu məsələ ilə bağlı hələlik rəsmən təsdiqlənən heç bir məhkəmə qərarı yoxdur. Bu mövzu bundan öncə Skripalların zəhərlənməsi məsələsinə oxşayır. Həmin hadisəyə görə Rusiyaya çoxlu sanksiyalar tətbiq edildi. Həmin addımlar da zəhərlənməylə adekvatlıq təşkil etmirdi. İddia olunan zəhərlənmənin fonunda Skripallar çoxdan ölməliydilər. Çünki söhbət ağır zəhərlənmədən gedirdi. Navalnının zəhərlənmə iddiası da daha çox Rusiyanın daxilində gedən proseslərdən qaynaqlanır. Eyni situasiyanı biz özümüzdə də görürük ki, bir hadisə baş verəndə, bəlli bir qrup digərinə qarşı sosial media üzərindən necə hücuma keçir. Bütün bunlara baxmayaraq, Azərbaycan Rusiyanın son zamanlar atdığı addımların fonunda bu mövzudan bir anons kimi istifadə edə bilər. Alət olaraq bu faktdan istifadə edə bilərik. Səsvermədə isə buna getməyə lüzum görmürəm. Çünki Rusiyanın özünün nəzarəti altında olan böyük qlobal şəbəkələr var ki, biz onların təzyiqlərilə üzləşmiş olarıq”.
İstənilən halda, yaranmış şansdan istifadə etmək lazımdır. Anlayırıq ki, Rusiya böyük ölkədir, onunla bir qədər ehtiyatlı davranmaq lazımdır. Ancaq bu gün Rusiyanın bizə qarşı etdiyi hərəkətlərə diqqət etsək, belə bir addıma getməyimizin zəruriliyi ortaya çıxmış olar.
Məhəmmədəli QƏRİBLİ
