Ermənistanın Baş naziri Nikol Paşinyanın arvadı Anna Akopyan hər gün yeni bir cildə girir. Riyakarlığı və məkri, yalançılığı ilə heç də avantürist ərindən geri qalmayan A.Akopyanın erməni KİV-ində əlisilahlı görüntüləri yayılıb.
Fotolardan açıq görünür ki, A.Akopyan və onun 15 rəfiqəsi Ermənistan ordusunun işğal etdiyi Dağlıq Qarabağ zonasında yerləşən hissələrindən birində döyüş hazırlığı keçib. “Qadınlar sülh uğrunda hərəkatı” yaratmaq iddiasını dəfələrlə ortaya qoyan və təxminən ay yarım əvvəl Azərbaycan qadınlarına, analarına müraciət edərək “sülh” istədiyini deyən Akopyan indi də əlindəki silahı bizə tuşlayıb.
Sona Ağekyan “Bir zamanlar azərbaycanlı əsgər analarına müraciət edərək, onları barışığa səsləyən A.Akopyan indi əlinə avtomat silahı götürərək onlara qarşı müharibə etməyə hazırlaşır” deyib
Akopyanın məlum fotoları erməni mediasında yayılar-yayılmaz, müxalifətyönlü erməni siyasi şərhçisi Sona Ağekyanın tənqidinə tuş gəlib. S.Ağekyan öz şərhində, necə deyərlər, Akopyanı ağ yuyub qara sərib.
Erməni siyasi şərhçi bildirib ki, Paşinyan və arvadı eyni xasiyyətə malikdirlər, daim erməni xalqına yalan vədlər verdikləri, yalançı sülh çağırışları etdikləri və yerinə yetirmədikləri vədlər üzündən tamamilə erməni xalqının gözündən düşüblər. O deyib ki, bir zamanlar azərbaycanlı əsgər analarına müraciət edərək, onları barışığa səsləyən A.Akopyan indi əlinə avtomat silahı götürərək onlara qarşı müharibə etməyə hazırlaşır.
Arman Petrosyan “Annanın və silahının bir-birilə gülünc uyğunsuzluğu...” - deyə bildirib
Erməni KİV-ində və sosial mediada kəskin tənqid atəşinə tutulan Akopyanı “Mənim səsim” proqramının müəllifi Arman Petrosyan da ciddi şəkildə qınayıb, hətta onun son davranışlarını lağlağı ilə qarşılayıb: “...Amma Annanın "hərbi-vətənpərvərlik" və "super döyüş" şəkilləri sosial mediada bir nömrəli mövzuya çevrildi. Demək istəyirik ki, söhbət Annanın və silahının bir-birilə gülünc uyğunsuzluğu, ordunu gülünc şouya çevirməkdən getmir.
Hətta məsələ bununla bir neçə ay əvvəl sülhü təbliğ edən xanımın "Belarus partizan" duruşunda nə demək arzusunda olması da deyil. Dünən qadınları toplayıb sülhü təbliğ edən və güllələrdən bəzəklər düzəltmək istəyən bir insanı silahla görmək qəribədir. Bu gün o, silahla böyük bir şou təşkil etdi.
Kimə və nəyə ünvanlanmışdı bu şou? Əgər Mehriban Əliyeva üçün idisə, boş yerə çox utancverici vəziyyət yarandı. Sülhün təbliği onun (Annanın) çağırışları idi.
İnternetdəki son günlərin ən sensasiyalı fotosu Belarus Prezidentinin avtomatı ilə iqamətgahının qarşısında peyda olması oldu. Lukaşenkonun mesajı təsadüfi deyildi. A.Akopyanın mesajı nə idi, bunu yalnız təxmin etmək qalır”.
İsmayıl Tanrıverdi: ”Yaxşı olar ki, Anna "xanım" torpaq üzərinə uzanaraq güllə atmağı öyrənməzdən öncə...”
A.Akopyanın hərbi təlimlərdə çəkdirdikləri fotoları şərh edən BDU-nun Erməni araşdırmaları Elmi-tədqiqat və tədris mərkəzinin böyük elmi işçisi, tanınmış ermənişünas İsmayıl Tanrıverdi isə öz “Facebook” hesabında belə yazıb: “Yaxşı olar ki, Anna "xanım" torpaq üzərinə uzanaraq güllə atmağı öyrənməzdən öncə, uşaqlarının dezertir (fərari) atasının xilası uğrunda düşünsün. Əslində, ona atdığı güllələrin fişəngləri lazımdır ki, özünə bəzək əşyaları düzəltdirsin və bu bəzəklərdən Azərbaycan muğamı dinləyərkən, yaxud Xankəndidə çay içərkən istifadə etsin.
Birinci şəklə diqqətlə baxın, nişangahı hədəfə götürən Anna sol gözünü yumaraq, sağ gözü ilə nişan almaq əvəzinə, sağ gözünü yumaraq hədəfə atəş açmağa çalışır. Kimi və ya nəyi vuracağı bəlli deyil. 4-cü, sonuncu şəkildə isə hərbi forma geyinərək özünü reklam etməkdə görəsən məqsədi nədir? Yəqin ki, bununla məqsədi bütün erməni qadınlarını müharibəyə səsləməkdir. Axı müharibə başlayarsa, hamıdan öncə qaçıb bunkerlərdə gizlənən o və ailəsi olacaq”.
Əli Mahmud: “Akopyanın “sülh” çağırışlarının saxta olduğunu elə erməni mediası özü ifşa edir”
“Qarabağa aparan yol” qəzetinin baş redaktoru, tanınmış şair-jurnalist Əli Mahmud isə qeyd edir ki, özünü “sülhpərvər” kimi təqdim etməyə cəhd edən Annanın son addımı onun və ərinin əsl niyyətini tam çılpaqlığı ilə ortaya qoydu. Ə.Mahmud hesab edir ki, Annanın bu hərəkəti, əslində, işğalçı ölkənin aqressiv niyyət və mahiyyətini bütün beynəlxalq aləmə bir daha göstərdi. “Akopyanın Azərbaycan qadınlarına, analarına çağırışının özünün arxasında böyük bir məkr, hiylə dururdu. Dünən “sülhdən” dəm vuran Paşinyanın arvadının sabahısı gün əlində silah “hərbi təlim keçdiyinə” dair çəkdirdiyi fotosessiyası bu adamın niyyətlərinin heç də sülh deyil, işğalçılıq olduğunu göstərdi. Beynəlxalq aləm Annanın bu sərsəm davranışlarına nəhayət ki, reaksiya verməlidir. Saxta sülh çağırışları edən bir adamın mahiyyəti hər kəsə bəlli olmalıdır, oldu da. Paşinyan və onun arvadı sülh istəmir, müharibə istəyir, onlar o qədər aqressivləşiblər ki, gözləri tökülən qanlardan doymur. Paşinyan faşizm, Njdeizm siyasəti yürüdür, bunu dövlət siyasətinə çevirib, erməni xalqını fəlakətə sürükləyib, aclığa, yoxsulluğa məruz qoyub. Bu səbəbdən də onun qiyməti camaatın gözündə bir qara qəpiyə dəymir. İşğalçılıq siyasətindən əl çəkməyən Paşinyanın arvadı da onun yolu ilə gedir. Artıq erməni xalqı Paşinyana inanmır və ondan canlarını qurtarmaq üçün vasitələr axtarır. Paşinyanın özünün və arvadının gülünc hərəkətləri hər zaman erməni mediasında sərt şəkildə tənqid edilir, ictimaiyyətin qınağına tuş gəlir. Bu gün Akopyanın “sülh” çağırışlarının saxta olduğunu elə erməni mediası özü ifşa edir ki, bu adamın məqsədi müharibə olması, qan tökülməsidir” - deyə Ə.Mahmud vurğuladı.
İradə SARIYEVA
