Prezident İlham Əliyev Yunanıstanın Bakıya yeni təyin edilmiş səfiri Nikolaos Piperiqkosun etimadnaməsini qəbul edərkən Azərbaycan ərazilərini işğal edən Ermənistana son həftələr ərzində Rusiyadan daşınan hərbi yüklərdən də bəhs edib.
İlham Əliyev səfirlə söhbətində əvvəlcə Ermənistanın Yunanıstan və yunan Kipri ilə üçtərəfli hərbi əməkdaşığı ilə bağlı narahatlığını çatdırıb:
“Mənim sizinlə qaldırmaq istədiyim, sizin bunu digər mənbələrdən deyil, məndən eşitməyinizi istədiyim ikinci məsələ Ermənistan, Yunanıstan və Kipr arasında hərbi əməkdaşlıqla bağlı narahatlığımızdır. Bildiyiniz kimi, Ermənistan bizim ərazilərimizi işğal etmiş ölkədir. Xocalıda soyqırımı aktı törədib, bir milyon azərbaycanlını evlərindən didərgin salıb, tarixi, mədəni, dini abidələrimizi dağıdıb, işğal edilmiş ərazilərdə etnik təmizləmə siyasəti həyata keçirib, beynəlxalq hüququ pozur və BMT Təhlükəsizlik Şurasının və başqa təşkilatların qətnamələrinə əməl etmir”.
İlham Əliyev xatırladıb ki, iki il əvvəl Avropa İttifaqı və Azərbaycan “Tərəfdaşlıq Prioritetləri” adlı sənədi paraflayıblar. Orada Avropa İttifaqı Azərbaycanın ərazi bütövlüyünü, suverenliyini və beynəlxalq səviyyədə tanınmış sərhədlərinin toxunulmazlığını dəstəkləyir:
“Ermənistan aqressiv davranır. Dövlət sərhədində son gərginliklər Ermənistanın təxribatıdır, terror aktı törətmək üçün sonuncu cəhd zamanı təmas xəttini keçmək istəyərkən erməni zabiti saxlanılıb və artıq etiraf edib ki, onun qrupu bizim hərbçilərimizə və mülki şəxslərə hücum etmək məqsədi güdüb. Bir sözlə, Ermənistan Azərbaycanın düşmənidir və bu onların qərarı olub. Sözsüz ki, Ermənistanın istənilən ölkə ilə sıx hərbi əməkdaşlığı narahatlıq doğurur. Siz yəqin ki, sərhəddə Ermənistanın təxribatından dərhal sonra Rusiyadan Ermənistana intensiv silah təchizatına bizim reaksiyamızdan xəbərdarsınız. Aktiv toqquşmalar iyulun 16-da dayandırıldı və iyulun 17-dən başlayaraq dünənə qədər, (sentyabrın 1-i nəzərdə tutulur - red) – dünən sonuncu uçuş idi, – Rusiyadan Ermənistana Xəzəryanı dövlətlərin hava məkanı vasitəsilə çoxsaylı yük reysləri həyata keçirilib. Bunu sadəcə sizə demirəm. Biz bu məsələni rusiyalı tərəfdaşlarımızla da qaldırmışıq ki, Ermənistanla hərbi əməkdaşlıq bizi narahat edən məsələdir. Çünki bu, Azərbaycan üçün mühüm təhdid törədir, çünki bu silahlardan istifadə edərək onlar bizim hərbçilərimizi, mülki şəxsləri öldürürlər”.
Göründüyü kimi, İlham Əliyev Rusiyadan Ermənistana silah ötürülməsinin davam etdiyini bəyan edib. Bundan əvvəl də İlham Əliyev Putinlə telefon danışığı zamanı bu narahatlığı ifadə etmişdi. Ancaq sonra Azərbaycanda səfərdə olan Rusiyanın müdafiə naziri Şoyqu Ermənistana silah deyil, tikinti materillarının daşındığına dair açıqlama verdi. Azərbaycan rəsmiləri həmin açıqlamanın bizi qane etmədiyini dedi. Deməli, bizim Prezidentin Putinlə telefon danışığından sonrakı müddətdə də Rusiyadan Ermənistana silah daşınıb. Rusiyanın bu addımını necə dəyərləndirmək olar?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, Prezidentin bu iradları bildirməsindən sonra Rusiyanın öz əməllərini davam etdirməsi çox maraqlı görünür:“Onlar başa düşməlidir ki, Azərbaycanın özünün kosmik peyki var. Biz bütün marşrutları əzbər bilirik. Rusiya bu regiondan çıxdığına görə belə addımlar atır. Dağlıq Qarabağ problemini də ermənilər deyil, ruslar yaradıb. Bizi indiyə qədər təkləmişdilər. Hazırda bizim Türkiyə və Pakistan kimi hərbi müttəfiqlərimiz var. Rusiya bütün vasitələrə əl atır ki, Azərbaycanda problem yaransın. Buradakı öz 5-ci kalonunu qızışdırır ki, Azərbaycanda hakimiyyət uğrunda mübarizə aparsınlar. Bütün o planlar pozuldu. 11 minlik türk qoşunu ölkəmizə gəldi, yaxın zamanlarda Azərbaycan Prezidentinin Türkiyəyə səfəri olacaq. Səfərqabağı da yunan səfirilə görüşdə Prezident Türkiyə dövlətilə bir yerdə olduğumuzu açıq bəyan etdi. Bu həm də Rusiyaya verilən bir mesaj oldu ki, artıq onlarla bizim aramızda olan bütün balans siyasəti pozulub. Artıq bizim öz qanı bir, canı bir müttəfiqimiz Türkiyə var. Biz gələcəkdə də onlarla, demokratik dünya ilə bir yerdə olacağıq. Biz artıq əvvəlki Azərbayacan deyilik ki, Rusiya nə dedisə, onu da edək. Nə də Rusiya əvvəlki Rusiyadır. Artıq onun özünün daxilində də milli azlıqlar, xüsusilə türk toplumları baş qaldırıb. Biz hiss edirik ki, Rusiya son addımlarını atır. Nə etməsindən asılı olmayaraq, biz öz yolumuza davam edəcəyik. Türkiyə-Azərbaycan münasibətləri kontekstində bu bölgənin taleyi dəyişir. Şərqlə Qərbi birləşdirən bütün mühüm kommunikasiya xətləri Azərbaycanın üzərindən keçir. Bu da Azərbaycana olan marağı daha da artırır. Dünyanın Rusiyadan yan keçən yolları dəyişir. Bu yolların da böyük əksəriyyəti Azərbaycandan keçir. Azərbaycan bu illər ərzində bütün vacib olan sistemi qura bilib. Rusiyanın məhz Tovuz əməliyyatı zamanı fəallaşması təsadüfi deyildi. Çünki sadaladığımız kommunikasiya xətlərinin böyük əksəriyyəti məhz o bölgədədir. Bütün bu proseslər bir daha göstərdi ki, Rusiya bizə qarşı səmimi deyil. Azərbaycandakı bütün milli qüvvələr bir araya gəlib, bu məsələdə vahid mövqe sərgiləməlidir”.
Rusiyanın bu addımları onun həm də vasitəçilik missiyasına uyğun gəlmir. Belə addımları atan ölkədən hansı neytrallığı gözləmək olar?
Məhəmmədəli QƏRİBLİ
