Amerika Müdafiə Nazirliyinin Rusiya, Ukrayna və Avrasiya üzrə katibliyinin müavini, tanınmış ekspert Laura Katerine Kooper maraqlı açıqlama ilə çıxış edib:
“Mən həqiqətən də bu gün burda olmaq imkanını yüksək dəyərləndirirəm. Baxmayaraq ki, biz vebinarlar, telekörpülər dünyasına alışmağa çalışırıq, müdafiə departamentində müdafiə katibi müdafiə strategiyasını hələ bizə aydınlaşdırmağa imkan tapmayıb və bu vebinar mənim üçün, strategiyamız üçün, ideyalar toplamaq üçün bir imkandır. Bu region həmin strategiyanın, demək olar ki, mərkəzi sayılır. Bizim Xəzər regionundakı əməkdaşlığımız bir neçə milli müdafiə strategiyası obyektinə əsaslanır: ABŞ maraqlarına əsasən uzunmüddətli tərəfdaşlığı gücləndirmək, ölkəni terrorist hücumlarından qorumaq, kütləvi qırğın silahlarının yayılmasının qarşısını almaq. Mənim portfelim sadəcə iki ölkəni əhatə edir - Azərbaycan və Rusiya. Və ABŞ-la bu hər iki ölkə arasında olan münasibətlərin təbiəti son dərəcədə fərqlidir. Bu gün mən fikirlərimi Bakı ilə təhlükəsizlik münasibətlərimiz üzərində quracam. Dogrudur ki, ABŞ-ın Rusiyanın əhatəsində olan bəzi ölkələrə – Cənubi Qafqaz, Ukrayna, Qərbi Balkanlardakı ölkələrə olan münasibətində eynilik var, amma Azərbaycan xüsusi olaraq qlobal rol oynayır - Xəzər enerji resursları və tranzit, eləcə də enerji resurları mənbəyi baxımından. Azərbaycan həm də ABŞ-ın strateji partnyorudur. Əfqanıstana 2001-ci ildən etibarən giriş rolunu oynayır. Biz qəbul edirik ki, Azərbaycan təhlükəli qonşularla yaşayır. İranla Rusiya arasında, eləcə də Avropa və Yaxın Şərq, Mərkəzi Asiya ölkələrinə gedən kəsişmə yollarında yerləşir. Risqlər var – terroristlərin, kütləvi qırğın silahları və qanunsuz daşımaların bu yoldan keçirilməsi cəhdləri! Biz Azərbaycanla bu istiqamətdə illərdir işləyirik. Mən inanıram ki, bütün region bizim bu istiqamətdə reallaşdırdığımız proqramdan bəhrələnir. Biz sərhəddə rentgen sistemləri, sualtı müşahidə avadanlıqları təmin etmişik. Bu, Azərbaycanın öz enerji resursları proqraminin təhlükəsizliyinin qorumasına da kömək edir. Mən bitirməzdən əvvəl COVİD-19 ilə də bağlı məsələyə toxunmaq istərdim. Bu risqlər sərhəd tanımır. Bizim departmanet illərdir səhiyyə təhlükəsizliyi ilə də bağlı əməkdaşlıq edir. Biz bu risqlərlə yanaşı, bioloji silahların qarşısının alınması və aşkarlanması istiqamətində də iş aparırıq. COVİD-19 risqlərinə rəgmən, bizim əməkdaşlıq davam edir. Biz bu virusla mübarizəmizi davam etdirməli, gələcək risqlərə qarşı mübarizəmizi gücləndirməliyik. Biz bunu koordinasıyalı şəkildə etməliyik”.
Göründüyü kimi, ABŞ rəsmisi Azərbaycanın onlar üçün xüsusi önəm daşıdığını bildirib. Həmçinin qeyd edilir ki, Azərbaycan bu addımları təhlükəli qonşuların əhatəsində atır.
Təhlükəsizlik məsələləri üzrə ekspert, Azərbaycaan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Azərbaycan-Amerika əməkdaşlığını strateji tərəfdaşlıq kimi qiymətləndirir: “Hazırda Azərbaycan Amerika ilə dünyada çox böyük bir təhlükə olan beynəlxalq terrorla birgə mübarizə aparır. Azərbaycan Silahlı Qüvvələri Əfqanıstandadır. Azərbaycan bu gün Amerika və NATO qüvvələrinə Əfqanıstanda böyük logistik dəstək verir. Bununla yanaşı, biz ümumiyyətlə antiterror koalisiyasının ən fəal üzvlərindən biriyik. Çünki Azərbaycan dəfələrlə terrordan əziyyət çəkmiş və yüzlərlə vətəndaşını itirmiş ölkə kimi terrora insanlığa qarşı bir cinayət kimi yanaşır və bu mübarizədə ABŞ-la birgəyik. ABŞ Azərbaycanın müstəqilliyini hər zaman dəstəkləyib. ABŞ bu gün Azərbaycanın ərazi bütövlüyünü dəstəkləyir və bizim əməkdaşlığımız bir neçə sahəni əhatə edir. İlk növbədə söhbət enerji sahəsindən gedir. ABŞ Azərbaycanın enerji layihələrini vaxtında dəstəklədi, bu gün söhbət, həmçinin, qaz layihəsindən gedir. Enerji kooridorlarının yaradılması, boru xətlərinin çəkilməsinə də ABŞ dəstək verib. Əslində, ABŞ öz əsas müttəfiqlərinin enerji təhlükəsizliyində və enerji diversifikasiyası sahəsində Azərbaycanı ən önəmli tərəfdaşı hesab edir. Bununla yanaşı, ABŞ üçün Azərbaycanın önəmi bizim ölkəmizin tarixi ilə, dəyərləri ilə bağlıdır. Azərbaycan islam və türk dünyasının birinci dünyəvi dövlətini yaradan ölkədir. ABŞ hazırda bizim xalqımıza məxsus olan tolerantlığı, dini, etnik tolerantlığı, çoxrəngli mədəniyyətimizi böyük təhlükədə olan dünya üçün gələcəkdə bir nümunə görür və bu istiqamətdə Azərbaycan təcrübəsini bilərək ölkəmizi dəstəkləyir”.
Ekspertin sözlərinə görə, Azərbaycan bu əməkdaşlığı anti-ABŞ mövqeyində olan nəhəng ölkələrin əhatəsində edirsə, deməli, bizim səmimiliyimizə şübhə yeri qalmır: “Amerika Birləşmiş Ştatlarının prezidenti Donald Tramp İlham Əliyevə ünvanladığı məktublara Azərbaycanın suverenliyi və müstəqilliyinin güclü şəkildə dəstəkləndiyi ifadəsi ilə başlayır. Məktublarda ölkəmizin ərazi bütövlüyü və sərhədlərinin toxunulmazlığına da güclü dəstək ifadə olunur. Donald Tramp da beynəlxalq təhlükəsizliyin gücləndirilməsi, Avropanın enerji marşrutlarının və mənbələrinin şaxələndirilməsində Azərbaycanın rolunu və töhfələrini yüksək dəyərləndirir. Bu sahələr üzrə iki ölkə arasında çoxillik əməkdaşlığı xüsusi qeyd edir”.
Bizim əməkdaşlığımız bir neçə sahəni əhatə edir. Bütün təzyiqlərə baxmayaraq, Azərbaycan öz xarici siyasətini olduğu kimi davam etdirmək əzmini nümayiş etdirir.
Məhəmmədəli QƏRİBLİ
